大內密探零零發
《大內密探零零發》（Forbidden City Cop）係香港喺1996年出嘅電影之一，係笑片巨星周星馳主演嘅喜劇作品。
電影資料
[編輯]制作
[編輯]- 出品機構：永盛娛樂製作有限公司、三和娛樂製作
前言
[編輯]呢套戲係以古代嚟做背景嘅幻想式搞笑故事；講皇帝身邊嘅秘密侍衛「保龍一族」點樣去破壞外族嘅入侵大計。
劇情大綱
[編輯]皇帝身邊有一隊四個人嘅大內秘密侍衛隊，叫做「保龍一族」，佢哋係世代相傳咁接任，專職保護皇上同埋皇宮一切產業；呢四大侍衛分別係－－－刀槍不入鐵布衫嘅零零恭、腿勁縱橫碎石腳零零喜、拳風虎虎五形拳嘅零零財，同埋乜嘢武功都唔識，剩係識得搞發明嘅零零發。阿發醉心於發明，成日運用智慧發明出好多新奇嘅物件，之但係皇上就唔覺得呢啲係專長，因為智慧唔足以保護佢安全，所以成日都鬧阿發唔長進唔練武；亦因為咁，皇上唔使阿發成日留喺皇宮中，畀佢喺出面做個婦科醫生嚟掩飾，聽候差遣。
一晚當阿發巡緊皇宮嘅時候，發現紫禁城屋頂企咗四個人喺度，原來係白雲城主葉孤城同埋劍客西門吹雪要喺度決鬥，而四條眉毛陸小鳳同風流盲俠花滿樓就嚟觀戰；正當葉城主使出一招劍風凌厲嘅天外飛仙劍法嘅時候，阿發突然出手將手扣扣喺葉城主隻手度，葉城主為咗收買阿發等佢哋可以繼續決鬥，於是送咗本《天外飛仙秘笈》畀阿發想打發佢走，但係阿發為要保護皇城而唔領情，四個武林高手冇晒癮，於是一躍而起消失喺空氣中，令阿發目瞪口呆。返到皇宮，皇帝睇過其餘三個保龍成員表演武功之後，就問阿發近排喺度搞乜，於是佢向皇上展示一對新發現嘅磁石，一對風扇葉，同埋含喺口度發射嘅小型鋼珠炮台嘅小發明；皇上對呢啲嘢一啲興趣都冇，當知道阿發得到本武林秘笈都冇去練，就直頭趕咗佢出宮唔想見到佢同埋唔想聽到佢把聲。
阿發喺屋企嘅時候，除咗會開診睇病，得閒會同佢老婆潘家玲分享佢發明嘅作品，或者打吓摔交；佢老婆係一個持家有道好識得投丈夫所好嘅小婦人，但佢其實一路都唔知阿發真正身份係一個大內密探，剩係覺得阿發係一個好偉大嘅醫師同埋發明家。
呢一日當阿發同佢老婆試緊最新發明嘅抽油煙機時，突然嚟咗個好似鬼咁樣飄住行嘅女人嚟睇症，原來佢就係保龍一族嘅情報人員，佢特登扮成女人鬼聲鬼氣咁嚟話畀阿發知，皇上嘅近身國師佛印好急住要搵佢幫手，叫佢即刻返皇宮。當阿發返到皇宮，只見到山咁高嘅碗碗碟碟等緊佢同佛印去洗；洗碗期間，阿發偷聽到其餘三個保龍成員稟告畀皇上知，話隔離金國有天外飛仙（外星人）嘅解剖會，正喺度邀請所有中原名醫去研究；皇帝聽到之後非常之有興趣，決定參與呢個難得嘅盛會，而阿發心裏面知道金國人想侵佔中原好耐，驚呢個係陰謀，想勸皇上唔好去，但係因為皇上話過唔想見到佢同唔想聽到佢把聲，加上佛印阻止，最終都係冇講到。
喺金國境內金山教嘅大營入面，面上冇五管只得一塊面皮嘅教主無相皇正喺度講解入侵中原嘅初步計劃，佢利用解剖天外飛仙名義嚟吸引中原嘅醫師前去，然後將呢班赴會嘅醫師殺晒，等中原嘅軍隊冇醫師可以用，咁就可以乘虛而入侵佔中原。無相皇練就一身無相神功，氣勁可以隔山打牛，穿透一個身體去打另外一個身體，威力飄忽無蹤，不過因為佢練功時走火入魔，所以搞到塊面冇晒五官而淨得一塊白面皮；而無相皇老婆同個仔亦係武林高手，佢個仔黑白無常個身重可以分開一黑一白兩邊嚟同時打兩個唔同方位嘅敵人，詭異莫測。
阿發唔能夠出聲勸皇上唔好犯險，返到屋企仍然悶悶不樂，佢老婆家玲唔知道佢係為皇帝擔心，只知道佢想出席金國嘅醫學會議，於是支持阿發同佢一齊去金國。呢邊廂，保龍三侍恭、喜、財陪住皇上微服前往金國，但係路上居然遇到無相皇老婆同黑白無常偷襲，最終保龍三侍因為唔夠打而戰死；另一邊廂，阿發同家玲拖住手仔一路食一路玩，唔覺唔覺就到咗金國國境。
個解剖會果然聚集咗好多來自中原嘅醫師，家玲因為驚見到啲解剖核突嘢，於是叫阿發自己入去睇，佢就去個墟度行街買嘢。阿發入咗場，同幾個醫師打交道之際，解剖會嘅睇真啲司儀就行出嚟宣佈解剖會就嚟開始，不過因為佢講得太長氣，班醫師唔耐煩即刻衝晒上台圍住隻天外飛仙研究；阿發發現原來隻飛仙係女性，因為佢係婦科，所以眾人就推舉咗佢出嚟落刀做解剖，但係佢細膽，於是其中一個調制枇杷膏嘅醫師攞起把刀決定親自落手。呢個時候，喺解剖壇度圍住飛仙嘅一班醫師重未知大門已經俾人鎖咗，幾個殺手亦已經開始趁人堆唔覺，一路咁暗殺喺下面睇嘅醫師。
殺手已經殺晒解剖壇下面嘅醫師，但係個枇杷膏醫師重度緊落刀位置，正當大家催佢快啲郁手時，阿發突然制止，個枇杷膏醫師嚇一嚇就斬咗落飛仙隻手度，點知隻飛仙居然痛到成隻彈起狂叫，阿發一聽把聲就認出佢原來係皇上！而到咗呢個時候佢哋先發現原來成個場只剩返佢哋生存。殺手一湧而上向解剖壇展開廝殺，突然其中兩個醫師大顯神威，利用拎刀搵食嘅本領將一眾殺手殺晒，不過始終敵唔過黑白無常嘅分身術，企出嚟抵抗嘅醫師就咁當場慘死；阿發睇住黑白無常時黑時白咁變嚟變去，居然俾佢睇穿咗黑白無常嘅分身技倆，黑白無常於是發難，而阿發就拎出兩塊好大嘅磁鐵出嚟，最後利用異性相吸嘅原理，一塊攝去黑白無常嘅身上面，一塊攝去個大火盤度，於是黑白無常俾引力扯咗去大火盤度監生燒死咗。
營帳出面，嚟參加盛會嘅人都俾金山教軍隊殺晒，屍橫遍野，而喺門等待嘅無相皇同佢老婆見到出嚟嘅竟然係阿發皇上同埋一眾醫師，就知道佢個仔已經打輸咗，於是開始向佢哋發動攻擊；不過阿發已經早有準備，除咗先前嘅大磁石之外，今次就拎出佢嘅一對大風扇葉預備一夫當關，佢先將啲射埋嚟嘅鋒利樹葉吹返轉頭，跟住再將改良過嘅口含小炮台放喺口度，用風扇葉令自己變成直升機飛上空中向地面嘅敵人開火；最後金山教大軍全軍覆沒，無相皇嘅老婆炸死咗，而無相皇就趁亂走甩咗。家玲就好彩去咗另一個市集睇嘢，冇俾人殺死。
返到皇宮，皇上將頭頂上嘅珍貴夜明珠送咗畀阿發嚟獎勵佢護駕有功；而佢就將呢粒係女人見到都會瘋狂嘅夜明珠送咗畀佢老婆家玲，搞到家玲開心到失控重成面口水鼻涕。
冇幾耐之後，皇上召咗阿發入宮話有個大難題，就係後宮雖然佳麗三千，但係個個養到肥豬咁重醜到無人有，佢聽聞京城嘅妓院慧賢雅聚嚟咗班金國佳麗，個個國色天香，於是派阿發去睇吓辦。
喺妓院裏面，呢班金國嚟嘅佳麗當中，有一個絕色美女叫做琴操，不過想同佢小聚一定要經過考驗，而阿發最終都通過考驗得到同琴操一聚嘅機會；阿發俾琴操深深吸引，重將先前送咗畀老婆嘅夜明珠靜靜雞偷出嚟轉送畀佢，不過琴操不以為然，只嘆阿發已經係人哋老公，唔想破壞人哋嘅家庭而拒絕阿發嘅追求。
到咗家玲生日嗰日，阿發屋企開咗圍檯請班親朋戚友返嚟食飯，席間家玲質問阿發點解早幾日喺佢身上聞到嘅清香煙脂水粉味同阿發送畀自己嗰隻嘅味唔同，同埋問阿發知唔知粒夜明珠去咗邊度，而阿發個外父就乘機踢爆話睇到阿發早幾日走入妓院，但係咁多質問都俾阿發一一切詞瞞過咗。
正當人人以為阿發一身清白而慶祝嘅時候，忽然間聞到一陣清香嘅煙脂水粉味由大門外面傳入嚟，門一打開，只見琴操一臉幽怨咁慢慢行入嚟話要買當歸，希望心愛嘅男人「當夜歸來」；家玲知道咗嗰種清香嘅水粉奪魄勾魂只係琴操先有，而琴操重要火上加油，將阿發送畀佢嘅夜明珠拎出嚟話當生日禮物送畀家玲，於是家玲就向阿發發難，而阿發見事情敗露，於是直頭同家玲攤牌，帶住琴操離開屋企。
兩個人返到慧賢雅聚輕歌漫舞，一支連住鐵鍊嘅孔明燈就徐徐咁升上天；正當琴操舞得興起嘅時候，忽然間樓上響起嘅皇上嘅聲音，而昏暗嘅大堂亦變到燈火通明，原來皇上收到琴操密函話阿發欺君想將佢據為己有，於是皇上連同丞相，佛印及一眾大內侍衛埋伏喺慧賢雅聚度等阿發出現，大興問罪之師。
皇上一聲令下，眾大內高手隨即跳出要將犯人捉拿，而琴操竟然發現自己已經俾鐵鍊枷鎖纏身，重俾一大班持大刀嘅侍衛圍住。琴操一頭霧水就問皇上點解，而阿發就當場踢爆琴操就係無相皇假扮嘅，因為要報滅門之仇而向阿發埋手，同埋想搵機會埋皇帝身將佢刺殺，再引兵入關一統中原，實行一石二鳥。原來阿發當初用夜明珠嚟試探琴操，見佢竟然咩反應都冇，就知佢唔係女人，於是連同屋企人做場反面鬧交嘅戲嚟引琴操上當；捉犯人嘅現場重即場舉行咗金銅獎頒獎典禮，頒發最佳男女主角獎項俾家玲同埋阿發……
……嘅外父。
琴操（無相皇）見事敗，就現出真身爆開晒身上嘅枷鎖，重將圍住佢嘅侍衛統統殺死；呢個時候，天空雷聲大作，而保龍情報員就好似鬼咁出現，使出移魂大法用粗鐵鍊將無相皇縛住，呢條鐵鍊就係連住支引雷孔明燈嗰條。無相皇喺個閃電未打落嚟之前就將條鐵鍊爆爛，阿發見到咁，就以最快速度拎起條鐵鍊向住無相皇衝過去，點知未衝到去，閃電落嚟嘅電流就將阿發電到飛起；喺電流過後，燒燶咗嘅阿發慢慢咁企返起身，重勁到可以使出葉孤城嘅絕招天外飛仙劍法，將無相皇切成幾廿塊。
阿發再一次化解皇上嘅危機，阻止咗金國嘅入侵，而且重打通咗任督二脈練成蓋世奇功，得到皇上大大讚賞；只係阿發今日冇返工，而係去咗同家玲玩嗰個用一孖風扇葉同一雙手發動嘅「發發發發機」（直升機）。
而故事亦喺兩個人飛向朝陽嘅鏡頭之下結束。