久邇宮朝彥親王
久邇宮朝彥親王（日文：久邇宮朝彦親王，くにのみや あさひこしんのう，1824年3月27號—1891年10月25號）係久邇宮初代當主，同時係政治人，邦家親王第四個仔、香淳皇后個爺爺、今上天皇德仁嘅高祖父。因為佢成日同歷史上唔少名人撞名，為咗避諱，所以好多人會叫個舊宮號，即中川宮朝彥親王，或者直接叫中川宮。
經歷
[編輯]幕府時期
[編輯]朝彥親王1824年響京都出世，老豆係邦家親王，而阿媽係鳥居小路信子。
1836年，佢成為仁孝天皇個契仔，第二年親王宣下，改名叫成憲。1838年，佢正式出家，但因為同先前一個天皇撞名，所以改叫尊応。之後佢入奈良興福寺做和尚，同時兼任一乗院門主。1852年，佢升任為青蓮院門跡第四十七代門主，但因為又同青蓮院一個和尚撞名，改名叫尊融。因為青蓮院前面有個地方叫栗田口，所以佢又叫栗田宮尊融入道親王。之後佢升做第228任天台座主。
佢一直反對日美修好通商條約，又支持由慶喜接任幕府大將軍一位，所以同支持由家茂接任嘅大老（大老係舊日本時代一個官位）井伊直弼響度作對。1859年爆發安政之大獄，直弼宣佈由家茂接任幕府大將軍一位，同佢一直作對嘅朝彥就畀人拉入監獄，撤消佢青蓮院門跡個銜頭，改叫佢做獅子王院。
但係第二年爆發櫻田事件（全名櫻田門外事變），直弼畀人暗殺身亡，所以尊融響1862年恢復和尚身份，同年就任國事御用掛，第二年跟隨大佬晃親王返嚟皇室，獲賜宮號中川宮。同時間係由尊王攘夷派控制朝廷，孝明天皇雖然好唔鍾意佢哋，但都冇佢符。而朝彥就同大佬晃一樣，屬於公武合體派，對於尊王攘夷派好反感。正因為咁，佢成日畀尊王攘夷派批評。
期間佢同公武合體派領頭人之一松平容保好熟，所以好想一齊搞衰薩摩藩，而當時嘅德川幕府又響度唱衰薩摩藩，所以孝明天皇響受影響之下就搞咗一場政變（即八月十八日政變），撤底搞衰尊王攘夷派（因為孝明天皇將好多藩一齊搞跨）。同年尊融升為親王，之後因避諱而改名叫朝彥，跟住升為二品彈正尹，所以佢畀人起花名「尹宮」。另一方面，因為佢係公武合體派忠臣，又畀孝明天皇睇起，所以尊王攘夷派殘餘勢力好憎佢，叫佢做「陰謀宮」。
1864年，屬於尊王攘夷派嘅藩士河田景與計劃放火燒朝彥個屋企，之後河田轄下一個志士古高俊太郎買上好多兵器，但路上發生意外，古高響池田屋畀兵器炸死，呢件事後嚟畀人叫「池田屋事件」。
之後朝彥改宮號為賀陽宮，而俸碌有1500石。之後曾經兩次攻打長州藩但都失敗，同時德川家茂又病死，所以佢同長州藩和好。同年12月明治天皇繼位，朝彥響宮中嘅勢力大減。1867年，好多尊王攘夷派人士都復咗職。1868年，時任幕府將軍慶喜爆朝彥想出兵打廣島藩，所以朝彥響第二年畀人禁響安藝國。
晚年
[編輯]
1870年，政府下令護送佢去伏見宮，正式返嚟皇室。佢諗過之後，決定加入伏見宮。1875年5月，佢將中川宮改為久邇宮，成為新一代當主，同年7月就任伊勢神宮祭主。之後佢創立皇學館大學。
1883年，久邇宮畀人列為二代皇族，1889年成立舊皇室典範，所以久邇宮畀人列入永久皇族（即冇咩嘢大事下都唔會撤消佢個皇室身份）。
1891年，朝彥因潰瘍性結腸炎而死，終年六十七歲。
屋企
[編輯]- 妾侍泉亭靜枝子
- 妾侍泉萬喜子
- 大女：榮子
- 二女：安喜子
- 四女：飛呂子
- 五女：絢子
- 三仔：久邇宮邦彥王
- 六女：素子
- 七女：懷子
- 八女：篶子
- 九女夭折
- 妾侍原田光枝子
- 四仔：梨本宮守正王
- 妾侍寺尾宇多子
- 三女：純子
- 細仔：東久邇宮稔彥王
- 妾侍角田須賀子
- 八仔：朝香宮鳩彥王
| 上一任 （新起） |
久邇宮 1875年 - 1891年 |
下一任 久邇宮邦彥王 |
| 上一任 教仁法親王 |
天台座主 1852年 - 1859~1860年 |
下一任 昌仁法親王 |