北白川宮永久王

出自維基百科,自由嘅百科全書
跳去導覽 跳去搵嘢
北白川宮永久王

北白川宮永久王(日文:きたしらかわのみや ながひさおう,1910年2月19號1940年9月4號)係北白川宮第四代當主,成久王大仔、道久王老豆,同時係貴族院議員兼陸軍軍人,最高官位係陸軍砲兵少佐。

佢係第一位響外國戰死嘅日本皇室成員。

經歷[編輯]

永久王1910年響東京府芝區出世,係成久王大仔,阿媽係房子內親王。

1912年外公明治天皇過身,永久王出席葬禮時話:「公公嚟啦。」搞到啲人好尷尬,要同佢講:「公公響雲上面呢。」呢啲笑料,後嚟就畀人記低咗。

之後,佢一直都好鍾意騎馬。

1923年,老豆成久王響巴黎撞車傷重死亡,永久王因而接任北白川宮當主一位。第二年,佢入讀東京陸軍幼年學校,同年佢同竹田宮恆德王一齊去北海道視察,其中永久響仙台買咗支黑竹畀阿媽房子,令到房子好開心,長年都Keep住。1925年,佢作咗一首歌遙,而歌詞係有關老豆成久王。

入讀幼年學校之後,有一次老師問佢對於校友嘅意見,永久答:「我全部同學都係校友。」同年,老師叫佢去旅行,佢唔去,反而去咗靖國神社參拜,種種行為都令老師留下咗深刻印象。

當時係陸軍炮兵少尉嘅永久王

之後佢分別升讀陸軍士官學校預科埋主科,1931年升為陸軍砲兵少尉。同年,佢曾經同朝鮮王朝成員李鍝交流。

1934年,佢畢業於陸軍砲工學校高等科,之後到陸軍野戰砲兵學校接受乙類學生訓練,1939年畢業於陸軍大學校。期間,佢娶咗軍人德川義恕個女祥子

永久王個老豆成久王同其他皇室成員(特別係朝香宮孚彥王閑院宮春仁王同埋竹田宮恆德王)都好鍾意著當時流行嘅新派軍服,因為新派軍服實而不華,睇起嚟又型,又好用,所以深受年輕一族歡迎,而老豆嘅喜好都影響咗永久王。後尾永久王上司要求改著新派軍服,但永久王一早已經就轉咗,令上司覺得佢真係好時髦。

1937年嘅永久王

響永久王讀陸軍大學校嗰陣,佢曾經同海軍大學校嘅人交流過,令到佢堅信「海軍同陸軍可以合為一體」呢個觀念。

1940年3月,永久王調任任華北方面軍轄下嘅駐蒙軍,同年6月升為參謀。同年佢又作咗首和歌。1940年9月4號朝頭早,永久王揸飛機軍演時出咗意外,被迫降戰鬥機波及,結果永久王右面膝頭被切、左面膝頭撞親、頭部因撞傷而有裂痕,之後畀人緊急送去陸軍醫院搶救,但係最後都救唔返,同日夜晚七點宣佈瓜咗,終年三十歲(虛齡三十一歲),係第一位響外國戰死嘅日本皇室成員。

同年9月4號,佢嘅選體由張家口經飛機送去日本立川飛機場,而阿媽房子忍住眼淚,對住條屍咁話:「欣賞你一直好落力做嘢。」並且係咁話佢係「戰死」。而響房子隔離係永久王個仔、只有三歲嘅道久王,而當時道久王拎住支日之丸旗仔嚟迎接佢,完全唔知發生緊咩嘢事。9月7號,根據房子嘅意願,永久個屍體由炮車送去豐島崗墓地落葬。而北白川宮當主一位由大仔道久王接任。

1959年,永久王響靖國神社嘅靈位畀人同阿爺能久親王合併。

屋企[編輯]

永久王同老婆祥子

老豆:成久王

阿媽:房子內親王

兄弟姐妹:長細妹美年子---次細妹佐和子---三細妹多惠子

老婆:祥子

上一任
北白川宮成久王
北白川宮當主
1923年至1940年
下一任
北白川宮道久王