木戶幸一

出自維基百科,自由嘅百科全書
木戶幸一
日本 日本第10代內大臣
任期
1940年6月1號ー1945年11月24號
前任湯淺倉平
繼任職位廢除
日本 日本第51代內務大臣
任期
1939年1月5號-1939年8月30號
前任末次信正
繼任小原直
日本 日本第1代厚生大臣
任期
1938年1月11號ー1939年1月5號
繼任廣瀬久忠
日本 日本第48代文部大臣
任期
1937年10月22號ー1938年5月26號
前任安井英二
繼任荒木貞夫
個人資料
出世1889年7月18號
大日本帝國東京府東京市赤坂區(即依家東京都港區)
1977年4月6號(1977-04-06)(87歲)
日本 日本東京都千代田區宮內廳醫院日文宮内庁病院
政黨火曜會
仔女木戶孝澄
木戶孝彥
井上和子
父母木戶孝正(阿爸)
親屬木戶孝允(契阿爺)
兒玉源太郎(外父)
和田小六(細佬)

木戶幸一粵拼muk6 wu6 hang6 jat1日文木戸 幸一きど こういち(Kido Kōichi)1889年7月18號1977年4月6號),日本昭和時期官僚政治人。爵位係侯爵。曾經做過內大臣、文部大臣、厚生大臣同內務大臣,亦係貴族院議員。

佢係昭和天皇嘅親信之一。二戰中期,當時係內大臣嘅木戶提名好戰嘅東條英機出任首相,因而同二戰扯上關係。日本投降之後,佢畀GHQ以甲級戰犯罪名拉咗,開頭畀人判終身監禁,1955年畀人假釋釋放。

生平[編輯]

早年[編輯]

木戶幸一1889年7月18號響東京府東京市赤坂區新坂町六二(即依家東京都港區)出世。老豆木戶孝正,原本姓「來原」,老豆阿媽分別係長州藩士來原良藏(幸一阿爺)同木戶治子(木戶孝允細妹・幸一阿嫲)。但由於木戶孝允冇仔得個女,要男人嚟繼承家督,所以就搵嚟外甥孝正做佢契仔;又將大女好子嫁畀孝正。

後嚟好子早死,孝正續娶,生咗三個仔女,其中大仔就係幸一;下有細佬和田小六、細妹八重子。

佢讀過學習院高等科,後嚟畢業於京都帝國大學法科大學政治學科(即依家京都大學法學部)。1917年老豆病死,作為大仔嘅木戶幸一繼承家督,成為侯爵,出任貴族院議員。1927年,以近衛文麿帶頭嘅人唔滿意研究會,於是另外成立火曜會,其中就有木戶幸一。

畢業之後,佢響農商務省做官僚,出任過水產局事務官、工務局工務課長、同會計課長、産業合理局部長。後嚟農商務省分拆成農林省商工省,木戶揀左過檔到商工省。佢響商工省都做左好耐,做過臨時産業合理局第一部長兼第二部長。

直至1930年,經昔日老友・兼小學師兄近衛文麿提拔,佢唔再撈商工省,轉為做內大臣府秘書官長[1]

政治生涯[編輯]

1930年出任內大臣府秘書官長。

1936年2月爆發二二六事件皇道派發動政變失敗,當時木戶聯同統制派東條英機杉山元處理呢次事件,得到昭和天皇賞識。由此開始,木戶成為天皇嘅親信之一,亦開始參加中央政治。

自1937年起,佢先後出任文部大臣、厚生大臣、內務大臣,1938年期間係同時兼任厚生大臣同文部大臣[1]。任內佢決定歸還1940年夏季奧林匹克運動會嘅主辦權。

1940年,佢出任內大臣[1]。由於佢奉行官僚主義,深得天皇信賴。當時昭和天皇嘅左右有三個:木戶、前首相西園寺公望、前內大臣牧野伸顯

1941年,因為外交失敗,近衛文麿被迫辭職,下任首相係邊個成為問題。其中牧野年事已高,西園寺決定唔參加首相提名,所以揀邊個提名嘅重任落到木戶幸一身上。

近衛文麿提名東久邇宮稔彥王為下任首相。呢個決定惹嚟唔少人反對;一,稔彥王主張同美國和平談判,唔符合軍國主義;二,佢身為皇室成員,一旦戰爭擴大,皇室要負上好大責任。響昭和天皇同眾多元老嘅反對下,最終首相侯選人得海軍出身嘅及川古志郎,同陸軍出身嘅東條英機[2]

響同月17號嘅重臣會議上,林銑十郎要求畀稔彥王做首相,之後若槻禮次郎認為東條太好戰、畀外國人印象好差,反對由軍人出任。呢幾個提議一一畀木戶否決。最後,佢以「不入虎穴,焉得虎子」做理由,提名強硬嘅東條英機為下任首相。第二日,東條正式上任[3]

響二戰初期,木戶全力支持東條英機,甚至響駐兵問題上反對撤軍;但響後期,戰局開始對日本不利,主和派嘅聲音越嚟越大,木戶亦參加埋終戰工作。同時,佢同其他元老恁冧咗東條內閣。

戰後[編輯]

響審判上,木戶響度進行答辯
東京審判期間嘅木戶

1945年8月日本正式投降,二戰玩完。盟軍正式進駐日本,開始追究有份推動二戰嘅政治人。同年11月,佢畀遠東國際軍事法庭以「甲級戰犯」罪名拉咗。

響審判上,木戶身為天皇嘅親信,為咗證明同天皇無關,佢承認自己嘅罪行,仲交上自己份日記(《木戶日記》)做證明。佢表示「唔隱瞞,唔驚」,話自己有份處理終戰工作,幫天皇頒佈終戰詔書,佢係反戰、唔應該要拉佢。但法官Arthur Comyns Carr並唔接納佢嘅「無罪論」,認為如果天皇真係反戰,咁木戶身為左右手嘅當然係跟老細做嘢、一齊反戰。佢嘅證詞證明唔到天皇係清白(反而係東條英機嘅證詞證明天皇唔關事)。另外,其他軍人同政治人亦對木戶嘅「無罪論」好嬲,其中武藤章佐藤賢了響前往巢鴨監獄服刑嗰陣更加批評佢係「厚顔無恥、混帳東西」。

最後,由十一個法官組成嘅審判團入面經五票賛成、六票反對下,木戶唔使死刑。後嚟判佢終身監禁,響巢鴨監獄服刑。

木戶響盬獄入面曾經勸天皇退位,話:「呢次戰敗,無論點樣陛下(天皇)都有一定嘅責任......將美國同其他國家嘅諗法置之於外,服從真理再去做事先係啱嘅。」但係唔知天皇係受到乜嘢影響,佢響後嚟嘅致詞入面完全冇提退位同道歉,木戶表示「好失望」[2]

1955年,木戶因為身體嘅原因,得到咗假釋嘅機會。佢宣佈退出政界,先係去大磯歸隱;後嚟搬去青山。1969年響佢生日嗰陣,天皇賜杖畀佢[註 1]

1977年,因為肝硬化,木戶響宮內廳醫院走咗,終年87歲。之後畀人葬響東京都府中市多磨町嘅多磨靈園

榮譽[編輯]

  • 1915年(大正4年)8月10號 ー正五位
  • 1931年(昭和6年)5月1號ー帝都復興紀念章
  • 1937年(昭和12年)11月1號ー正三位
  • 1940年(昭和15年)6月1號ー正三位勲二等
  • 1941年(昭和16年)8月15號ー從二位
  • 1942年(昭和17年)9月8號ー勲一等瑞寶章

屋企[編輯]

[編輯]

  1. 呢度係指皇帝頒個手杖畀佢,以示榮寵。

[編輯]

  1. 1.0 1.1 1.2 廷証第112号: [木戸幸一關スル人事局履歴書] - 国立国会図書館デジタルコレクション. dl.ndl.go.jp (日文). 喺2021-09-22搵到.
  2. 2.0 2.1 精選書摘 (2018-08-10). . The News Lens 關鍵評論網 (中文). 喺2021-09-22搵到.
  3. 自由時報電子報 (2018-11-21). 治的日常平洋戰爭和東條內閣興衰史東條英機組閣 - 自由評論網. . 喺2021-09-22搵到.