報販霞姐被殺案

出自維基百科,自由嘅百科全書
Jump to navigation Jump to search

報販霞姐被殺案香港一單謀殺案。1999年9月22號清晨,喺香港深水埗,女報販何慧霞(霞姐)因為代表區內報販向《東方日報》嘅發行商拒絕強行增加訂紙,俾三名兇徒亂刀斬死。案發後,刀手三人同發行商兩人先後被判終身監禁。

事件背景[編輯]

1999年,東方報業集團正促銷旗下報章《東方日報》及《太陽報》,要求報販增加訂購報紙嘅數目,但惹來何惠霞等長沙灣、深水埗區報販不滿,拒絕要求,為此何惠霞同《東方日報》區域發行商青匯書報社有限公司蔡偉強商討「退回賣剩報紙」機制。

根據《明報》及《蘋果日報》2006年12月嘅報導,死者丈夫劉炳新憶述事件,「以前我哋報販每日要幾多數量就打畀青匯,青匯平時第二日就會送……今次青匯有個負責人向我太太講,因為《東方日報》要促銷,所以本身訂100份要收多50份,而多出嘅50份都要畀錢,畀足150份。」劉又指出,無論最終額外加嘅報紙賣唔賣得出,發行商都唔會回收。佢於是應老婆要求致電《東方日報》,對方負責人話會將事件記錄落來,不過劉之後並無收到《東方日報》嘅電話。劉表示,由於發生呢次無理加紙事件,深水埗區報販成立咗「報販零售業工會」,老婆喺工會做司庫。

案發前10日,即係1999年9月12號,劉氏夫婦及其他報販首次同青匯代表,商討訂紙嘅新制度,但會面並無成果。霞姐喺3日後同區內報販會面,一致反對青匯無理加紙,並安排由霞姐向青匯以及《東方日報》總發行商「青揚」表達有關報販嘅不滿。[1][2]

兇殺經過[編輯]

根據《蘋果日報》喺2006年12月28號嘅法庭報導,法庭上控方證人嘅口供指出,1999年9月22號清晨大約5點15分,酒樓看更致電死者丈夫劉炳新,劉即刻趕去報紙檔,「我見到我太太坐喺樓梯,滿身鮮血,地下好多血,有個差人正為佢急救……然後我撲向我老婆嗰度,要差人快啲叫救護車。」

法庭審理[編輯]

本案由於其中一名共犯連宗偉喺中國大陸販毒落網被判死緩,因此供出同謀而破案[3]

4名被告喺警誡之下都承認涉案[4]。首被告盧漢興話,受《東方日報》區域發行商青匯書報社有限公司負責人蔡偉強指使「教訓」霞姐,第二被告李祖明及第三被告林自力都聲稱只負責睇水,而第四被告梁志鴻就負責施襲,另有一名男子連宗偉負責揸車。蔡偉強試過俾警方拘捕,但因證據不足而撤銷控罪。

2007年3月22號中午,六男一女組成嘅陪審團開始退庭商議,至到3月25號下晝5點15分,陪審團一致裁定盧漢興、李祖名、梁志鴻謀殺罪名成立,26號被判處終身監禁,林自力誤殺罪名成立判處監禁12年[5][6]。主審法官包鍾倩薇指出,佢哋背後必定另有主腦,要求佢哋供出,或有機會獲得減刑或假釋。2010年6月,警方根據被定罪刀手等人嘅口供,拘捕兩名涉嫌主腦吳錫基及蔡偉強,2011年11月喺高等法院提堂[7]。2012年5月30號,兩名被告吳錫基及蔡偉強謀殺罪名成立,喺高等法院俾法官貝珊判以終身監禁[8]

媒體報導[編輯]

2007年3月27號,多份報章都以頭版大篇幅報道判刑嘅消息,不過,東方日報同太陽報就完全冇報道呢單新聞。而喺2012年5月31號,多份報章都有報道主腦判刑嘅消息,呢次包括東方日報同太陽報。

參考[編輯]

  1. 99年霞姐被殺案開審 丈夫供述被迫促銷報紙,蘋果日報,2006年12月28日
  2. [ 霞姐曾預告:我就快畀人斬],《明報》,2006年12月28日
  3. 警方破案示意圖,蘋果日報,2007年3月27日
  4. 首被告作供:發行教訓霞姐「阻搵食」,斬人前坤哥請沖涼按摩,《明報》,2006年12月29日
  5. [七年前女報販被斬死案三被告謀殺罪名成立],星島即時新聞,2007年3月25日
  6. 霞姐案3兇手裁定謀殺 另一被告誤殺罪成 主犯仍在逃,蘋果日報,2007年3月25日
  7. 女報販兇案 兩涉嫌幕後黑手受審 殺霞姐兇手頂證主謀,蘋果日報,2011年11月3日
  8. 女報販被殺案 殺霞姐兩主腦囚終身 官慨嘆:裁決帶來的公義來得太遲,蘋果日報,2012年5月31日