東久邇宮稔彥王

出自維基百科,自由嘅百科全書
跳去導覽 跳去搵嘢
東久邇宮稔彥王
HIH Prince Naruhiko of Higashikuni.png
Flag of Japan.svg 日本首相
任期
1945年8月17號-1945年10月9號
前任鈴木貫太郎
繼任幣原喜重郎
Flag of Japan.svg 日本陸軍大臣
任期
首相時兼任
前任阿南惟幾
繼任下村定
Flag of Japan.svg 日本防衛總司令官
任期
1941年-1945年
前任山田乙三
繼任(官位畀人廢除)
個人資料
出世(1887-12-03)1887年12月3號
Flag of Japan.svg 日本京都府
1990年1月20號(1990-01-20)(102歲)
Flag of Japan.svg 日本東京都
配偶泰宮聰子內親王
仔女盛厚王
師正王
粟田彰常
多羅間俊彥
父母久邇宮朝彥親王(老豆)
宗教信仰神道
簽名
軍事背景
軍事獎陸軍大將從一位
功一級金鷂勳章

東久邇宮稔彥王(日文:東久邇宮稔彦王ひがしくにのみやなるひこおうHigashikuni-no-miya Naruhiko Ō1887年12月3號1990年1月20號)係日本舊皇族兼陸軍軍人,最高階位係陸軍大將從一位功一級,同時係第43任日本首相

佢係久邇宮朝彥親王第九個仔,早年加入陸軍,曾經參加中日戰爭。1915年稔彥王同明治天皇第九個女泰宮聰子內親王結婚,佢哋有四個仔。

1945年8月17號至10月9號,稔彥王做咗54日首相,處理終戰事宜。

1947年,稔彥王被駐日盟軍總司令部正式下令撤消皇族身份,因而改名叫東久邇稔彥(東久邇 稔彦ひがしくに なるひこ)。

東久邇聰子喺1978年逝世。而東久邇稔彥喺1990年1月20號逝世,享年102歲,佢俾健力士世界紀錄列為「世界最長命嘅前首相」。

經歷[編輯]

早年[編輯]

1910年嘅稔彥王

1887年稔彥王響京都府出世,係朝彥親王最細個仔[1]。早年入讀學習院初等科,同期生有八哥鳩彥王威仁親王個仔栽仁王、同埋能久親王兩個仔成久王輝久王[2]

因為佢係朝彥最細個仔,本身佢係要降做華族,但明治天皇睇起佢,為咗唔畀佢降為華族,所以就將第九個女泰宮聰子內親王同稔彥訂婚。1906年,稔彥獲賜宮號「東久邇宮」,同年加入陸軍。佢1908年畢業於陸軍士官學校,六年之後畢業於陸軍大學校。1915年,佢正式同聰子內親王結婚[3][2]

當時正響法國留學嘅稔彥王

1920年,佢去法國聖西爾軍校留學,畢業之後到巴黎綜合理工學院進修政治同外交。佢認為法國比日本自由好多,又同唔少名人見面,例如莫內克列孟梭約瑟夫霞飛同埋菲臘貝當,仲成日揸車同老婆聰子去玩[1]。1923年,同時響法國留學嘅表哥成久王因為唔聽稔彥王對佢嘅忠告,結果響巴黎郊區出事,成久王傷重死亡,而同行嘅大佬鳩彥王就受到重傷。

1926年佢返嚟日本,因為受到法國自由主義影響,所以佢成為當時思想最開放嘅皇室成員。佢返日本之後,見到日本工業咁落後,好唔甘心,所以後嚟開咗興亞工業大學(即依家嘅千葉工業大學[4]

其實大正天皇一直希望稔彥兩公婆可以早啲返嚟日本,而聰子都表示唔想再留響法國,但稔彥唔想返思想較為傳統嘅日本,結果就同大正天皇不和。最後稔彥仲等到大正天皇死咗兩年之後,響聰子強迫之下先至返嚟[5]

軍人生涯[編輯]

1926年(即係佢留學回國嗰年),佢正式參軍去打仗,先後就任近衛步兵第三連隊長、第二師團長、第四師團長同埋陸軍航空本部長[3]。佢一直提議改革日軍,想日軍變得更現代化。

1937年爆發中日戰爭,佢去中國華北地區做第二軍司令官,其中曾經帶頭參加武漢會戰。由於成日拖延打仗時間,所以成日畀人鬧。雖然係咁,但佢都係響1939年升上做陸軍大將。1940年,因為響中日戰爭入面表現好好,所以獲勳功一級金鷂勳章[6]

1941年,稔彥王去見昭和天皇,期間提到:「杉山元總長依家又去攻打法屬印度支那,呢個舉動係對每個國家都有唔好嘅影響,仲令到日本嘅國際關係好差。何況打咗佢之後唔單止一啲好處都冇,仲要畀兩國凍結我哋嘅資產,對日本好不利,特別係對我哋陸軍。」點知昭和天皇話自己好無辜,仲話稔彥唔可以違反君主立憲制。同年十月,近衛內閣正式總辭,而稔彥就畀人提拔為下一任首相。其中稔彥屬於和平派,主張避免同美國正面交鋒,但呢一點就畀內大臣木戶幸一反對,所以最後木戶改為提名強硬派嘅東條英機做下任首相。因為支持中日和平法,所以響太平洋戰爭期間稔彥王越嚟越擔心日本響國際上嘅地位[7]。同年12月,佢就任防衛總司令官[6]

響之後嘅時間入面,佢一直同高松宮宣仁親王一齊反對日軍周圍打。1945年,佢兼任軍事參議官,但同年5月發生東京大轟炸,東久邇宮官邸都畀人炸咗[6]

政治生涯[編輯]

東久邇宮內閣成員合照

1945年7月,波茨坦公告正式生效,三日之後稔彥王獲得提名做下任首相。原本佢想唔做首相,但係因為昭和天皇極力挽留,所以佢最後接受提名[6]

之後佢任命內閣官員,其中國務大臣由前任首相近衛文麿做、外務大臣係重光葵、內閣官房長官係緒方竹虎、外相係吉田茂,海軍大臣係米內光政。而陸軍大臣一位開頭由稔彥王兼任,後嚟就畀咗下村定。而佢又多咗個尊稱,叫「東久邇總理大臣宮」[2]

原先稔彥王應駐日盟軍總司令要求,準備投降,但係日軍都仲未肯投降。最後稔彥王使團去外國打仗嘅軍隊講清楚,先至可以解除武裝。之後盟軍開始佔領同埋控制日本[7]

日軍代表喺東京灣簽投降書

響昭和天皇發玉音發送之後十八日,日軍去東京灣到簽投降書[8]

同月,支持和平嘅基督教賀川豐彥去首相府見稔彥王,批評戰後嘅日本道德倫理好差,當正外地人係仇人,令到世界唔和平,希望政府可以一齊幫手改善。同時之間,日本基督教團主事木俣敏都話日本要早啲改善呢個問題,為咗令國民反省,佢提議搞個「一億總懺悔運動」,賀川聽到之後大力支持。稔彥王一開始聽到嗰陣都好驚訝,但後尾佢諗通咗,就支持咗呢個運動[9]

稔彥王到國會發表講話

第二日,稔彥王見記者,宣佈咗呢個運動,要求「官、軍、民」一齊徹底反省,話呢個係重建日本嘅第一步。同年9月5號,佢去咗國會發表講話,同月18號見外國記者。呢個運動響國內有唔少反對聲音,因為咁樣就等於承認日本侵華係事實。雖然最後呢個運動因為駐日盟軍總司令反對之下而搞唔成,但日本國內都有人承認咗[10]

另一方面,駐日盟軍總司令已安排好遠東國際軍事法庭去審判一啲日本軍人,同月12號正式開始[11]

「一億總懺悔運動」失敗之後,又傳出要昭和天皇退位。其中外務官田尻愛義同稔彥講,話昭和天皇退位先至有利去重建日本,而以高松宮宣仁親王為首嘅皇室、唔少嘅政府人員都支持,甚至傳出昭和天皇自己都有諗過咁做[12]。最後麥克阿瑟就出嚟解畫,話:「如果昭和天皇退位會大大影響日本,甚至會令到國內影勢動盪」,咁先至平息呢件事[13]

稔彥王一直希望可以重建日本,另外佢仲想放咗嗰班因為二戰而畀遠東國際軍事法庭判監嘅人,同埋修憲實行選舉法,令到日本更自由。但係佢一次又一次嘅行動都畀駐日盟軍總司令反對,令到兩者矛盾加深。同年10月4號,駐日盟軍總司令撤消咗好多官職,其中有陸軍大臣、海軍大臣、特別高等警察同埋內務大臣以下嘅所有官職。稔彥王覺得唔合理,就去同盟軍總司令傾,但係最後傾唔成。再加埋之前嘅事,令到稔彥王唔再信從盟軍總司令,為咗表示抗議,所以佢選擇內閣集體辭職。同月9號佢正式總辭[14][7]

皇籍脫離前後[編輯]

辭職之後,稔彥王宣佈願意為日本戰敗負上責任,希望臣籍降下(即皇籍脫離嘅前身),而之後閑院宮春仁王聯同賀陽宮恆憲王都話支持咁做[7]

1946年5月,佢辭職唔做貴族院議員,同年接受公職追放(指要求啲人唔要依家嘅職位,1952年解除)[7]。1947年,稔彥王帶埋一家大細,同另外十個宮家一齊皇籍脫離,改名叫東久邇稔彥[6][15]。但係脫離咗皇籍之後,稔彥王過得並唔好。開頭佢響新宿開咗間黑市食品鋪,後嚟又開咗間喫茶鋪(喫茶,即係中國嘅吃茶,而日本嘅喫茶鋪會賣咖啡紅茶同埋和菓子),又賣一啲自己以前一直珍藏嘅古董。佢話,以前一直高高在上,完全感受唔到平民嘅生活,而依家佢雖然係窮,但過得好充實[1]

1948年,佢同尾崎行雄、賀川豐彥、下中彌三郎同埋湯川秀樹五個人開咗世界連邦建設同盟(即依家嘅世界連邦運動協會)。兩年之後,佢創立新興宗教「ひがしくに教」。同年6月,法務府要求稔彥改過第二個名,所以稔彥將教改名叫「平和教」,但係平和教因為冇太多人承認而解散[2][16]。同年佢加入共濟會[17]

1960年,日本爆發安保鬥爭,而稔彥聯同石橋湛山片山哲去信畀時任首相岸信介,要求佢停戰。1969年,大仔盛厚死咗。1971年,棧勝正創辦日本文化振興會,而稔彥就獲得棧勝正嘅邀請,成為日本文化振興會第一任總裁[18]

1978年,老婆聰子都死咗。

死後[編輯]

1990年1月20號,稔彥響澀谷區廣尾日本紅十字社會醫療中心死咗,終年102歲,係全世界最長命嘅元首(其次係荷蘭前首相威廉德雷斯,第三係中曾根康弘),所以畀列入健力士世界紀錄。之後佢畀人追封功一級,死咗六日之後佢落葬響豐島岡墓地[19]

本身佢係1947年皇籍脫離嘅人入面最長命嗰個,而呢個紀錄響2014年畀東伏見宮東伏見慈洽打破(東伏見慈洽終年103歲,畀稔彥長命一歲)[20]

影響[編輯]

內文: 日本皇位繼承問題東久邇宮

由於1947年改制嘅情況下,好多皇室成員冇咗皇籍,所以稔彥係唯一一個曾經做過日本最高話事人嘅皇室成員,所以有返咁上下影響力。另外,佢係當時咁多個最近當代天皇血統嘅宮家(稔彥本身就娶咗明治天皇第九個女聰子,而大仔盛厚娶咗昭和天皇大女成子),而依家皇室又淨返一個男性後人悠仁,所以依家有唔少人要求將個啲宮家復籍,而其中呼聲最高嘅就係東久邇宮[21]

屋企[編輯]

老豆:久邇宮朝彥親王

兄弟:大佬邦憲王---二哥邦彥王---三哥守正王---四哥多嘉王---五哥暢王---六哥冇名(夭折)---七哥鳩彥王(最大個大佬武智宮夭折)

老婆:泰宮聰子內親王

東久邇稔彥同東久邇聰子嘅仔女
未皇籍脫離之前個名 出世日期 死亡日期 配偶 仔女
大仔 東久邇盛厚 盛厚王 1916年5月1號 1969年2月1號 東久邇成子 東久邇信彥
高木文子
壬生基博(即東久邇秀彥)
東久邇真彥
東優子
二仔 師正王 (唔啱用) 1917年11月3號 1923年9月1號
(死於關東地震
三仔 粟田彰常 彰常王 1920年5月13號 2006年8月30號 畠中久江 粟田常一
粟田彰彥
細仔 多羅間俊彥 俊彥王 1929年3月24號 2015年4月15號 多羅間勝子 多羅間稔彥

自傳[編輯]

  • やんちゃ孤独(響1955年由讀賣新聞社出版)[1]
  • 東久邇日記 日本激動期の秘録(響1968年由德間書店出版)[1]

[編輯]

  1. 1.0 1.1 1.2 1.3 1.4 "皇族軍人伝記集成 第11巻 東久邇宮稔彦王 東久邇日記 日本激動期の秘録(東久邇稔彦著 1968年) やんちゃ孤独(東久邇稔彦著 1955年) - ゆまに書房". www.yumani.co.jp. 喺2020-10-08搵到.
  2. 2.0 2.1 2.2 2.3 日本国語大辞典, ブリタニカ国際大百科事典 小項目事典,デジタル大辞泉,百科事典マイペディア,デジタル版 日本人名大辞典+Plus,世界大百科事典 第2版,日本大百科全書(ニッポニカ),精選版. "東久邇稔彦とは". コトバンク (日文). 喺2020-10-08搵到.
  3. 3.0 3.1 "ひがしくにのみやなるひこおう【東久邇宮稔彦王】 | ひ | 辞典". 学研キッズネット (日文). 喺2020-10-08搵到.
  4. "トピックス". web.archive.org. 2019-06-20. 喺2020-10-08搵到.
  5. Kashima, Shigeru, 1949-; 鹿島茂, 1949- (2006). Sepia-iro no kōzoku arubamu : miyake no jidai. Tōkyō: Asahi Shinbunsha. ISBN 4-02-250226-6. OCLC 74816431.CS1 maint: multiple names: 作者名單 (link)
  6. 6.0 6.1 6.2 6.3 6.4 "『親王・諸王略傳』 稔[稔彦]". nss.o.oo7.jp. 喺2020-10-08搵到.
  7. 7.0 7.1 7.2 7.3 7.4 鳥海靖. 歴代内閣・首相事典. 吉川弘文館.
  8. "敗戦国日本・無条件降伏". chusan.info. 喺2020-10-22搵到.
  9. "社会的弱者の友として―賀川豊彦の生涯(13)国民総ざんげ運動". クリスチャントゥデイ (日文). 2016-07-04. 喺2020-10-11搵到.
  10. "2014年03月11日 - FK元弁護士の雑記帳". tofuka01.blog.fc2.com. 喺2020-10-16搵到.
  11. 新聞と戦争 写真を処分せよ. 朝日新聞. 2007年.
  12. 田尻愛義 (1977年). 田尻愛義回想録:半生を賭けた中国外交の記録.
  13. 木戶幸一 (1966年). 木戶日記.
  14. 今西光男. 占領期の朝日新聞と戦争責任 村山長挙と緒方竹虎. 朝日新聞社.
  15. 凌俊賢 (2019-03-21). "日本裕仁天皇之孫 74歲東久邇信彦逝世". 香港01 (中文). 喺2020-10-22搵到.
  16. MAGAZINE, P+D (2018-06-22). "【池上彰と学ぶ日本の総理SELECT】総理のプロフィール | P+D MAGAZINE". pdmagazine.jp (日文). 喺2020-10-17搵到.
  17. "International Conference on the History of Freemasonry | Freemasonry | Masonic Lodge". Scribd (英文). 喺2020-10-17搵到.
  18. "日本文化振興会とは? - 一般社団法人日本文化振興会". www.nihonbunka.jp. 喺2020-10-18搵到.
  19. "知的巨人たちの百歳学(143)世界の総理大臣、首相経験者の最長寿者としてギネスブックに登録された昭和天皇の叔父の東久邇稔彦(102歳) | 前坂俊之オフィシャルウェブサイト". web.archive.org. 2019-11-29. 喺2020-10-18搵到.
  20. "天皇陛下の叔父、東伏見慈洽氏が死去 103歳". 日本経済新聞 電子版 (日文). 喺2020-10-18搵到.
  21. "NHKが旧宮家に皇族復帰の希望を書面で回答要求". アゴラ 言論プラットフォーム (日文). 喺2020-10-22搵到.

[編輯]

上一任
鈴木貫太郎
日本首相
1945年8月 - 1945年10月
下一任
幣原喜重郎
上一任
阿南惟幾
日本陸軍大臣
做首相嗰陣兼任
下一任
下村定
上一任
(新起)
東久邇宮當主
1906年 - 1947年
下一任
(皇籍脫離)
上一任
(初代)
東久邇家當主
1947年 - 1990年
下一任
東久邇信彥