文仁

出自維基百科,自由嘅百科全書
跳去導覽 跳去搵嘢
文仁
日本皇嗣
秋篠宮當主
Prince Fumihito Rome 2016 (2).jpg
2016年
私人明細
配偶親王妃紀子
仔女真子內親王
佳子內親王
悠仁親王
上皇明仁
上皇后美智子
出世 (1965-11-30) 1965年11月30號(56歲)
昭和四十年
Flag of Japan.svg 日本東京都千代田區千代田皇宮宮內廳醫院日文宮内庁病院
宗教神道

秋篠宮文仁親王(日文:あきしののみや ふみひと しんのうAkishino no miya Fumihito shin'nō1965年11月30號—),日本皇室成員,而家係皇嗣,亦係現任秋篠宮當主。佢係上皇明仁同埋上皇后美智子嘅第二天皇德仁細佬。徽印係栂,尊稱係「秋篠宮皇嗣殿下」。

家下係日本山階鳥類研究所總裁、日本動物園水族館協會總裁、世界自然保護基金日本分會名譽總裁、日本網球協會名譽總裁、日荷協會名譽總裁、綜合研究大學院大學理學博士,亦係唔同嘅名譽博士學位,包括理學名譽博士(布拉帕大學、詩納卡寧威洛大學、朱拉隆功大學、汶叻差他尼大學)、水產生物學名譽博士(泰國農業大學)、水產學名譽博士(孔敬大學、先皇技術學院)。

1990年(平成二年)6月29號佢同川嶋辰彥嘅大女紀子結婚、成立秋篠宮家。

生平[編輯]

早年[編輯]

1965年11月30號凌晨十二點二十二分,皇太子明仁親王同老婆美智子共同嘅第二個細路,響宮內廳醫院出世。嗰陣佢嘅乳名叫禮宮あやのみや,Ayano miya);後嚟命名叫「文仁」,嚟自論語嘅一句「君子博學於,約之以,亦可以弗畔矣夫!」。細個嘅時候以百厭聞名,鍾意網球等運動,對地理方面亦有興趣。由於阿爸阿媽好忙,所以佢細個同德仁一齊由當時作為東宮侍從嘅濱尾實教育[1]

少年時代[編輯]

1989年,文仁親王(右)參觀阿姆斯特丹動物研究所

1984年入讀學習院大學法學部政治學科,積極參加社團活動,成立自然文化研究會,又曾經響研究所研究家禽。

1986年成為山階鳥類研究所總裁。1988年從學習院大學畢業後,出任日本動物園水族館協會總裁,之後嗰兩年就響牛津大學聖約翰書院動物學科讀書。

1989年1月7號,阿爺昭和天皇過身,老豆皇太子明仁親王登基,改元平成。8月傳出佢同川嶋紀子結婚嘅消息。川嶋紀子係文仁親王響學習院大學細一歲嘅師妹,早響1986年文仁親王已經求婚成功。9月12號,有關川嶋紀子同文仁親王結婚嘅皇室會議展開。全部一致通過呢門婚事,畀佢哋訂婚,同日下晝搞記者會公佈婚事,不過就係因為當時仲係為阿爺昭和天皇哀悼嗰陣搞啲咁嘅事而畀人批判[2]。由於係改元平成後第一場皇室嘅喜事,佢哋嘅結婚普遍受到祝福。

1990年1月12號,即昭和天皇嘅喪禮搞完之後嘅一日,佢地完成納采之義,之前由皇室會議承認嘅訂婚正式確定。同年6月29號,舉行結婚之義,成立秋篠宮,個名嚟自奈良縣奈良市嘅一個地方名「秋篠」。

秋篠宮時代[編輯]

秋篠宮家紋

1991年,大女眞子內親王出世。1992年出任日本網球協會名譽總裁。1994年二女佳子內親王出世。1996年9月獲得綜合研究大學院大學理博士學位。1997年出任世界自然保護基金日本分會名譽總裁、2000年出任日蘭協會名譽總裁、2004年出任全日本愛瓢會名譽總裁、2005年出任Siam Society名譽副總裁。

2001年開始響東京農業大學教書,2006年成為兼職講師,2007年成為東京大學總合研究博物館特別研究員,2008年出任農學部生物治療系客座教授。

2005年,文仁親王同親王妃紀子出席明仁天皇誕生日祝賀活動

大佬皇太子德仁親王同雅子妃響2001年生咗佢哋第一個細路愛子內親王,之後就冇再生第二個。由於日本天皇至明治時代就規定係傳男不傳女,明仁天皇面臨住冇男孫繼承嘅問題。2003年12月,宮內廳長宮湯淺利夫公開發言:「為咗皇室嘅繁榮考慮,我強烈希望(文仁親王同紀子妃)生埋第三個細路。」響2004年開始,有關畀唔畀女性做天皇嘅議題就一直紛爭不斷。

2006年2月25號,皇室宣佈紀子妃有咗BB。同年9月6號,第三個細路、大仔悠仁親王出世,成為明仁天皇唯一一個男孫。

文仁親王同荷蘭交流密切。2009年8月,應荷蘭卑雅特歷絲女王邀請,文仁親王同親王妃出訪荷蘭。佢亦同泰國等東南亞國家有交流。

文仁親王係有栖川流書道嘅傳承人。老豆皇太子明仁曾經同高松宮宣仁親王講:「禮宮(即係指文仁)想寫出好似叔叔咁嘅字,可唔可以教下佢?」宣仁就以自己嘅字唔足以教人哋做理由,而畀老婆親王妃喜久子教文仁有栖川流書道[3]

響2007年至2015年期間,佢亦係皇室會議嘅預備議員,自2015年9月16號開始出任皇室會議議員至今。2017年12月1號審議有關天皇退位等問題,文仁親王因為同呢個議題有利益衝突所以唔出席,由叔叔常陸宮正仁親王代為出席。

皇嗣時代[編輯]

2019年5月1號,伴隨住大佬德仁成為第126代天皇,文仁成為皇嗣,係繼秩父宮雍仁親王之後,日本皇室86以嚟再一次有成員成為「皇太弟」。響同年10月22號嘅即位禮正殿之儀期間,文仁著住象徵住皇太子身份嘅「黄丹袍」現身。

2020年11月8號,立皇嗣之禮正式舉行,係向國內外宣佈文仁正式被立做皇嗣嘅國事行為、皇室禮儀[4]

2022年4月21號,文仁同親王妃紀子參拜伊勢神宮,代表住立皇嗣相關嘅行事已經結束。成為皇嗣後,出於安全考慮,秋篠宮宮邸被迫進行改建。

屋企[編輯]

秋篠宮全家福

老豆:上皇明仁

阿媽:上皇后美智子

兄弟姐妹:大佬德仁---細妹黑田清子

老婆:紀子

文仁親王同紀子妃嘅仔女
出世日期 配偶
大女 小室真子 1991年10月23號 小室圭
二女 佳子內親王 1994年12月29號 未有
大仔 悠仁親王 2006年9月6號 未有

[編輯]

  1. "浩宮さまは「線が細いが芯が強い」、礼宮さまは「こわいということをまったく知らない」…かつての側近が明かす"長男"と"長男以外"で異なる天皇…". archive.ph. 2022-06-12. 喺2022-07-31搵到.
  2. ""昭和天皇の喪中"、"礼宮は学生で留学中"…「異例中の異例」だった秋篠宮さまと紀子さまの"ご婚約発表" | 文春オンライン". archive.ph. 2021-04-14. 喺2022-07-31搵到.
  3. 高松宮妃喜久子 (1998-11-25). 菊と葵のものがたり. 中央公論社. p. 36. ISBN 978-4120028397.
  4. "秋篠宮さま、立皇嗣の礼 国の代替わり儀式全て終了(写真=代表撮影)". 日本経済新聞 (日文). 2020-11-08. 喺2022-07-31搵到.