女人街

旺角女人街行人專用區

女人街（英文：Ladies' Market）係香港登打士街至亞皆老街嗰一段通菜街嘅俗稱，位於油尖旺區，係旺角嘅一個觀光購物地點同小夜市。

歷史

1970年代，香港有好多小販喺路邊無牌經營，除咗影響市容之外，亦為居民帶嚟不便甚至危險。為咗將佢哋規範化，市政局喺1975年3月14號喺九龍嘅20個地點推行「小販認可區」計劃。亞皆老街至山東街嘅一段通菜街，就係第一個獲准成立嘅小販認可區，其後延長至登打士街。由於街道早期嗰啲攤檔售賣嘅物品，多數以女性服裝同女性用品為主，所以俗稱女人街。

現況

現時，女人街已經成為香港人同外地遊客嘅購物地點。而所售賣嘅物品亦已經趨向多元化，包括各種家居用品、男女服裝、化妝品、手袋、手錶、飾物、玩具、香薰等等。由於貨物都係價廉物美，所以能夠吸引大量人士到訪同購物。攤檔一般喺中午開營業至夜晚十一點為止。女人街外圍附近亦有唔少熟食檔同濕貨攤檔。

事件

韓國瑜搞烏龍用香港女人街照片做文宣

女人街算係亞洲其中一條最有名嘅香港街道，除咗香港亦有唔少台灣人認識。喺2021年8月8號，針對行政院規劃嘅振興「五倍券」，台灣前高雄市長韓國瑜喺Facebook呼籲政府能夠苦民所苦，體察民意。不過有網友發現，韓國瑜喺嗰篇文章嘅配圖竟然係香港女人街，引發熱議同揶揄。

出面網頁

• 香港旅遊發展局 - 女人街