東久邇成子

出自維基百科,自由嘅百科全書
跳去導覽 跳去搵嘢
東久邇成子

東久邇成子(日文:ひがしくに しげこ 、1925年12月6號1961年7月23號)係日本舊皇族,乳名照宮,係昭和天皇香淳皇后第一個細路,佢同時係東久邇盛厚個老婆。響未皇籍脫離之前,尊稱照宮成子內親王盛厚王妃成子

響嫁畀盛厚王嘅時侯,佢嘅尊稱改為盛厚王妃成子。1947年響駐日盟軍總司令指示底下,成子跟住盛厚一齊皇籍脫離,改名叫東久邇成子

經歷[編輯]

早年[編輯]

昭和天皇夫婦推住當時仲係BB嘅成子

1925年響赤坂區東宮御所,成子出世,係昭和天皇同香淳皇后第一個細路。由於佢係長女,仲咁啱響關東大地震之後出世,所以成子嘅出世令到唔少日本人好開心,尤其係好想抱孫嘅貞明皇后[1]

同年12月,皇室決定改佢個名叫成子,乳名照宮,靈感嚟自易經[2]

由於成子係大女,所以昭和天皇同香淳皇后都好緊張佢,仲當面要求親自養大成子(因為當時日本皇室規定,天皇個仔女一滿兩歲就要離開父母)[3]。貞明皇后雖然反對,但睇在昭和天皇份上,就揀咗三個女人做成子嘅奶媽,令到成子可以留響父母身邊[4]

響1926年,爺爺大正天皇駕崩,老豆昭和天皇登基,於是成子由女王升做內親王。同年,當佢響學校飯堂開午飯嘅時候,成子同人講:「だいじなだいじなおもうさまおたあさま」,笑到人碌地[5]

之後,兩個細妹(祐子、和子)先後出世,所以好多人要求將成子搬離宮城,同父母分開住。1930年,成子先入讀女子學習院初等科,跟住老豆昭和天皇命令起吳竹寮,同年年尾成子帶同三妹和子搬去吳竹寮到住[6]

響返學嘅時候,佢用「成子內親王」呢個名,而佢嘅花名係「宮樣」。嗰時嘅成子,係一個好開朗嘅人,運動細胞好好,而佢嘅作文手法仲好叻[7]

響佢升讀學習院中等科之後,佢變得越嚟越活躍,唔單止成績好好,仲成日走去參加校內活動,好似英語歌劇同埋合唱團。另一方面,佢又好有少女心,成日都諗住著軍服(當時女仔好少會著軍服)[8]

皇妃時代[編輯]

響婚禮上面嘅成子同盛厚王

響1941年,老豆昭和天皇揀咗東久邇宮稔彥王大仔盛厚王做成子嘅未來老公[9]。響1943年,成子畢業於學習院中等科,本身佢仲想繼續讀書,但就因為要嫁人而冇得繼續[10]

響決定咗要嫁人之後,成子分別去學彈琴、煮飯、拉小提琴、禮儀同埋和歌[11]。但成子話:「對於要嫁畀盛厚王,我咩嘢感覺都冇。我唔覺得開心,又都唔傷心。希望見面之後,我可以對佢有返啲感覺。」[11]

同年10月2號,成子同盛厚行納采之儀,同月12號成子獲勳為一等寶冠章,第二日就即刻同盛厚王結婚。聽講,成子響婚禮上面着嘅嗰套婚紗係同阿媽香淳皇后當年着嘅婚紗係一模一樣,就連Size都係一樣。之後,當佢幾個細妹(和子、厚子、貴子)出嫁嘅時候,用嘅婚紗一啲都唔似香淳皇后嗰套。可以睇得出,當年昭和天皇兩公婆係好關心成子。

佢哋結婚之後,即刻去咗度蜜月,而成子用咗好耐時間先至可以了解到盛厚王份人。

1945年,日本發生東京大轟炸,盛厚王帶住成子去防空洞避難,而成子響防空洞入面生咗大仔信彥。同年5月,佢哋間屋畀人炸咗,所以一家三口搬去伊香保到住。

同年8月15號,日本戰敗投降,同日老豆昭和天皇向全國人民「玉音放送」。聽下聽下,成子開始喊,明白到發生咩嘢事,於是佢即刻坐車去見父母。

1947年,駐日盟軍總司令要求將一啲離當代天皇血統較遠嘅皇室成員皇籍脫離,東久邇宮都冇法避免。同年10月,東久邇宮全家都皇籍脫離,而成子改名叫東久邇成子

皇籍脫離後[編輯]

1959年嘅成子,當時佢啱落機

皇籍脫離之後,成子一家過得好辛苦。就算成子係昭和天皇個女,都冇特權,一方面佢去搵嘢做,另一方面一直留意住啲食鋪有冇便價嘢買,就算排長龍都要去買,生活同一般師奶冇分別。另外,成子仲響屋企成功養咗一隻海狸鼠

1949年,響日本女作家大橋鎮子要求下,成子投稿去雜誌『美しい暮しの手帖』,而標題係「やりくりの記」。當中,成子響篇文入面寫上一句「やりくり暮しのこの苦労のかげに、はじめて人間らしいしみじみとした、喜びを味う事が出来る 。」(中文大概意思係:「雖然過得好辛苦,但係我覺得幾開心」)呢一句說話響當時日本好大回響,而『美しい暮しの手帖』因為咁而銷量急升。

1958年,成子特別客串電視劇『私の秘密』。當中,成子扮皇室中座。

1959年4月,細佬明仁同第一位平民出身嘅女仔美智子正式舉行婚禮,而成子都有出席。

發病同埋過身[編輯]

1960年11月,成子發病(佢話係胃潰瘍),畀人緊急送去國立東京第一醫院,之後手術成功,響1961年2月出院。但係其實嗰時成子有嘅病並唔係胃潰瘍,而係因結腸粘連同埋腹壁腫瘤而引起嘅末期癌症。

同年4月,成子再一次入院,畀人送去宮內廳醫院,今次佢病得好嚴重。老豆昭和天皇成日嚟探成子,而阿媽香淳皇后仲日日都過嚟。同年5月,老豆昭和天皇諗住搞宴會,希望成子可以出席,但成子嘅主診醫生反對所以作罷。

同年7月19號,成子病情突然轉差,7月22號宣佈病危,因此佢全部屋企人都過嚟見佢最後一面。當中,昭和天皇細細聲咁叫成子個名;香淳皇后就喊得好犀利;大仔信彥拉住成子隻手;而兩個細妹和子、厚子化上死人粧,為成子身後事做好准備。

響1961年7月23號凌晨三點,成子響屋企人陪同下,響宮內廳醫院過身,終年35歲。佢嘅死為昭和天皇兩公婆帶嚟好大打擊。

死後[編輯]

同日凌晨五點,成子嘅遺體送去宮內廳分室,同日朝早七點由美智子個老豆正田英三郎同埋和子嘅老公鷹司平通移送去皇室家,之後隨即響全部皇室成員見證下,舉行入棺材儀式。同月26號,佢嘅遺體響青山葬儀所火葬,同年8月4號舉行斂葬之儀(即皇室成員嘅葬禮),落葬於豐島岡墓地。之後,阿媽香淳皇后命令,要響成子嘅墓地附近種好多紅梅

響成子死咗之後,老公盛厚同寺尾佳子再婚。

[編輯]

屋企[編輯]

老豆:昭和天皇

阿媽:香淳皇后

兄弟姐妹:長細妹祐子---次細妹和子---三細妹厚子---四細佬明仁---五細佬正仁---六細妹貴子

老公:東久邇盛厚

  • 大仔:東久邇信彥
  • 大女:高木文子
  • 二仔:壬生基博(原名東久邇秀彥)
  • 三仔:東久邇真彥
  • 細女:東優子

[編輯]

  1. 東京朝日新聞. 内親王の御体重 おみ大きく拝せらる.
  2. 東京朝日新聞. けふお七夜の佳き日 皇孫御命名の儀.
  3. 読売新聞. 照宮の御養育は妃宮御手づから 御養育係長は置かぬ事に決定.
  4. 陛下、お尋ね申し上げます. 1988.
  5. 皇女照宮期刊. 1973.
  6. 東京朝日新聞. 照宮様の御殿を宮城内へ御造営.
  7. 皇女照宮期刊. 秋元書房. 1973. p. 44.
  8. 皇女照宮. 秋元書房. 1973. p. 105.
  9. 照宮成子内親王殿下 御配偶に東久邇宮盛厚王殿下 御めでたき御内約. 読売新聞.
  10. お慶びの照宮様・盛厚王殿下 拝すも畏し御二方の御日常. 朝日新聞.
  11. 11.0 11.1 皇女照宮. 秋元書房. 1973. p. 132.