基督教香港信義會元朗信義中學
| 元朗信義中學 | |
|---|---|
| 位置 | |
| 新界天水圍天耀邨第二期 | |
| 明細 | |
| 類 | 津貼英文中學 |
| 校訓 | 正心修身 |
| 宗教聯繫 | 基督教 |
| 成立 | 1959年 |
| 校區 | 元朗區 |
| 校長 | 尹浩然先生 |
| 資料 | (852) 24480622 |
| 網站 | http://www.yll.edu.hk/ |
元朗信義中學（Yuen Long Lutheran Secondary School）係香港一間全日制政府津貼男女英文中學，喺新界元朗天水圍天耀邨第二期，由基督教香港信義會主辦。喺1959年創校，1993年由元朗搬入天水圍。
班級
[編輯]元朗信義中學總共有三十班，其中中一、中二、中三、中四、中五、中六都有五班。由01-02到19-20年連續九年收嘅中一新生都係Band 1。
學社
[編輯]有四個學社，分別係：信社（英文名Faith，指「信心」）、義社（英文名Righteousness，指「公義」）、中社（英文名Loyalty，指「忠誠」）、學社（英文名Diligence，指「勤奮」）。
PE衫色水：信社－黃色，義社－藍色，中社－綠色，學社－橙色
學業及學業以外嘅表現
[編輯]香港高級程度會考方面，2006-07年度考生加埋攞咗17個A，攞A至C嘅有35.1%，符合本地大學最低入學要求嘅學生嘅百分率係83.3%。中文科嘅合格率係93.3%、英文科嘅合格率係96.7%（2005年嘅合格率係88.7%）、歷史嘅優良率係100%、文學嘅優良率係88.9%、地理嘅優良率係73.7%、經濟嘅優良率係46.7%、化學嘅優良率係42.9%。
香港中學會考方面，2006-07年度全部理科同學都攞到14分或以上嘅成績（最好六科），文科收生嘅平均成績係21.8分、理科收生嘅平均成績係23分。而且所有科目嘅優良率及合格率都高過全港水平，各科嘅合格率高過90%，中文嘅合格率係99.3%、英文嘅合格率係98.7%、生物嘅優良率係95%、化學嘅優良率係85%、物理嘅優良率係70%、電資嘅優良率係84.2%、地理嘅優良率係81%、歷史嘅優良率係78.5%、經濟嘅優良率係63.6%。
開嘅科
[編輯]中一及中二
| 主要科目 | 其他科目 |
|---|---|
| 中國語文 | 中國歷史 |
| 英國語文 | 地理 |
| 數學 | 世界歷史 |
| 通識教育 | |
| 綜合科學 | |
| 普通話 | |
| 視覺藝術 | |
| 音樂 | |
| 體育 | |
| 宗教 | |
| 其他學習經歷 | |
| 生活教育 |
爭議事件
[編輯]元朗信義中學曾經喺一啲政治事件入面，被指打壓同限制學生嘅表達得自由。另外，佢哋亦有一啲校規被視為具爭議性。
校外禁用手機同耳機嘅爭議
[編輯]校長尹浩然曾經以安全為由，禁止校外使用電話同埋配戴耳機。但係尹浩然自己平日就會戴耳機，被部分信義嘅學生揶揄呢件事為『信義力場』[1]。
香港逃犯條例爭議期間禁止學生着黑衫
[編輯]喺2019年9月20號，基督教香港信義會元朗信義中學舉行便服日，當時正值香港逃犯條例爭議，有學生醞釀當日著黑衫返學抗議政府逆民意修例，但校方就先前喺校內廣播話唔畀同學噉做，原因係「唔好將政治帶入校園」、「尊重包容」等等，如果學生違規，會通知家長接走佢。有同學就話，學校咁做無問過同學意見，以前從來冇唔着得黑衫褲嘅規例，做法苛刻。亦有同學覺得校方個宣佈無論語氣或者內容上，都畀人向學生施壓嘅感覺。當日記者訪問學生期間，有老師同埋校內牧師喺校門守候，並且以保護學生嚟做理由，召集屋邨保安驅趕傳媒[2][3]。
歌唱比賽歌詞文字獄事件
[編輯]喺2021年7月，兩位中五同學喺校內歌唱比賽度，本來報名唱樂隊Dear Jane嘅歌曲《銀河修理員》。但係校方政治審查同學嘅選曲，聲稱填詞人黃偉文所填嘅歌詞入面有「亂世」同「對抗」等等字眼，含有政治意思，淨係准同學唱改詞版嘅《疫情加油》。兩位同學喺晉身決賽之後堅持唱原版歌詞，其中一人亦喺表演完結後加上一句「香港人加油」。校方指佢哋「演唱未經審批嘅歌詞」而DQ佢哋，兼記佢哋大過（以該校標準計，即係9個缺點），禁止佢哋未來以呢間學校學生嘅身份參加任何校外比賽或活動，仲逼其中一個同學辭任佢本身嘅學會主席職位，影響佢哋報考大學所需要嘅課外活動履歷（OLE）。同時，亦聲稱佢哋「騎劫歌唱比賽」，又重申「歌唱比賽不是宣洩個人情緒的地方」。有記者跟進事件，但係副校長譚建勳拒絶對上述事件做任何回應[4]。之後近年喺學校推行愛國教育嘅教育局回覆話，任何人士不應利用學校作為表達政治訴求嘅場地[5]。
當時正值樂隊Dear Jane以延續聖馬力諾之心精神名義，喺2021年7月舉辦IG學校投票活動，選出最多讚好嘅學校申請作現場表演。事件發生前最多讚好嘅學校係高雷中學。事件被揭發後，唔少網民同其他媒體發出網絡號召力，讚好信義中學，務求Dear Jane申請喺呢間學校表演，短短3個鐘入面已經成功收集咗大約20萬讚好，超越當時排行榜第一位嘅高雷中學[6][7]。
事後《銀河修理員》喺中國大陸QQ音樂7月7號夜晚大約11點半被下架，導致事件喺大陸社交媒體「微博」引起討論。大量網民對呢首曲下架表示遺憾，唔明白點解情歌都能夠被解讀為政治立場。有人認為歌曲下架同元朗信義中學事件有關；另一方面有網民唔同意兩名中五同學行為，但係對歌曲被下架感委屈。亦有網民表示呢首曲喺武漢肺炎疫情初期帶畀人最好嘅安慰，反問係咪只可以唱紅歌[8]。
之後，學校更被揭發已經唔係第一次審查歌詞，2016年起，校方禁止同學喺歌唱比賽演唱有關愛情、遊戲、負面同含敏感字眼嘅歌曲。喺2020年，有學生演唱Supper Moment作品《無盡》，其中一句「人生夢一場革命至蒼老」，校方都要「河蟹」走[9]。
卒之，學校喺IG學校投票都係攞第一，只不過校方話安排唔到場地畀佢哋表演。
參考
[編輯]- ↑ 門徒媒體 (2021-07-10)。〈元朗信義學生踢爆尹浩然校長荒謬措施：禁止校外使用電話、配戴耳機〉。《門徒媒體》 (臺灣中文)。喺2021-07-10搵到。
- ↑ 〈【逆權運動】元朗信義中學便服日禁黑衫褲黑口罩 倘違規即通知家長接走〉。蘋果日報。2019-09-19。原著喺2020-01-03歸檔。喺2021-07-07搵到。
- ↑ 黃偉民賴雯心 (2019-09-20)。〈【逃犯條例】元朗信義中學便服日「反黑」 學生穿黑衫指校方苛刻〉。《香港01》 (香港中文)。喺2021-07-07搵到。
- ↑ 〈歌唱比賽演唱《銀河修理員》 元朗信義中學兩學生遭記大過 校方指歌詞含政治意味 | 立場新聞〉。《立場新聞 Stand News》。原著喺2021-07-07歸檔。喺2021-07-07搵到。
- ↑ 〈學生唱《銀河修理員》記大過 教育局：學校有責任加強訓輔工作| hkTec〉。hkTec。喺2021-07-08搵到。
- ↑ 〈Dear Jane 到校表演活動 元朗信義中學「銀河修理員」事件後票數飛升 終獲 28 萬 like 奪首名 | 立場新聞〉。《立場新聞 Stand News》。原著喺2021-07-10歸檔。喺2021-07-10搵到。
- ↑ 〈Dear Jane到校大合唱活動 元朗信義中學獲28萬like勝出 (17:47) - 20210710 - SHOWBIZ〉。《明報OL網》 (繁體中文)。喺2021-07-10搵到。
- ↑ 〈QQ 音樂《銀河修理員》下架 中國網民﹕我一直羨慕香港的自由，可是現在啊...〉。立場新聞。2021-07-08。原著喺2021-07-08歸檔。喺2022-01-11搵到。
- ↑ 門徒媒體 (2021-07-12)。〈元朗信義中學河蟹歌詞有前科 Supper Moment《無盡》需刪「革命」字眼〉。《門徒媒體》 (臺灣中文)。喺2021-07-13搵到。
出面網頁
[編輯] |