動L

出自維基百科,自由嘅百科全書
Jump to navigation Jump to search

動L」(粵音為dong6 l;IPA[tʊ̀ŋɛɫ]),又稱「動呦」、「動啊」、「動AL」、「Dong'al[1][2],喺中國大陸叫做「Duang」 ( IPA:[twáŋ] ),一個起源於2008年嘅網路用語。佢出自「霸王」防脫洗髮液嘅洗頭水廣告入面,成龍喺佢個普通話廣告入面講咗句:「……你拍一個廣告拍完以後加了很多特技,那頭髮動啊……很黑!很亮!很柔!」期間成龍七情上面,用聲音同手勢模仿因加咗特技而誇張噉彈起嘅髮絲。而因為「動啊」嘅發音同嗰陣配合嘅動作太誇張、太得意,令啲網民個個走去扮佢,變咗做網絡用語,再成為潮語

起源[編輯]

2004年,成龍代言「霸王洗頭水」嘅廣告,佢話:

(呃……)當我第一次知道要拍洗髮水廣告的時候,其實我是拒絕的。因為我覺得,(呃……)你不能叫我拍我就馬上去拍,第一我要試一下,(不然)我又不想說,一個廣告拍完後加上好多特技,頭髮動啊,很黑,很亮,很柔,結果觀眾出來一定會罵我,根本沒有這種頭髮,證明上面這個是假的。我說先給我試一下。後來經過證實也知道它們是中藥的,而且沒有那種化學成分。洗了一個月……這個月下來之後,起碼我用了很舒服,現在我每天還在用,我還給我成家班用:「來!來!來!大家試試看!」我跟導演講:「拍的時候就拍!拍完之後,這個頭髮就是我的頭髮,就不要再加特技上去,沒有,就是這樣子。」我要給觀眾看到,我用完之後就是這樣子,你們用完的時候也是這樣子!

粵文譯:

(呃……)我第一次知道要影洗頭水廣告嗰陣,其實我係唔制嘅!因為我覺得,(呃……)你冇得叫我影我就即刻影,第一我要試下,(唔係)我又唔想話,影咗個廣告加好多特技,頭髮郁啊,好黑,好令,好順,結果觀眾出來一定會鬧我,根本無呢啲頭髮,證明上面呢個係假嘅!我話畀我試下先,後來證實知道佢哋係中藥嘅,而且無嗰啲化學成分。洗咗成個月……成個月之後,起碼我用咗好舒服,而家我每日都用緊,我畀埋成家班用:「嚟!嚟!嚟!大家試下!」我同導演講:「影咪影!影完,呢把頭髮就係我嘅頭髮,就唔好再整特技上去,無,就係咁樣。」我要畀觀眾睇到,我用完之後就係咁,你哋用完之後都係咁!

但係喺2010年,有媒體聲稱霸王洗頭水有致癌物二噁烷(霸王唔認)[3][4],而霸王兩款產品又因為虛假宣傳被大陸藥監部門調查[5]。之後引發咗網上對廣告嘅惡搞[6]

現實中嘅影響[編輯]

動L嘅影響力甚廣,例子太多講唔晒,以下淨係列出對現實中早期啲嘅影響。

報章雜誌[編輯]

蘋果日報》副刊[編輯]

2009年4月24號嘅《蘋果日報》副刊中,編輯用「動L」嚟形容彈牙嘅讚岐烏冬[7]

《蘋果日報》娛樂版[編輯]

藝員王菲接拍嘅2009年新一系列霸王洗髮水廣告,報導中以「長髮動L」,來形容王菲飄逸嘅長髮[8]

《蘋果日報》政情版[編輯]

三位前自由黨成員林健鋒、梁劉柔芬同梁君彥,喺2009年6月16號成立名叫「經濟動力」嘅組織。編輯用咗「經濟動L」來稱呼呢三位用英文 L 字開頭嘅人搞嘅組織[9]

電視/電台節目[編輯]

《係咪小兒科》第一輯[編輯]

無綫電視節目《係咪小兒科》第一輯嘅其中一集,古巨基曾經講到「動L」呢個字。

體育新聞報道[編輯]

2009年3月11號,無綫電視互動新聞台中其中一單足球新聞報道,報導員伍家謙突然用「動L」呢個字以形容球員入波的動作[10][11]

2009年度勁歌優秀選第一回[編輯]

古巨基整咗個L字手勢然後放平問陳奕迅嗰條IQ題嘅謎底,陳奕迅答錯做「動L」。

香港亂噏[編輯]

喺2009年5月31號播出嘅《香港亂噏》節目中,惡搞成龍嘅「成大哥」(姜皓文扮)多次講「動L」及揈頭,影射成龍洗頭水廣告。

另外,喺2009年7月12號播出嘅《香港亂噏》嘅《特區政府冇問題記者會》環節入面,成龍洗頭水廣告再次被人惡搞[12]

《頭條新聞》[編輯]

喺2009年6月12號播出嘅《頭條新聞》節目中嘅《CMN超現實報道》環節,主持林超榮惡搞成龍做「成蟲」,希望全港市民練拳強身,喺環節完結時講咗句「動L」[13]

《早霸王》[編輯]

呢個商台節目用《霸王動L》做其中一個環節個名。

呢個字喺大陸嘅情況[編輯]

大陸網民整嘅“duang”字寫法
繁體
簡體

動L呢個潮語誕生之後7年,呢個字再次喺大陸炒起,但係變種成「Duang」[14]。2015年頭,有個叫「緋色toy」嘅人喺彈幕影片網Bilibili將條廣告片攞出嚟惡搞,將佢同大陸藝人約瑟翰·龐麥郎中文約瑟翰·龐麥郎嘅歌《我的滑板鞋中文我的滑板鞋》remix埋,呢個「duang」字就係咁不斷被人惡搞[15]

條片掟咗上網之後,「duang」一詞迅速成為中國網絡熱詞,「duang乜嘢意思」一度成為微博排名第一嘅搜尋字眼,截至2015年3月1號6點,喺微博度搵「duang」呢個字,已經可以搵到近500萬個結果[15]。網民不單止創造咗「duang」嘅漢字寫法,重用佢嚟「造句」,「duang」呢個字都被人認為係羊年第一個網絡熱門詞,惡搞片入面嘅「加特技」亦因而流行[16]。網上購物網站都整啲T恤、手機殼、記事簿、腰包、心口針、口罩、洗頭水搭呢個順風車,用佢改名或者做廣告,並熱賣[17]

「Duang」呢個字喺中國網絡爆紅,亦引發咗包括英國BBC同美國《外交政策中文外交政策(雜誌)》雜誌等等海外媒體嘅關注,走紅全球[15][18][19][20]

而當事人成龍嘅微博都喺惡搞片掟上網之後被人用「duang」洗版,之後成龍自己喺微博都用「duang」自嘲,引發網民圍觀[15]。喺2015年中國「兩會」期間,有媒體記者問及「最近網上很火的『duang』字你怎麼解釋」時,身兼全國政協委員嘅成龍講笑話「好好玩」[21]。但係喺另一個場合,全國政協文藝界小組會議入面,成龍抱怨:「抱咗下宋祖英就上頭版,講一句duang就寫咗咁耐……我呢個duang,講100年。我而家講一句真話真係有可能後悔10年,後悔成世。等你死咗嗰日,甚至死咗之後重會被人抄返出嚟。」表示以後講嘢要三思[22]。另一當事方霸王都改過之前網友惡搞嘅片,整條「自嘲」片,但係其中「連續七年銷量第一」嘅台詞就被人質疑[23]

參考[編輯]

  1. 東方日報副刊:齊齊扮實Q動AL博物館大冒險
  2. 都市日報:黃德几 投資得機:霸王硬上「市」大市更「動AL」[失咗效嘅鏈]
  3. "霸王洗发水陷"致癌门" 七成消费者称不再购买". 西部网. 2010-07-15. (原先內容喺2015-04-02歸檔). 喺2015-03-04搵到. 
  4. 京华时报 (2015-03-04). "霸王诉壹周刊诽谤案香港聆讯 回应Duang". 新华网. 喺2015-03-04搵到. 
  5. 京華時報 (2010-09-10). "霸王兩款產品虛假宣傳被查". 網易. 喺2015-03-04搵到. 
  6. 暴走漫畫. "暴走漫畫—暴走大事件第二季:03期之腦殘廣告唐馬儒教你高效美白". 優酷. 喺2015-03-04搵到. 
  7. 蘋果日報副刊:中日韓冷 麪戰 動 L烏冬
  8. 蘋果日報:娛樂名人:王菲長髮動 L出擊
  9. 蘋果日報:政壇八達通:「經濟動 L」難變身政黨,2009年6月17日。
  10. YouTube影片:03 11 01 iNews 深宵新聞報道 動L(0:40)
  11. YouTube影片:亞洲足協盃F組 2009-3-11 南華對印尼棉蘭 (AFC Cup 2009 Group F SCAA vs Medan)
  12. 2009年7月12日《香港亂噏》節目截圖
  13. YouTube影片:12-06-2009 頭條新聞:「CMN超現實報道」
  14. "香港08年發明成龍「動L」 中國網民7年之癢再惡搞造字". 852郵報. 喺29 June 2015搵到. 
  15. 15.0 15.1 15.2 15.3 引用錯誤 無效嘅<ref>標籤; 無文字提供於名為ckxx0302嘅參照
  16. "成龍造羊年首個網絡熱詞 duang為什麼火起來?". 華夏經緯網. 2015-03-02. 喺2015-03-04搵到. 
  17. "一句"Duang"引發周邊產品熱賣". 福建日報報業集團. 海峽都市報. 2015-03-11. 第 A48頁. (原先內容喺2015-04-02歸檔). 喺2019-01-13搵到. 
  18. "Millions share new Chinese character". BBC . 2015-03-02. 喺2015-03-04搵到. 
  19. 新浪娛樂 (2015-03-04). 2015-03-03/content_13308234.html "成龍Duang登BBC熱門報導網友:火到全球" 檢查|url=值 (詳情). 中國日報網. 喺2015-03-04搵到. 
  20. "中國網絡語流行世界全民"Duang"不停". 多維新聞. 2015-03-03. 喺2015-03-04搵到. 
  21. 新浪娛樂 (2015-03-04). "趙本山現身兩會氣色好:成龍稱duang很好玩". 重慶在線. (原先內容喺2015-04-02歸檔). 喺2015-03-04搵到. 
  22. 中央社 (2015-03-12). BE%8D%E6%80%A8%E5%AA%92%E9%AB%94%EF%BC%9A%E4%B8%80%E5%8F%A5duang%E5%B0%B1%E5%AF% AB%E9%80%99%E9%BA%BC%E4%B9%85 "成龍怨媒體:一句duang就寫這麼久" 檢查|url=值 (詳情). 聯合新聞網. 喺2015-03-12搵到. 
  23. 引用錯誤 無效嘅<ref>標籤; 無文字提供於名為新華網嘅參照

出面網頁[編輯]