同病毒共存

出自維基百科,自由嘅百科全書
跳去導覽 跳去搵嘢

武漢肺炎疫情之下,世界各國去到一段時間都無辦法做到零確診,基於經濟同人民生活原因,有啲國家決定放棄零確診嘅目標,採取同病毒共存嘅政策[1]。有啲評論認為星加坡係呢個政策嘅開路先鋒,而之後亦有一啲國家跟從[2],例如日本馬來西亞[3]

背景[編輯]

喺武漢肺炎疫情初期,好多國家都有唔錯嘅防疫成績,例如台灣香港星加坡紐西蘭南韓等,但呢啲都係依賴封鎖邊界、隔離旅館同埋境內嘅嚴格封鎖等措施[2]

不過,喺高傳染性嘅Delta變種病毒出現之後,各國就發現疫情根本難以控制。市民難以忍受長期封鎖嘅生活,經濟亦受好大嘅打擊,所以,有啲國家就採取「同病毒共存」嘅做法,希望回復相對正常嘅生活[2]

科學家嘅理據同建議[編輯]

喺2021年1月,科學雜誌《自然》訪問咗全球百幾名免疫學家、病毒學家同衛生專家,近90%嘅受訪者認為,武漢肺炎病毒唔能夠根治,又話有證據表明,病毒可能會成為地方性病毒,並繼續喺世界各地傳播[1]

此外,根除傳染病其實並唔常見。事實上,世界衛生組織到而家都只係宣佈咗天花同牛瘟被正式根除[1]

政策倡議下各地嘅做法同反應[編輯]

中國大陸[編輯]

睇埋:武漢肺炎中國大陸疫情

中國大陸喺2021年中後期仍然堅持清零。前全國衛生部長高強亦喺官媒撰文,話中國必須堅持嚴格防控,打消同病毒共存嘅想法[4]。喺揚州,有教師喺網上發文,建議揚州試辦同病毒共存,降低封控措施強度,雖然只係政策討論,但結果就被警方以「發布涉疫情不當言論,造成不良社會影響」為由,行政拘留15日[5]

另外,上海復旦大學附屬華山醫院感染科主任張文宏發表言論,話中國應考慮「同病毒共存」,亦因為自己同官方立場唔同,遭受網絡暴力欺凌[6]

星加坡[編輯]

睇埋:武漢肺炎星加坡疫情

星加坡政府喺2021年6月宣布,要採取同病毒共存嘅做法,並且以佢哋嘅高疫苗接種率作為依據。總理李顯龍喺10月9號表示,星加坡喺病例穩定時達到新常態,將可放寬限制措施。佢又預計,星加坡邁向新常態要3至6個月時間[2]

參考[編輯]

  1. 1.0 1.1 1.2 "新冠病毒可能不會消失 我們應如何與「毒」共存". BBC News 中文 (中文). 喺2021-10-28搵到.
  2. 2.0 2.1 2.2 2.3 "邁向新常態 亞太國家決定與病毒共存". Rti 中央廣播電臺 (中文). 喺2021-10-28搵到.
  3. 聯合新聞網 (2021-09-29). "與病毒共存 已有共識 | 聯合新聞網:最懂你的新聞網站". 聯合新聞網 (中文). 喺2021-10-28搵到.
  4. "中國原衛生部長撰文稱與病毒共存絕不可行引關注". RFI - 法國國際廣播電台 (中文). 2021-08-09. 喺2021-10-28搵到.
  5. 自由時報電子報 (2021-09-14). "中共戕害人權未歇!籲與病毒共存關15天 教藏語涉分裂國家罪 - 政治". 自由時報電子報 (中文). 喺2021-10-28搵到.
  6. "中國「清零論」和「共存說」討論之際 敢言專家被推上風頭浪尖". BBC News 中文 (中文). 2021-08-13. 喺2021-10-28搵到.