香淳皇后

出自維基百科,自由嘅百科全書
跳去導覽 跳去搵嘢
Empress Kojun 1941-face.jpg

香淳皇后(日文:香淳皇后こうじゅん こうごう Kōjun Kōgō1903年3月6號2000年6月16號)係昭和天皇老婆、上皇明仁阿媽,原名良子(日文:良子ながこ Nagako),老豆係久邇宮邦彥王。響未同昭和天皇結婚之前,尊稱久邇宮良子女王

經歷[編輯]

早年[編輯]

7歲嗰時嘅良子女王

響1903年,良子出世,係邦彥王第一個女。響1907年9月2號,良子入讀學習院女學部幼稚園,同佢同一學堂嘅有當時嘅迪宮裕仁親王(即後嚟嘅昭和天皇)同埋淳宮雍仁親王(即後嚟嘅秩父宮雍仁親王)。

響1909年,良子入讀學習院女學部小學科,響1915年升讀學習院女學部中學科。

響1918年,佢獲選為裕仁親王嘅未來老婆,之所以會揀佢係因為貞明皇后(裕仁個阿媽)覺得良子嘅性格幾啱做皇后,加上良子又係久邇宮邦彥王個女,離當代天皇血緣好近,裕仁娶良子就係親上加親(當時日本皇室近親結婚係一啲都唔出奇,因為佢哋話要保持純皇室血統)。之後香淳皇后隨即退學,同年4月響久邇宮邸開始接受教育,教佢點做一個太子妃。佢兩個細妹信子智子都一齊跟住學。

響1920年,裕仁畀正式立為皇太子,同年六月約定將會舉行婚禮,但係期間發生「宮中某重大事件」,元老山縣有朋話良子嘅媽媽俔子個家族有遺傳色盲(另外大佬朝融王同埋細佬邦英王都有遺傳色盲),懷疑良子都有色盲,所以要求取消婚約,之後宮內省表示唔會變更太子妃人選。1922年,良子獲勳為一等寶冠章。

皇太子妃時代[編輯]

啱啱結完婚嘅裕仁同良子

佢哋嘅婚禮本來定響1923年9月1號搞,但因為關東大地震而延至1924年1月26號先至搞。結婚之後,佢哋搬去赤坂東宮御所到住。

響第二年12月,佢哋第一個女成子(即後嚟嘅東久邇成子)出世。

皇后時代[編輯]

1926年,大正天皇嘉仁死咗,老公裕仁繼位,改元昭和,而裕仁阿媽貞明皇后宣佈將會攝政,於是良子由皇太子妃升上皇后。

1927年,二女祐子出世,但響第二年因為敗血症而死亡,香淳皇后好傷心。同年,裕仁嘅登基大典正式開始搞。

響1929年,佢同昭和天皇搬去宮城到住,同年三女和子(即後嚟嘅鷹司和子)出世,兩年後第四個女厚子(即後嚟嘅池田厚子)出世。嗰時,因為香淳皇后生咗四個細路都係女仔,而要做天皇嘅繼承人必需係男仔,所以有好多貴族開始要求昭和天皇實行「一夫多妻制」,而另外有好多軍人要求昭和天皇立佢個二細佬秩父宮雍仁親王為儲君。昭和天皇為呢件事煩咗好耐,最後佢決定拒絕所有方案。

香淳皇后抱住得幾個月大嘅明仁親王

響1933年,萬眾期待嘅事終於出現---昭和天皇同香淳皇后第一個仔明仁親王出世。北原白秋同埋中山晉平仲作咗一首歌,叫「皇太子さまお生まれなつた」,響宮城前有好多人唱呢首歌。因為明仁出世,之前好多方案都不了了之,而最受影響係秩父宮雍仁親王,雍仁因為呢件事而地位開始下滑。

另一方面,三個女(成子、和子同埋厚子)同時升讀學習院小學校之後,隨即入住「吳竹寮」,預備呢三個女第日會嫁畀人。

響1935年,第二個仔正仁親王出世,同時大仔明仁搬離宮城,同父母分開住(以前日本皇室規定,當天皇個仔滿兩歲時,就會同父母分開住)。明仁臨走之前,香淳皇后仲整咗豆腐餐畀明仁食。

響1939年,細女貴子(即後嚟嘅島津貴子)出世。

響1943年,大女成子嫁畀東久邇宮稔彥王個大仔盛厚王

二戰期間,香淳皇后經常同老公昭和天皇分憂。同時,因為打仗,好多日本市民冇飯食(大女成子就係因為咁而早死),於是皇室將啲食物,一碗一碗咁分畀市民,響二戰後期,香淳皇后仲響吹上御苑入面種菜同埋養,畀啲市民食。

響1945年,大女成子生咗第一個外孫信彥王(即後嚟嘅東久邇信彥)。

1956年嘅香淳皇后

二戰之後,皇室冇嗮權力,於是香淳皇后開始親近民眾,而仔女嘅配偶對象開始唔再限於貴族或者皇室成員,大仔明仁就係其中最出眾個嗰。響1957年,明仁響輕井澤嘅網球場上面識咗生意人正田英三郎個大女正田美智子,之後明仁開始追美智子,爾件事響當時嘅日本係好少見。香淳皇后知道之後好嬲,因為佢原先內定咗明仁嘅未來老婆係松平信子(松平信子係雍仁親王妃勢津子嘅親戚),但明仁一再強求,1958年仲同美智子求婚,香淳皇后冇計,唯有同意[1]。明仁同美智子喺1959年正式結婚。

響1960年,大女東久邇成子(嗰時成子已經唔再係皇室成員)發病,第二年診斷為結腸粘連同埋腹壁腫瘤,4月畀人送去醫院。香淳皇后知道之後,日日都去探成子。但係成子最後都係醫唔返,響1961年7月去世,終年35歲。成子嘅死對香淳皇后帶嚟好大打撃,香淳皇后仲試過響度喊。同時之間,第一皇孫德仁出世。

福特同第一夫人迎接到訪嘅昭和天皇夫婦,當中最左手面嘅就係香淳皇后

響1971年,昭和天皇國事訪問其他國家,香淳皇后陪同一齊去,呢次係香淳皇后第一次出外國,但係香淳皇后多數都留響布魯塞爾到玩。

響1973年,長外孫東久邇信彥(嗰時信彥已經唔再係皇室成員)生咗大仔征彥,為第一曾外孫。

響1976年,香淳皇后身體開始出現問題,第二年佢響屋企入面跌親,送到醫院之後證實腰椎骨折。醫生話香淳皇后想完全好返係冇可能,所以香淳皇后開始接受治療。但係同時之間,香淳皇后認知力開始下降,就連行路都唔再好似以前咁,後嚟仲要攞枴杖先至得。

由於身體越嚟越差,所以香淳皇后漸漸少咗出席公開活動。佢最後一次出席公開活動係響1986年嘅天長節(即慶祝天皇生日),之後就連「天皇陛下在位六十年記念大典」都冇出席。同年9月尾,佢畀人影到坐輪椅去散步。

皇太后時代[編輯]

響1989年1月7號,老公昭和天皇駕崩,臨死前香淳皇后同埋另外四個仔女(分別係三女和子、四女厚子、大仔明仁、二仔正仁同埋細女貴子)都一直響裕仁身邊。同年2月,昭和天皇嘅大喪之禮(即天皇嘅喪禮)正式舉行,而正仁親王妃華子代表香淳皇后出席大喪之禮。同一日,大仔明仁登基,第二日即刻定年號為平成,而香淳皇后升上做皇太后,而美智子升上做皇后。同年5月,三女和子過身。

之後,香淳皇后證實患上認知障礙症,就連散步嘅次數都減少咗。響1996年,香淳皇后93歲,超越後冷泉天皇嘅皇后藤原寬子,成為日本史上最長命嘅皇后。

武蔵野東陵

響2000年,佢證實呼吸系統有問題,因而入院治療。同年6月16號,香淳皇后因為呼吸衰竭而響大宮御所度過身,終年97歲。

響同年7月10號,大仔明仁天皇追封佢做「香淳皇后」,呢個名靈感嚟自《懷風藻》(日文:懐風藻かいふうそう kaifusou,響公元751年寫,係日本現存最古老嘅漢詩集)。因為佢嘅畫號叫「桃苑」(出自《懷風藻》),所以「香」就嚟自「花舒桃苑,草秀蘭筵新」呢句(出自安倍廣庭嘅「春日侍宴」),而「淳」就嚟自「四海既無為,九域正清」呢句(出自山前王嘅「侍宴」)。

響7月25號,香淳皇后嘅斂葬之儀(即皇族嘅喪禮)正式舉行,喪主係大仔明仁天皇。而佢就葬響東京都八王子市長房町嘅武蔵野東陵。

相集[編輯]

勳章[編輯]

日本國內[編輯]

  • 一等寶冠章(即寶冠大綬章)
  • 一等瑞寶章(即瑞寶大綬章)

國外[編輯]

屋企[編輯]

老豆:久邇宮邦彥王

阿媽:島津俔子

兄弟姐妹:大佬朝融王---二佬邦久王---二妹信子女王---三妹智子女王---細佬邦英王

老公:昭和天皇

仔女[編輯]

香淳皇后同昭和天皇嘅仔女
乳名 出世日期 去世日期 配偶 仔女
大女 東久邇成子 照宮 1925年12月6號 1961年7月 東久邇盛厚 東久邇信彥
高木文子
壬生基博(即東久邇秀彥)
東久邇真彥
東優子(冠夫姓)
二女 祐子 久宮 1927年9月10號 1928年3月8號
三女 鷹司和子 孝宮 1929年9月30號 1989年5月28號 鷹司平通 鷹司尚武(養仔)
四女 池田厚子 順宮 1931年3月7號 池田隆政
五仔(老六) 明仁 繼宮 1933年12月23號 美智子 今上天皇德仁
秋篠宮文仁親王
黑田清子
六仔(老七) 正仁 義宮 1935年11月8號 華子
細女 島津貴子 清宮 1939年3月2號 島津久永 島津禎久

[編輯]

  1. 程佩敏 (2019-04-09). "日皇明仁退位前 結婚60年情不變 皇后美智子形影不離 每朝攜手散步賞櫻". 香港01 (中文). 喺2020-08-20搵到.
上一任
貞明皇后
日本皇后
1926年12月25號 - 1989年1月7號
下一任
美智子