北白川宮成久王
北白川宮成久王（日文：きたしらかわのみや なるひさおうKitashirakawanomiya Naruhisa，1887年4月18號—1923年4月1號）係北白川宮第三代當主，能久親王三仔（嫡長子）、永久王老豆，同時係陸軍軍人，最高階位為陸軍大佐。
經歷
[編輯]成久王1887年響東京府芝區出世，係能久親王三仔，阿媽係能久親王妃富子。
1895年，老豆能久死咗，因為成久係嫡長子，所以北白川宮由佢繼承。1901年，佢同鳩彥王同埋稔彥王一齊入讀東京陸軍地方幼年學校，由於佢生得算係幾靚仔，所以佢累積咗好多人氣。之後佢分別升讀陸軍士官學校同埋陸軍大學校，畢業之後升為陸軍炮兵大佐。
1909年，佢同明治天皇第七個女房子內親王結婚。1917年，佢獲勳為大勲位菊花大綬章。
1921年，成久以假名「北伯爵」去法國聖西爾軍校留學，學有關軍事同埋社交嘅嘢。第二年，佢攞到車牌，仲出於自己嘅愛好而去買咗一架車。而老婆房子都同意佢呢個決定，所以佢哋畀人稱為「平民兩公婆」，令佢哋有好廣闊嘅社交圈子。
1923年，成久王邀請當時仲響法國讀緊書嘅稔彥王同佢一齊出去兜風，但坐坐下稔彥王就發覺成久王有啲問題，加上唔相信佢嘅揸車技術，於是就同成久王講：「我覺得你有啲唔妥，不如第二日先出去兜風啦。」稔彥王又話：「雖然法國啲路幾闊下，但都係唔可以掉以輕心。」但係成久並冇理到稔彥對佢嘅忠告，反而仲遨請稔彥響4月1號同佢一齊去諾曼第多維爾到玩。稔彥見佢咁嘅樣，唔係幾放心，最後就同成久講：「真係好對唔住，見你咁唔妥，我都係唔去啦。我仲要去英國倫敦留學呢。」
.jpg)
之後，成久邀請到當時一樣都響聖西爾軍校留學嘅鳩彥王同佢一齊玩。1923年4月1號，佢同鳩彥、老婆房子出去玩。
途中響埃夫勒墳飽個肚之後，換由成久王揸車。響一條村之前，成久諗住超越前面架車，點知行咗第二邊，出咗條馬路，撞落路邊一棵相思樹上面。結果，成久王傷重死亡，終年三十五歲，而同行嘅鳩彥王同埋房子都身受重傷。當主一位就由大仔永久王接任。
之後響日本駐巴黎大使館舉行咗成久王嘅葬禮，後嚟由軍人中島今朝吾捧佢個骨灰返日本。同年6月8號，佢正式落葬於豐島岡墓地。1935年，響佢撞車嘅現場附近起咗一塊紀念碑，紀念成久。
屋企
[編輯]老豆：北白川宮能久親王
阿媽：能久親王妃富子
兄弟：大佬恆久王---二哥廷久王---長細佬小松輝久---二細佬二流芳之---三細佬上野正雄
老婆：房子內親王