又一城

又一城（英文：Festival Walk）喺香港九龍塘又一村達之路，近香港城市大學，係一座大型購物商場兼寫字樓大廈，由太古地產同中信泰富合資起，1998年12月落成，2006年太古以61.8億元收購中信持有的一半權益。2011年7月，太古同新加坡豐樹產業（Mapletree）達成協議，以188億元賣又一城畀Mapletree。

又一城縱橫交錯嘅電梯網絡（2005年）

又一城縱橫交錯嘅電梯網絡（2019年）

又一城內部（2007年）

又一城內部（2021年）

又一城（英文：Festival Walk）係一個位於香港深水埗區九龍塘又一村達之路嘅大型商場，鄰近香港城市大學、港鐵九龍塘站、歌和老街公園同埋生產力促進局。商場樓高7層，樓面面積約98萬平方呎，另外設有地庫停車場同一座樓高4層嘅甲級寫字樓，名為又一城商業大樓（Festival Walk Tower），寫字樓樓面面積約27萬平方呎。

商場喺1998年11月13日開幕，由太古地產同中信泰富合資興建，曾經由太古地產全權擁有同管理。直到2011年7月，太古地產宣佈以188億元將又一城出售俾由新加坡政府財政部全資擁有嘅淡馬錫控股旗下豐樹產業，成為香港歷來成交金額最高嘅單一物業買賣。其後又一城成為豐樹大中華商業信託嘅主要持有資產。

歷史

又一城商場由金門建築承建地基，喺1998年11月13日開幕。又一城前身係1989年3月1日啟用、1993年3月1日關閉嘅達之路公共交通總站同旁邊嘅露天停車場。王菲歌曲《尾班車》嘅音樂錄影帶曾經喺呢度取景。更早之前，原址係朱古仔村嘅寮屋區。朱古仔村範圍沿山而建，由達之路、桃源街去到大坑東道。

受反對逃犯條例修訂草案運動期間衝突破壞商場設施影響，又一城喺2019年11月13日起暫停營業64日進行維修，並喺2020年1月16日重開。

商場建築設計

商場由美國著名建築公司Arquitectonica設計，設計概念用「流水」、「峽谷」同「冰川」為主。

• 「流水」代表每層彎曲流動嘅行人通道，令遊人行走時有河流流動嘅感覺；
• 「峽谷」係指由最高層向下望，中庭喺陽光照射下形成層層跌宕嘅視覺效果；
• 「冰川」就係指商場內設有被稱為香港最大嘅溜冰場。

商場有7層購物設施，可租用面積約54,000平方米，另外寫字樓樓面約20,000平方米。寫字樓位於溜冰場附近，入口喺達之路同停車場入口交界。

商場設計以白色透光為主，日間多利用天然陽光，節省能源。場內有大量縱橫交錯嘅行人扶手電梯，目的係引導人流流向各層商舖。至於停車場設有迴旋車道設計，駕駛人士入場時要長時間右轉先可以到達樓層，離場則相反。

商場特色

又一城場內租戶走中高檔路線，係深水埗區內少數中高檔商場之一，有如置身外地。場內有多個國際品牌進駐。

商場高層可以遠眺畢架山、石硤尾、樂富，甚至港島區中環、上環一帶。美食廣場附近設有MCL電影院同溜冰場。其中溜冰場「歡天雪地」係全港第二大室內溜冰場，擁有大型舞台燈光同視聽系統，係舉辦世界級滑冰賽事同表演嘅場地之一；電影院MCL FESTIVAL GRAND CINEMA喺2016年6月8日開業，接替AMC又一城，係現時深水埗區四間電影院之一。

商場其中一大特色係每年聖誕節時會設有一棵70呎高嘅聖誕樹，不同日子或者推廣活動期間，都會有各式各樣嘅表演活動。

各層商舖及食肆

P1至P3

停車場，車輛可以由達之路進入大廈，經迴旋斜道到達該層。其中P3層喺2017年加設電動車充電位設施。P2層設有挑戰者汽車美容維修服務。

MTR

MTR

最大租戶係Taste 超級市場，面積達32,000平方呎。其餘租戶包括美珍香、華御結、奇華餅家、百老匯電器、豐澤、萬寧及屈臣氏。

呢層有三條扶手電梯，經行人隧道連接九龍塘站（觀塘綫）。

LG2

LG2主要租戶有國際高級時裝，同時有滙豐、渣打、中國銀行、Bally、COACH、Longchamp、SPORTMAX、TWG及I.T。其他租戶係珠寶及首飾為主，包括周生生、周大福、Links of London、Montblanc、OMEGA、ROLEX及Swarovski等。

食肆包括 Dan Ryan's Chicago Grill 同美心食品旗下嘅八月花。

呢層設有通道連接九龍塘站（東鐵綫）。

呢層喺開業至2003年間曾設有亞洲區首家熱帶雨林餐廳，令商場知名度增加。結業後喺同年9月改為餐飲業集團 Elite Concepts 開設嘅 mi 美食廣場，不過營運不足一年後改為i.t。

而 I.T 喺2022年底結業後，開設誠品生活。

LG1

LG1租戶以國際時裝為主，主要有Apple Store、agnès b.、馬莎百貨、Tommy Hilfiger等。餐廳有Amaroni's、COVA Caffe同牛角。呢層有扶手電梯，經隧道去香港城市大學，亦有通道去九龍塘站（東鐵綫）部份。

2016年11月17日，PageOne葉一堂正式停業後，原址於2017年4月4日開設無印良品。

2020年10月17日，麥當勞搬到LG1-01A，以「首家自助點餐門店」形象重開，取代於10月3日遷離的第二層L2-28號美食廣場側大舖。

G

G層主要租戶以家居精品及化妝品牌為主。化妝品主要包括 Aésop、CHANEL BEAUTÈ、Clé de Peau Beauté、Dior Beauty、Estēe Lauder、Giorgio Armani、Joyce Beauty、Lancôme 及 Shiseido 等。

家居精品包括 Bang & Olufsen、J Select Quality+Life、LAURA ASHLEY HOME、琉璃工房 及 Zara Home。

其他租戶包括 快圖美、MaBelle、Madia、Pandora、Pashma、時思糖果、王家沙、望月樓 及 太興集團 旗下嘅 茶木。

該層設有出入口連接 又一城公共運輸交匯處（巴士站、小巴站及的士站）以及達之路。

UG

溜冰場

UG層租戶以年青時裝為主，主要包括 A|X Armani Exchange、bauhaus、CAMPER、H&M、Hollister、Levi's、SPORT B 及 VANS 等。呢層亦有多間美容店同 LOG-ON。

食肆有 caffè HABITŪ the table、天仁茗茶、agnès b. 旗下嘅 LE PAIN GRILLÉ，以及 美心食品 旗下嘅 EXP 同 星巴克。

UG層亦有又一城商業大廈大堂、MCL Festival Grand Cinema 戲院入口，同設有「歡天雪地」室內溜冰場。

L1

L1

L1租戶以年青人時裝為主，主要包括 adidas Originals、Aldo、Calvin Klein Jeans、Calvin Klein Underwear、Giordano Ladies、UNIQLO 等。其餘租戶包括 時間廊、點睛品、G2000、GigaSports、Joy & Peace、眼鏡88 及 Swatch 等。

L1亦有多間食肆，包括 安南、Häagen-Dazs 及 美心食品 經營嘅 千兩 等。

L2

晚上L2西面天花裝飾

美食廣場「色香味泉」

L2主要以運動、兒童服裝及生活禮品為主。主要租戶包括玩具反斗城、美國冒險樂園、柏斯琴行 同高級髮廊 i PRIVATE i SALON．NAIL NAIL。

呢處以前曾設有香港唱片。

L2食肆包括 Greyhound Café、The Night Market、Five Guys、太興集團 旗下嘅 敏華冰室、錦麗 同亞參雞飯，以及 美心食品 旗下嘅 simplylife。

而美食廣場「色香味泉」有6間食肆，包括大家樂、沙嗲王、肯德基、Pepper Lunch、譚仔三哥同吉野家。

• 
  G層
• 
  UG層
• 
  G層
• 
  L1層

商場業權

1998年11月13日，又一城落成並對外開放。當時由太古地產及中信泰富各自持有50%權益，而管理公司太古。2006年，太古集團旗下嘅太古地產 以61.8億港元購入中信泰富又一城嘅50％權益，成為單一業主。

到咗2011年7月29日，太古地產公布將又一城出售畀由 新加坡政府 財政部全資擁有嘅淡馬錫控股所控制嘅豐樹產業，現金總代價為188億元。買方支付訂金18.8億元，交易於8月18日完成。喺交易完成之後，太古地產 已經終止持有又一城任何權益。太古地產指出，從交易所得嘅收益將會用作公司嘅一般營運資金。

不過商場職員嘅制服仍然同太古地產旗下商場一致。

寫字樓

寫字樓叫「又一城商業大樓」，樓高4層，面積達22.9萬平方呎。主要租戶包括滙豐尚玉理財、花旗銀行、香港城市大學同奧雅納工程顧問。

2025年12月11日，豐樹產業用19.6億元出售辦公大樓部分，面積為213,982平方英尺，通告無披露買家身份。

其後《香港01》發現，香港城市大學用CityU Limited名義購入，公司董事包括香港城市大學校長梅彥昌、副校長（行政）周彩英，首席及常務副校長李振聲。

出面網頁

• 又一城網頁
• 又一城歡天雪地
• 又一城商店一覽