大慶石油會戰

大慶石油會戰（粵拼：daai6 hing3 sek6 jau4 wui6 zin3）係中華人民共和國初期一件歷史事件，發生喺1960年到1963年。所謂「石油會戰」，係指集中全國力量開掘油田。由於大慶油田係中國發現嘅第一處大油田，自此改變中國依賴入口石油嘅局面，促進中國石油工業嘅發展，所以呢場石油會戰意義好大。而家喺大慶薩爾圖有條街道起名做會戰街道來紀念呢件事。

背景

中國喺舊陣時無開發到油田嘅，甚至畀美國美孚公司宣佈「中國無石油」，即係「中國貧油論」，所以嗰陣時中國石油靠入口。1953年，第一個五年計劃實施，但係啲石油唔夠，要使外滙入口原油、成品油，石油工業係唯一無完成一五計劃嘅單位。直到1959年，中國石油產品銷售量爲504.9萬噸，其中自產205萬噸，自給率40.6%。而當時中國經歷一系列政治、經濟動盪，國民經濟崩潰，1960年，中國需要原油1000萬噸，缺口一半以上，巴士因爲無油要孭煤氣、酒精、木炭出街。甚至連空軍嘅飛機都飛唔到。

搵油田

石油作爲緊要嘅戰略資源，係好多國家爭嘅嘢。1928年初，「中國東北有石油」呢件事傳得好墟冚，日本人亦想搵，自1929年起佢哋就開始喐手，搵過牡丹江、錦州、阜新、扎賚諾爾、豐寧，但都搵唔到。九一八事變後，日本勢力更加方便喺中國東北搵石油，扎賚諾爾係重點地區，但都未搵到。1939年時喺阜新搵到石油類礦物，但無開採價値，實質上呢度離遼河油田先隔座山。1940年，日本石油公司、軍方放棄喺中國東北搵石油嘅計劃，轉向南洋度搵。

而家認爲，日本之所以搵唔到石油，一個係鑽探技術未得，一個係無深入認真噉鑽探，鑽探範圍、密度唔夠。而中國地質學家、陸相成油論嘅提出者黃汲清認爲，日本人用咗30年都無搵到油田，而中國人用五年就搵到，係因爲日本人唔知陸相地層可以生油，換言之，係日本人嘅探礦思想有問題。當時日本信嘅理論係「海底腐泥起源說」，而大慶屬於北滿，係理論上嘅貧油區，所以無重點搵。

喺日本有個傳聞，話1920年時美孚就搵到大慶油田，但係美國政府唔畀佢宣佈，重要佢宣稱「中國貧油論」。而美國人噉做，係因爲東北係日本勢力範圍，而日本石油靠美國入口，美國驚日本有咗石油就無咗制住日本嘅手段。不過呢個講法有待證實。

喺中華人民共和國成立後，搵石油嘅重點喺西部。喺黃汲清提出陸相成油論之後，1953年，地質學家李四光用呢個理論發現松遼盆地有油氣嘅證據。1958年，按鄧小平嘅睇法個重點轉向東部。

1959年4月，喺黑龍江肇州大同鎮嘅松基三井開鑽；8月3號有油氣跡象；9月26號晏晝，噴出工業原油，正式發現油田。因爲咁啱就來係中華人民共和國十週年國慶，根據黑龍江省委書記歐陽欽嘅提議，起名做「大慶」，同時黑龍江省人民委員會根據歐陽欽嘅提議，發咗份《關於成立大慶區和將大同鎮改為大慶鎮的決定》。

石油會戰

發動

松基三井日產原油13.02噸，用五個月試採，測得產量穩定可靠。1960年1月，石油部開會，想發起多啲人去發掘油田。2月13號，石油部向中共中央提交份《關於東北松遼地區石油勘探情況和今後工作部署問題的報告》；2月20號，中共中央批準；2月22號，中共中央決定從當年解放軍退伍官兵中抽三萬人去做勞工。自此將四萬石油職工（來自37個石油廠礦、院校）、三萬轉業官兵、國務院一啲部門人員調曬去大慶油田，喺薩爾圖舉行誓師大會，開始咗大慶石油會戰，由時任石油工業部副部長康世恩做大慶石油會戰領導小組嘅組長。後來返唔到城市嘅落鄉知青都加入埋。正因爲噉，而家嘅大慶係黑龍江人口構成最豐富嘅市。

當時呢場石油會戰係行內先知，對外保密，因爲呢個油田好緊要，所以要國家保密。會戰指揮部對外嗌「薩爾圖農墾總場」，下屬單位「農墾分場」。保密到就連啲工人返鄉下探親，畀差佬以爲係「勞教逃犯」而拘留。

環境

當時環境好艱苦，條件好差。嗰時大慶重係好荒涼嘅草原，又凍，幾萬人就噉聚喺荒原，幾乎無到生活設施；上頭無錢投資開發，設備、技術亦落後；人才少，無開發大型油田嘅經驗。有啲人覺得唔似搞工業，好抵觸，而因爲辛苦，好多人走佬，高峰時有過千人出走。因爲當地係盆地嘅底，1960年時雨水多，積水深到行唔到路。無屋住最頭痕，呢啲高寒地帶半年係冬天，最低溫度-40℃，無屋過唔到冬，而磚屋起唔到，因爲無人無物亦無金，啲人唯有靠瞓牛馬欄、帳篷、板房、就地挖個坑噉瞓，幾阿個人攬埋一齊保暖，後來掘到啲油，就燒油禦寒，不過原油一燒煙大，攻到面黑曬。

無嘢食又係煩，因爲營養唔夠，有4595人浮腫病，啲人靠食野菜，後來啲人自己開荒耕田搵食，比如1961年黑龍江批畀佢哋10萬畝嘅北安荒地，到1963年開荒17萬畝，產糧2700萬斤，噉先至有嘢食。

原本開發噉嘅油田係要有大卡車、工程車、吊機來運設備，呢啲設備總共幾萬噸重，但係唔夠車，於是係靠人力從火車站拖到幾公里之外嘅工地。鑽油井要水，啲鑽機裝咗，無水等於廢鐵，而車少，啲人就人手用盆、桶運水，總共運埋幾十噸水。幾千部機器運作要人維護，但係無維修廠，啲工人都係現場露天維修。

有啲人捱唔掂，亦有啲人頂硬上，比如畀中共宣傳嘅鐵人王進喜，就話佢哋呢班人就好似佢噉搏命，唔驚艱難，稱之爲「鐵人精神」、「大慶精神」。此外重有五面紅旗，係指石油會戰入面嘉獎嘅五個人，分別係王進喜、馬德仁、段興枝、薛國邦、朱洪昌。而喺之後，1963年10月下旬國家經委同東北局經委開咗個座談會，決定宣揚大慶事蹟同經驗，之後寫咗份報告去北京，1963年12月25號，毛澤東發出「工業學大慶」嘅號召，號召發出後，全國有125萬人訪問大慶。

成果

呢場石油會戰持續咗三年半，共探明油田面積860平方公里，建成第一期嘅大型煉油廠，間廠可以年產原油500萬噸，三年落來累計產出原油1166.2萬噸，佔同期中國原油產量51.3%。財政上繳10.6億元，兜返本之外，亦爲國家累積資金3.5億元，從根本上改變中國石油工業嘅面貌。同時喺開發過程中，解決咗世界油田開發幾個重大技術難題。

1960年6月1號，裝咗21節油罐車嘅火車將大慶油田第一批產出嘅原油從薩爾圖站運去錦西第五煉油廠。自此，大慶油田改變中國石油依賴入口嘅局面。

問題

大慶石油會戰雖然個成果好大，但係大慶油田嘅管理問題亦都係從會戰時賴低。最大嘅特點係政治化，凡事搞群眾運動，而唔係建立一套規章制度去管理；領導層係黨委集體，唔係由廠長帶頭；因爲政治化，經濟效益上唔計盤數，取消計件人工，所以經營管理上好差。而礦區嘅規劃係村鎮仔嘅模式，會戰總部直接設喺油區，無將辦公、生活區同工礦區分離，結果投資大，效益低，日後嘅城市化亦破壞當地草原生態。同時處以上嘅領導幹部生活舒服過其他人，比如食得好過人、辦公規格高、領導會議多而他他條、工仔餓肚做餐死、開交誼舞會。

而爲咗攞個名，油田嘅面積、石油儲量計算好粗疏，水份大，急住去宣傳。同時1960年時劃30萬平方公里做實驗，結果汙染草原、浪費原油，而實際上油田開發應該喺勘探完後、制定完備開發方案先好開始，但因爲急，結果搞成噉嘅局面。喺宣傳大慶事蹟時，配合當時毛主義政治運動，喺噉攞「毛澤東思想」吹水，結果掩蓋真正嘅大慶經驗、以及問題，呢種政治化好傷大慶油田嘅發展。