土瓜灣

出自維基百科,自由嘅百科全書
跳去導覽 跳去搵嘢
土瓜灣一帶。

土瓜灣(灣今讀環)係香港九龍一道地方。響九龍半島東岸,係九龍市區一部份,同鶴園馬頭角為鄰。行政上係屬於九龍城區

土瓜灣原本係個大海灣,同九龍灣連住,係維多利亞港一部份。土瓜灣喺英國人佔領九龍半島之前已經有人住。個灣對出有個海心島,又叫做土瓜灣島,島上有石有廟,係遊覽勝地。不過因土瓜灣要填平,連埋九龍半島度。

而家土瓜灣主要係住宅區,同時開咗唔少傢俬鋪同室內設計公司。

地名[1][編輯]

相傳宋室一班人着草到官富場(今九龍城)時,村民出去迎接,同埋向佢哋獻上糧食,其中有由村民種植嘅土瓜。由於村民護駕有功,宋帝就賜咗一把黃緞巨傘畀佢哋。直至宋朝滅亡之後,每逢土瓜灣一年一度嘅龍舟競渡,村民仲會先將御賜黃緞巨傘設喺巨舟上面,由紳耆率領一班村民向巨傘叩拜,再開始比賽。土瓜灣呢個名因村民種植土瓜,並供奉畀宋室享用得返嚟。

第二個講法,土瓜灣係因為佢嘅獨特地形,所以先咁叫。以前土瓜灣對開海面有一個島仔,島上有一座廟,裏面供奉有珠江水神之稱嘅龍母。間廟雖然好細,但就好出名。喺清朝嘉慶年間嘅《新安縣誌》已被列作古蹟;而個島同土瓜灣一名嘅緣由可追溯至1902年由香港政府製作嘅《九龍半島圖》,嗰時個島已被標作「土瓜環島」。

歷史[編輯]

清代,土瓜灣嘅發展一直都落後過周圍嘅地方。去到五十年代後,香港啟德機場起喺土瓜灣,搞到附近的建築必須遵循樓宇高度規定,令土瓜灣好多樓仲係矮腯腯。另外,搞咗幾次填海去擴充土地資源,最後開闢成工業區,令土瓜灣成為香港最早嘅工業區,唔同類型嘅工廠,包括發電廠、水泥廠、皮革廠、小五金廠等等都可以喺度搵到。[2]

工業史[編輯]

1930至40年代係香港輕工業發展嘅「黃金十年」。當年中國係「七國咁亂」同打緊國共內戰,搞到唔少波士同有錢人都將佢哋嘅資金同公司都搬過嚟香港起工廠。偉恆昌嘅前身係偉倫紗廠,紗廠規模非常龐大。除咗偉倫紗廠,呢度都有第二間紗廠「東方紗廠」,1950年代起,原本被列為三級歷史建築,但而家只拆到得翻幅牆。[3]

响1960、70年代,土瓜灣周圍都係工廠同塵埃。乜類型工廠都有,大嘅就有英泥廠、製衣廠、船廠、味精廠;細嘅就有電池廠、塑膠花廠,各式各樣嘅都可以喺土瓜灣搵到。但跟住工廠北移,舊時重工業、輕工業嘅輝煌痕迹慢慢就冇咗。[4]

土瓜灣鄰海,船廠同造船業都會喺依度起。而家嘅庇利街,正正係船排隔離填海得嚟,嗰度曾經有間「庇利船廠」。雖然以前嘅土瓜灣得山同海,但土瓜灣近住繁華嘅九龍城;政府為咗開發多啲土地,喺較荒蕪嘅土瓜灣移山填海,連海心公園塊地都係填海而來。[3]

趣事[編輯]

土瓜灣嘅益豐大廈曾經係變形金剛系列電影嘅拍攝場地,惟唔同住客投訴冇通知下搞爆破場面,驚造成火災同製造巨響。[5]

徐克《順流逆流》同日劇《信用欺詐師JP︰香港浪漫篇》都係益豐大廈做場景。[6]

住宅[編輯]

大型私人屋苑[編輯]

  • 迎豐
  • 翔龍灣
  • 港圖灣
  • 半山一號
  • 傲雲峰
  • 駿豪居
  • 安和園
  • 偉恆昌新邨
  • 定安大廈

公共設施[編輯]

參考[編輯]

  1. "原來土瓜灣真係有瓜—土瓜灣的名稱由來".
  2. "香港土瓜灣,繁華背後的故事". 草根影響力新視野.
  3. 3.0 3.1 "香港到處遊﹕漫步土瓜灣 回顧工業史".
  4. "40年無名小廠 見證工業區變遷".
  5. "變形金剛炸爆土瓜灣 嚇壞街坊". 東方日報.
  6. "漫步土瓜灣 尋訪電影場景". 睛報.