東久邇宮稔彥王
| 東久邇宮稔彥王 | |
|---|---|
 | |
 日本首相 | |
| 任期 1945年8月17號－1945年10月9號 | |
| 前任 | 鈴木貫太郎 |
| 繼任 | 幣原喜重郎 |
| 日本陸軍大臣 | |
| 任期 首相時兼任 | |
| 前任 | 阿南惟幾 |
| 繼任 | 下村定 |
| 日本防衛總司令官 | |
| 任期 1941年－1945年 | |
| 前任 | 山田乙三 |
| 繼任 | (官位畀人廢除) |
| 個人資料 | |
| 出世 | 1887年12月3號 日本京都府 |
| 死 | 1990年1月20號（102歲） 日本東京都 |
| 配偶 | 泰宮聰子內親王 |
| 仔女 | 盛厚王 師正王 粟田彰常 多羅間俊彥 |
| 父母 | 久邇宮朝彥親王（老豆） |
| 宗教信仰 | 神道 |
| 簽名 |  |
| 軍事背景 | |
| 軍事獎 | 陸軍大將從一位 功一級金鷂勳章 |
東久邇宮稔彥王（日文：東久邇宮稔彦王／ひがしくにのみやなるひこおうHigashikuni-no-miya Naruhiko Ō；1887年12月3號—1990年1月20號）係日本舊皇族兼陸軍軍人，最高階位係陸軍大將從一位功一級，同時係第43任日本首相。
佢係久邇宮朝彥親王第九個仔，1915年同明治天皇第九個女泰宮聰子內親王結婚。曾經到法國留學，1926年加入陸軍，參加過中日戰爭，1939年升為陛軍大將。1945年8月17號至10月9號，稔彥王做咗54日首相，處理終戰事宜。1947年，稔彥王被駐日盟軍總司令部正式下令撤消皇族身份，因而改名叫東久邇稔彥（東久邇 稔彦／ひがしくに なるひこ）。東久邇稔彥喺1990年1月20號逝世，享年102歲，佢俾健力士世界紀錄列為「世界最長命嘅前首相」。
經歷[編輯]
早年[編輯]
.jpg)
1887年稔彥王響京都府出世，係朝彥親王最細個仔[1]。早年入讀學習院初等科，同一屆嘅同學有八哥鳩彥王、威仁親王個仔栽仁王、同埋能久親王兩個仔成久王、輝久王[2]。
因為佢係朝彥最細個仔，本身佢係要降做華族，但明治天皇睇起佢，為咗唔畀佢降為華族，所以就將第九個女泰宮聰子內親王同稔彥訂婚[3]。1906年，稔彥獲賜宮號「東久邇宮」，同年加入陸軍。佢1908年畢業於陸軍士官學校，六年之後畢業於陸軍大學校[4]。1915年，佢正式同聰子內親王結婚[5][2]。
1920年，佢以假名「東伯爵」去法國聖西爾軍校留學，畢業之後到巴黎綜合理工學院進修政治同外交[6]。佢認為法國比日本自由好多，好中意留響法國，又同唔少名人見面，例如莫內、克列孟梭、約瑟夫‧霞飛同埋菲臘‧貝當，成日揸車四圍去玩，並且沉迷同二奶玩樂[1]。1923年3月尾左右，當時同樣響法國留學嘅表哥成久王邀請稔彥王開車出去玩，稔彥王深知成久王嘅揸車技術去到邊，於是勸成久王唔好掉以輕心，但成久王冇理會到稔彥王對佢嘅忠告，反而轉為邀請稔彥王嘅八哥鳩彥王一齊出去玩，結果4月1號就響巴黎郊區發生車禍，成久王同佢嘅助手傷重死亡，而同行嘅六哥鳩彥王就受到重傷[6][7]。呢件事對稔彥王帶嚟一定嘅沖擊[6]。
稔彥王響法國留學時有過一段趣事[8]︰有一日佢行緊街，見到一位算命嘅老婆婆，佢上前請老婆婆幫佢算命，並且自稱係一位畫家。老婆婆髓即就話：「你（稔彥王）講大話。你會成為日本首相。」稔彥王聽後笑住咁承認自己係一位軍官兼皇室成員，但同時又好奇地問個位老婆婆︰「但係響日本，皇族照慣例係唔可能做政治人。我有乜可能做首相呢？」老婆婆答︰「日本將來會發生革命或者大混亂，你係會做首相架。」
其實大正天皇一直希望稔彥王可以早啲返嚟日本，而當時留響日本嘅聰子表示唔想稔彥王再留響法國，但稔彥王唔想返思想較為傳統嘅日本，而且佢唔中意奉行權威主義嘅大正天皇，結果就同大正天皇不和[9]。聰子好嬲，甚至同稔彥王嘅隨從寫咗一封信，指責稔彥王「令佢（聰子）顏臉掃地」[9]。最後等到1926年、即大正天皇死咗兩年後，當時正響英國留學嘅表哥輝久王直接到巴黎同稔彥王見面，最終迫使稔彥王返日本[10]。返嚟日本後，因為受到法國自由主義影響，所以佢成為當時思想最開放嘅皇室成員，同時見到日本工業咁落後，好唔甘心，所以後嚟開咗興亞工業大學（即依家嘅千葉工業大學）[11]。
軍人生涯[編輯]
1926年（即係佢留學回國嗰年），佢正式參軍，先後就任近衛步兵第三連隊長、第二師團長、第四師團長同埋陸軍航空本部長[5]。佢一直提議改革日軍，想日軍變得更現代化。
1937年爆發中日戰爭，佢去中國華北地區做第二軍司令官，其中曾經帶頭發動武漢會戰[9]。跟據歷史學家吉見義明嘅研究，稔彥王曾經響1938年8月授權對中國人用毒氣，並且啟動人體試驗計劃，出埋建議、錢、人手同設備，仲響巡視滿洲國期間親身去睇軍醫進行嘅人體試驗[12]。佢響1939年升上做陸軍大將。1940年，因為響中日戰爭入面表現好好，所以獲勳功一級金鷂勳章[3]。
1941年，稔彥王去見昭和天皇，期間提到：「杉山元總長依家又去攻打法屬印度支那，呢個舉動係對每個國家都有唔好嘅影響，仲令到日本嘅國際關係好差。何況打咗佢之後唔單止一啲好處都冇，仲要畀英、美兩國凍結我哋嘅資產，對日本好不利，特別係對我哋陸軍。」點知昭和天皇話自己好無辜，仲鬧稔彥王唔可以違反君主立憲制[13]。同年十月，近衛內閣正式總辭，近衛文麿認為稔彥王作為陸軍大將，又係和平派，加上有皇族光環支持，可以有效地壓制杉山元、東條英機同武藤彰等帶頭嘅親戰派，於是提名稔彥王為下一任首相[13]。由於稔彥屬於和平派，主張避免同美國正面交鋒，內大臣木戶幸一反對稔彥王嘅主張，加上昭和天皇同木戶幸一都唔想身為皇族嘅稔彥王負上任何戰爭責任，所以最後木戶改為提名親戰派嘅東條英機做下任首相[14]。木戶幸一後嚟表示，比起首相，佢認為稔彥王更適合出任陸軍參謀長[14]。
因為支持中日和平法，所以響太平洋戰爭期間稔彥王越嚟越擔心日本響國際上嘅地位[9]。同年12月，佢就任防衛總司令官[3]。響之後嘅時間入面，佢一直反對日軍四圍打，並且反對日軍對同盟國開戰，對親戰派嘅東條英機十分不滿，甚至聯同高松宮宣仁親王密謀恁冧東條內閣，最終響1944年東條改組內閣時聯同其他政壇元老拒絕東條嘅入閣邀請，東條響各方嘅壓迫下被迫響7月18號內閤總請辭[15]。1945年，佢兼任軍事參議官，但同年5月發生東京大轟炸，東久邇宮官邸畀人炸咗[3]。跟據SCAP嘅調查顯示，稔彥王為咗日本和平，打算響戰爭就快結束個時恁冧昭和天皇，扶持皇太子明仁親王上位，而自己就擔任攝政，但最終計劃並冇實現[15]。
政治生涯[編輯]
1945年7月，波茨坦公告正式生效，三日之後稔彥王獲得提名做下任首相。原本佢想唔做首相，但係因為昭和天皇極力挽留，所以佢最後接受提名[3]。據說，昭和天皇認為「皇族內閣」有機會可以真正地結束戰爭，加上稔彥王留過學、又係陸軍大將，因此天皇極力挽留稔彥王[16][17]。因為麥克阿瑟要求派出一位可以代表日本政府嘅聯絡官前往馬尼拉談判，稔彥王認為靠住自己嘅陸軍上將頭銜起碼可以控制到陸軍，所以佢打算先穩住國內局勢，局勢一穩定就辭職[8]。為咗畀駐日盟軍總司令一個信心[8]，稔彥王好快就組成內閣，其中國務大臣由前任首相近衛文麿做、外務大臣係重光葵、內閣官房長官係緒方竹虎、外相係吉田茂，海軍大臣係米內光政。而陸軍大臣一位開頭由稔彥王兼任，後嚟就畀咗下村定。而佢又多咗個尊稱，叫「東久邇總理大臣宮」[2]。稔彥王係開明派，為咗接納更多人嘅意見，佢一上台就宣佈人民如果有意見都可以直接寫信畀佢[16]。
原先稔彥王應駐日盟軍總司令要求，準備投降，但係日軍都仲未肯投降。最後稔彥王使團去外國打仗嘅軍隊講清楚，先至可以解除武裝[8]。之後盟軍開始佔領同埋控制日本[9]。響昭和天皇發玉音發送之後十八日，日軍去東京灣到簽投降書[18]。
同月，支持和平嘅基督教徙賀川豐彥去首相府見稔彥王，批評戰後嘅日本道德倫理好差，當正外地人係仇人，令到世界唔和平，希望政府可以一齊幫手改善。同時之間，日本基督教團主事木俣敏都話日本要早啲改善呢個問題，為咗令國民反省，佢提議搞個「一億總懺悔運動」，賀川聽到之後大力支持。稔彥王一開始聽到嗰陣都好驚訝，但後尾佢諗咗下，就支持咗呢個運動[19]。
第二日，稔彥王舉行「重建日本方針」記者會，宣佈咗「一億總懺悔運動」，要求「官、軍、民」一齊徹底反省，話呢個係重建日本嘅第一步，佢響記者會上話[20]︰
「我認為，國民道德嘅低落，係戰敗原因之一。換言之，軍、官係半公開嘅狀態，而民眾就偷偷地行動。當然，他們之所以係咁，係因為唔了解政府政策同埋國民道義嘅衰落。呢個時候，我哋一眾軍、官、民必須徹底懺悔反省。我相信，一億人總懺悔係日本重建嘅第一步，亦係國內團結嘅第一步。」---翻譯自稔彥王響「重建日本方針」記者會上嘅發言
9月5號，佢去咗國會發表講話，表示「全民都有錯」，同月18號見外國記者[21]。呢個運動響國內有好多反對聲音，因為咁樣一嚟等於承認日本侵華係事實，二嚟咁樣變相係將侵華責任由政府轉嫁到平民身上[22]，研究家大熊信行更響月刊《思索》上刊登名為《戦争体験としての国家》嘅文章，批評呢場運動：「如果我地要從內心深處嚟批判日華戰爭，咁我地必須要正視所有響戰爭時期嘅事實（就好似官僚特權、派系主義、觀念主義等）....所謂批判精神，不單止要直面批判嘅對象，同時都要睇下自己，如果唔係，批判精神就會失去作用同意義……」[20]加上稔彥王又主張「國體護持」，努力維持天皇體制，被認為係要求國民為戰敗向天皇懺悔[23]，引起巨大反彈，最後就連駐日盟軍總司令都反對嘅情況下，呢場運動搞唔成，但日本國內有少部份人承認咗[21]。
另一方面，駐日盟軍總司令已安排好遠東國際軍事法庭去審判一啲日本軍人，同月12號正式開始[24]。
「一億總懺悔運動」失敗之後，又傳出要昭和天皇退位。其中外務官田尻愛義同稔彥講，話昭和天皇退位先至有利去重建日本，而以高松宮宣仁親王為首嘅皇室、唔少嘅政府人員都支持，甚至傳出昭和天皇自己都有諗過咁做[25]。最後麥克阿瑟就出嚟解畫，話：「如果昭和天皇退位會大大影響日本，甚至會令到國內影勢動盪」，咁先至平息呢件事[26]。
稔彥王一直希望可以重建日本，另外佢仲想放咗嗰班因為二戰而畀遠東國際軍事法庭判監嘅人，同埋修憲實行選舉法，令到日本更自由。但係佢一次又一次嘅行動都畀駐日盟軍總司令反對，令到兩者矛盾加深。同年10月4號，駐日盟軍總司令撤消咗好多官職，其中有陸軍大臣、海軍大臣、特別高等警察同埋內務大臣以下嘅所有官職。稔彥王覺得唔合理，就去同盟軍總司令傾，但係最後傾唔成。再加埋之前嘅事，令到稔彥王唔再信從盟軍總司令，為咗表示抗議，所以佢選擇內閣集體辭職。同月9號佢正式總辭[27][9]。
皇籍脫離前後[編輯]
辭職之後，稔彥王宣佈願意為日本戰敗負上責任，希望臣籍降下（即皇籍脫離嘅前名），而之後閑院宮春仁王聯同賀陽宮恆憲王都話支持咁做[9]。1946年2月，稔彥王公開表示好多皇室成員支持昭和天皇退位，並且提出扶持皇太子明仁親王上位，由高松親王宣仁親王擔任攝政直至太子成年，佢又指出響政府之中只有首相幣原喜重郎同內務大臣松平慶民反對呢個提議[28]。3月4號，稔彥王接受美聯社嘅採訪，表示他已經向昭和天皇提出可能嘅退位日期[29]。5月，佢辭職唔做貴族院議員，同年接受公職追放（指要求啲人唔要依家嘅職位，1952年解除）[9]。但昭和天皇由始至終都未有退位。
1947年，稔彥王帶埋一家大細，同另外十個宮家一齊皇籍脫離，改名叫東久邇稔彥[3][30]。但係脫離咗皇籍之後，稔彥王過得並唔好。開頭佢響新宿開咗間黑市食品鋪，後嚟又開咗間喫茶鋪（喫茶，即係中國嘅吃茶，而日本嘅喫茶鋪會賣咖啡、紅茶同埋和菓子），又賣一啲自己以前一直珍藏嘅古董。佢話，以前一直高高在上，完全感受唔到平民嘅生活，而依家佢雖然係窮，但過得好充實[1]。
1948年，佢同尾崎行雄、賀川豐彥、下中彌三郎同埋湯川秀樹五個人開咗世界連邦建設同盟（即依家嘅世界連邦運動協會）。兩年之後，佢創立新興宗教「東國教」[17]。同年6月，法務府要求稔彥改過第二個名，所以稔彥將教改名叫「平和教」，但係平和教因為冇太多人承認而解散[2][31]。同年佢加入共濟會[32]。
1960年，日本爆發安保鬥爭，而稔彥聯同前首相石橋湛山、片山哲去信畀時任首相岸信介，要求佢停止打壓運動。1969年，大仔盛厚死咗。1971年，棧勝正創辦日本文化振興會，而稔彥就獲得棧勝正嘅邀請，成為日本文化振興會第一任總裁[33]。
1990年1月20號，稔彥響澀谷區廣尾日本紅十字社會醫療中心死咗，終年102歲，係全世界最長命嘅元首（其次係荷蘭前首相威廉德雷斯，第三係中曾根康弘），所以畀列入健力士世界紀錄。之後佢畀人追封功一級，死咗六日之後佢落葬響豐島岡墓地[34]。
本身佢係1947年皇籍脫離嘅人入面最長命嗰個，而呢個紀錄響2014年畀東伏見宮嘅東伏見慈洽打破（東伏見慈洽終年103歲，畀稔彥長命一歲）[35]。
影響[編輯]
東久邇內閣雖然短命，但佢係帶住日本順利投降嘅重要人物。佢任內最大嘅政職，就係簽咗投降書、解除日軍武裝、同埋確保GHQ順利入駐日本[16]。
由於1947年改制嘅情況下，好多皇室成員冇咗皇籍，所以稔彥係唯一一個曾經做過日本最高話事人嘅皇室成員，所以有返咁上下影響力。另外，佢係當時咁多個最近當代天皇血統嘅宮家（稔彥本身就娶咗明治天皇第九個女聰子，而大仔盛厚娶咗昭和天皇大女成子），而依家皇室又淨返一個男性後人悠仁，所以依家有唔少人要求將個啲宮家復籍，而其中呼聲最高嘅就係東久邇宮[36]。
屋企[編輯]
老豆：久邇宮朝彥親王
兄弟：（早死） - 邦憲王 - 邦彥王 - 守正王 - 多嘉王 - 暢王 - （早死） - 鳩彥王 - 稔彥王
老婆：泰宮聰子內親王
| 名 | 未皇籍脫離之前個名 | 出世日期 | 死亡日期 | 配偶 | 仔女 | |
|---|---|---|---|---|---|---|
| 大仔 | 東久邇盛厚 | 盛厚王 | 1916年5月1號 | 1969年2月1號 | 東久邇成子 | 東久邇信彥 高木文子 壬生基博（即東久邇秀彥） 東久邇真彥 東優子 |
| 二仔 | 師正王 | N/A | 1917年11月3號 | 1923年9月1號 （死於關東地震） |
冇 | 冇 |
| 三仔 | 粟田彰常 | 彰常王 | 1920年5月13號 | 2006年8月30號 | 畠中久江 | 粟田常一 粟田彰彥 |
| 細仔 | 多羅間俊彥 | 俊彥王 | 1929年3月24號 | 2015年4月15號 | 多羅間勝子 | 多羅間稔彥 |
系譜[編輯]
| 閑院宮系圖 | 後土御門天皇系 | 伏見宮系圖 | |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
| 典仁 | 後桃園天皇 | 貞行 | 邦忠 | 邦賴 | |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
| 美仁 | 光格天皇 | 貞敬 | |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
| 孝仁 | 仁孝天皇 | 邦家 | 守脩 | ||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
| 愛仁 | 孝明天皇 | 晃 | 朝彥 | 貞教 | 彰仁 | 能久 | 博經 | 智成 | 貞愛 | 載仁 | 依仁 | 周子 皇籍脫離 | |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
| 明治天皇 | 菊麿 | 邦憲 | 邦彥 | 守正 皇籍脫離 | 鳩彥 皇籍脫離 | 稔彥 皇籍脫離 | 恆久 | 成久 | 博厚 | 博恭 | 春仁 皇籍脫離 | ||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
| 大正天皇 | 武彥 皇籍脫離 | 恆憲 皇籍脫離 | 朝融 皇籍脫離 | 恆德 皇籍脫離 | 永久 | 博義 | 博忠 | ||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
| 昭和天皇 | 雍仁 | 宣仁 | 崇仁 | 道久 皇籍脫離 | 博明 皇籍脫離 | ||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
| 明仁 平成天皇 | 正仁 | 寬仁 | 宜仁 | 憲仁 | |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
| 德仁 今上天皇 | 文仁 | ||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
| 悠仁 | |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
自傳[編輯]
攷[編輯]
- ↑ 1.0 1.1 1.2 1.3 1.4 〈皇族軍人伝記集成 第11巻 東久邇宮稔彦王 東久邇日記 日本激動期の秘録（東久邇稔彦著 1968年） やんちゃ孤独（東久邇稔彦著 1955年） - ゆまに書房〉. www.yumani.co.jp. 喺2020-10-08搵到.
- ↑ 2.0 2.1 2.2 2.3 日本国語大辞典, ブリタニカ国際大百科事典 小項目事典,デジタル大辞泉,百科事典マイペディア,デジタル版 日本人名大辞典+Plus,世界大百科事典 第２版,日本大百科全書(ニッポニカ),精選版. 〈東久邇稔彦とは〉. 《コトバンク》 (日文). 喺2020-10-08搵到.
- ↑ 3.0 3.1 3.2 3.3 3.4 3.5 〈『親王・諸王略傳』 稔［稔彦］〉. nss.o.oo7.jp. 喺2020-10-08搵到.
- ↑ "Promotions l'ESG - de 1 à 107". www.ecole-superieure-de-guerre.fr. 喺2023-06-21搵到.
- ↑ 5.0 5.1 〈ひがしくにのみやなるひこおう【東久邇宮稔彦王】 | ひ | 辞典〉. 《学研キッズネット》 (日文). 喺2020-10-08搵到.
- ↑ 6.0 6.1 6.2 文春圖書館. 〈「御徴行」とあって皇子ではな〉 (PDF).
{{cite web}}: CS1 maint: url-status (link) - ↑ 〈北白川宮成久王〉. 《minnashinda ページ！》 (日文). 喺2023-06-21搵到.
- ↑ 8.0 8.1 8.2 8.3 〈帝國落日無條件投降 - D1 兩岸史話 - 20150817 - 旺報〉. 《工商時報》 (特威文). 喺2023-06-21搵到.
- ↑ 9.0 9.1 9.2 9.3 9.4 9.5 9.6 9.7 鳥海靖. 《歴代内閣・首相事典》. 吉川弘文館.
- ↑ Kashima, Shigeru, 1949-; 鹿島茂, 1949- (2006). Sepia-iro no kōzoku arubamu : miyake no jidai. Tōkyō: Asahi Shinbunsha. ISBN 4-02-250226-6. OCLC 74816431.
{{cite book}}: CS1 maint: multiple names: 作者名單 (link) - ↑ 〈トピックス〉. web.archive.org. 2019-06-20. 歸檔時間2019-06-20. 喺2020-10-08搵到.
{{cite web}}: CS1 maint: bot: original URL status unknown (link) - ↑ "Emperor Hirohito on Localized Aggression in China" (PDF).
{{cite web}}: CS1 maint: url-status (link) - ↑ 13.0 13.1 Peter Wetzler. Hirohito and War. p. 48.
- ↑ 14.0 14.1 Peter Wetzler. Hirohito and War. p. 118.
- ↑ 15.0 15.1 "National Archives NextGen Catalog". catalog.archives.gov. 原著喺2023-06-21歸檔. 喺2023-06-21搵到.
- ↑ 16.0 16.1 16.2 自由時報電子報 (2019-04-13). 〈政治的日常》百廢待舉的戰後：超短命的東久邇宮稔彥內閣 - 自由評論網〉. 《自由時報電子報》. 喺2022-02-06搵到.
- ↑ 17.0 17.1 〈皇位繼承中備受矚目的「舊宮家」（下）：戰後仍與皇室藕斷絲連〉. Yahoo News (中文). 2022-09-26. 喺2023-06-21搵到.
- ↑ 〈敗戦国日本･無条件降伏〉. chusan.info. 原著喺2021-02-16歸檔. 喺2020-10-22搵到.
- ↑ 〈社会的弱者の友として―賀川豊彦の生涯（１３）国民総ざんげ運動〉. 《クリスチャントゥデイ》 (日文). 2016-07-04. 喺2020-10-11搵到.
- ↑ 20.0 20.1 〈邱振瑞 - 【日晷之南】全民懺悔論與政治修辭學——東久邇稔彦内閣 - 想想Thinking Taiwan - 想想台灣，想想未來〉. 《想想論壇》 (繁體中文). 喺2023-06-21搵到.
- ↑ 21.0 21.1 〈2014年03月11日 - ＦＫ元弁護士の雑記帳〉. tofuka01.blog.fc2.com. 喺2020-10-16搵到.
- ↑ 〈曠野雜誌160期〉. www.cap.org.tw. 喺2023-06-21搵到.
- ↑ 日暮吉延. 《東京審判》.
- ↑ 《新聞と戦争 写真を処分せよ》. 朝日新聞. 2007年.
- ↑ 田尻愛義 (1977年). 《田尻愛義回想録：半生を賭けた中国外交の記録》.
- ↑ 木戶幸一 (1966年). 《木戶日記》.
- ↑ 今西光男. 《占領期の朝日新聞と戦争責任 村山長挙と緒方竹虎》. 朝日新聞社.
- ↑ Bix, Herbert P. "Inventing the "Symbol Monarchy" in Japan, 1945-52".
{{cite web}}: CS1 maint: url-status (link) - ↑ "PRINCE SUGGESTED THAT HIROHITO QUIT; Higashi-Kuni Says He Gave Emperor Three Suitable Times for Abdication Considered Abdication Admiral Ueda Released". The New York Times (英文). 喺2023-06-21搵到.
{{cite news}}: CS1 maint: url-status (link) - ↑ 凌俊賢 (2019-03-21). 〈日本裕仁天皇之孫 74歲東久邇信彦逝世〉. 《香港01》 (香港中文). 喺2020-10-22搵到.
- ↑ MAGAZINE, P+D (2018-06-22). 〈【池上彰と学ぶ日本の総理SELECT】総理のプロフィール | P+D MAGAZINE〉. pdmagazine.jp (日文). 原著喺2020-10-17歸檔. 喺2020-10-17搵到.
- ↑ "International Conference on the History of Freemasonry | Freemasonry | Masonic Lodge". Scribd (英文). 喺2020-10-17搵到.
- ↑ 〈日本文化振興会とは？ - 一般社団法人日本文化振興会〉. www.nihonbunka.jp. 喺2020-10-18搵到.
- ↑ 〈知的巨人たちの百歳学（143）世界の総理大臣、首相経験者の最長寿者としてギネスブックに登録された昭和天皇の叔父の東久邇稔彦(102歳) | 前坂俊之オフィシャルウェブサイト〉. web.archive.org. 2019-11-29. 歸檔時間2019-11-29. 喺2020-10-18搵到.
{{cite web}}: CS1 maint: bot: original URL status unknown (link) - ↑ 〈天皇陛下の叔父、東伏見慈洽氏が死去 103歳〉. 《日本経済新聞 電子版》 (日文). 喺2020-10-18搵到.
- ↑ 〈NHKが旧宮家に皇族復帰の希望を書面で回答要求〉. 《アゴラ 言論プラットフォーム》 (日文). 喺2020-10-22搵到.
拎[編輯]
| 上一任 鈴木貫太郎 |
日本首相 1945年8月 - 1945年10月 |
下一任 幣原喜重郎 |
| 上一任 阿南惟幾 |
日本陸軍大臣 做首相嗰陣兼任 |
下一任 下村定 |
| 上一任 （新起） |
東久邇宮當主 1906年 - 1947年 |
下一任 （皇籍脫離） |
| 上一任 （初代） |
東久邇家當主 1947年 - 1990年 |
下一任 東久邇信彥 |