哈爾濱糖廠
45°48′52.1″N 126°38′33.4″E / 45.814472°N 126.642611°E
原料
[編輯]製糖工業嘅原料喺中國主要有兩種：蔗同埋甜菜。蔗係熱帶、亞熱帶作物，基本係華南先出產，最北嘅產地係四川盆地。而哈爾濱地處中國東北，咁北咁凍嘅地方種唔到蔗，但可以種甜菜，哈爾濱郊區啲村係中國甜菜主要出產地[2]，啲村民將收穫嘅甜菜大量賣畀收購站，然後裝火車運去哈爾濱糖廠，呢個就係哈爾濱糖廠嘅原料來源[2]。
史
[編輯]清朝光緒三十四年（1908年），而家嘅廠址度創辦咗「富華製糖股份有限公司」，由中國資本投資，產力係日均300噸[3]，1911年，收歸官辦，改名叫東三省呼蘭製糖廠。喺之後因爲短缺原料，糖價又跌，蝕得犀利，1927年就被迫停產，轉行做發電同整啤酒。滿洲國成立後，1935年12月，當局劃佢入滿洲製糖株式會社，改名叫哈爾濱製糖所，重新經營糖業，由日本人獨資經營，但直到1945年間只斷續生產咗五年[3]。1948年，中共勢力接管間廠，當年11月，修復間廠嘅破壞，1949年12月，開機生產，廠名定做松江省哈爾濱市實業總公司製糖廠。之後技術提高，1951年，國家投資710萬入設備，日加工甜菜量提高到700噸，高過1949年時嘅一倍[1]。
1953年，間廠屬哈爾濱市人民政府工業局，1956年11月，歸黑龍江省工業廳。1957年，國家投資300萬入設備，日加工能力提高到1000噸[1]。
1958年7月，間廠由省畀返市；1960年10月，又從市改屬省化工輕工業廳。1966年，國家投資35萬，日生產力提高到1200噸[1]。
1980年，投資760萬更新設備，日均生產力提高到1500噸。1981年，投資327萬升級技術，產量提高到1800噸。1982年～1983年，投資2993萬，產量提到2000噸，高過中共建政前嘅7.3倍[1]。
1987年開始，糖廠唔再單純生產調味糖，亦做埋其他副業。當年4月，抌14.08萬起方糖車間，1988年10月投產，當年產出方糖656噸。1989年抌13萬，從上海糖果廠引入生產綫，當年出產132噸嘅糖。1990年抌168萬，將原先嘅味精車間改裝成酒精分廠，日產酒精8噸，年產342噸。到咗1990年代，間廠有六間分廠，分別係製糖、動力、飼料、機加工、味精、酒精，飼料生產嘅原料出自製糖後嘅廢菜絲，而味精嘅原料係糖蜜[1]。而且作爲國企規模大，廠週邊形成咗個社區，開設咗附屬嘅汽車公司、建築公司、漁業公司、學校、醫院[1]。