屌你老母

屌你老母（粵拼：diu2 nei5 lou5 mou5*2，俗寫做𨳒你老母）係句廣東話俗語，字面解係[我同你阿媽𨳒閪]實際用途係𨳒你老母閪咁嘅意思。

問候人喺中國各方算係種共同文化，魯迅就話如果代表中國嘅花牡丹叫做國花，咁問候人法就係中國「國罵」¹。

旁白話指話某某「屌人（哋）老母」，多數係代表某人用「屌你老母」呢句嘢黎打招呼。

好耐之前，流行嘅版本係屌那媽（diu2 naa5*3 maa1／diu2 naa5 maa1），往往俗寫作丢那媽，當中「那」係「你啊」嘅連音。

其他話

喺第啲話入面，有對等日常用詞，例如普通話就叫「肏你媽」、「他媽的」、「幹你娘」，喺網絡上便隱晦啲會寫成「草泥馬」。閩南話就話「駛恁娘」、「姦恁娘」、「姦恁娘膣屄」、「幹恁娘老膣屄」。除咗「幹」同「屌」，其他形容重有「肏」、「尻」、「日」、「直」、「弄」。

意思種類

鬧人老母分三種，一種係無意義嘅粗口，純粹只係自己發洩情緒，甚至係口頭禪，叫做「穢語」，另一種就用嚟鬧人，比較具攻擊性，叫做「詈語」。

文化意義

屌你老母屬於同性有關嘅粗口，呢個類別，係基於男尊女卑嘅觀念而嚟嘅。中國文化傳統以來，提及對象家人嘅惡言，就只有「屌」人老母，咒人絶後，或者鬧人全家，好少單單數人老豆。有人認為其中一個原因，係由於中國儒家文化重視「宗」，如果某人唔係由已結婚夫婦生出嚟嘅，就無名份，地位會低啲，俾人叫雜種或者野種。若然阿甲「屌」阿乙老母，而阿甲又唔係阿乙老頭，即係話阿乙係雜種，低等人。另一個講法又係同儒家文化有關，儒家觀念入面好重視「孝」，而鬧人老母就觸犯對方重視嘅「孝」，同時又貶低對方老豆，令對方受到極大侮辱。不過近年好多人都認為噉樣屌人老母係屬於一種性語言暴力，所以都唔係好鼓勵。「屌你老母」一早已成諺語，啲人講呢句，又或者係佢嘅變種版本時，腦海唔會浮現任何字面意思。

變種

  提示：呢篇文講嘅唔係鹵味。

本罵辭變種無數，將原版委婉化或者激烈化，譬如「delay no more（『屌你老母』嘅英文擬音；簡寫：dllm／dnlm／dlnm）、「（屌）佢老母（簡寫：(d)klm）」、「（你／佢）老味」、「（你／佢）老頭」、「你（／佢）老板」、「（屌）（你／佢）老母臭屄」、「頂你個肺（『屌你個屄』嘅擬音，有時加長作順口溜『～，塞你個胃，打到你花開又富貴。』或『～，插你個胃，㩒你個肚臍機關掣。』」、「屌你冚家」（字面意思：我同你全家人扑嘢）、「問候人哋阿媽」( 咒罵人哋阿媽)……

軼事

民間傳說，明朝將軍袁崇煥帶兵打仗時，會用口頭禪「掉哪媽！頂硬上！」激勵士氣。喺東莞石碣鎮水南村袁崇煥紀念園，入面一個袁公嘅雕像個基座道，以前刻咗呢句嘢，配上英文翻譯「FUCK HIS MOM! HIT THE HARD!」；後來鏟走咗，引來爭議。趙冰嘅考證話以上搞錯咗，而其頭三字之正確寫法為「屌那馬 」，當中嘅「馬」指當朝奸臣馬士英。

腳註

• 註 1: 魯迅《論他媽的》：無論是誰，只要在中國過活，便總得常聽到「她媽的」或其相類的口頭禪。即使依或人聽說，牡丹是中國的「國花」，那麼，這就可以算是中國的「國罵」了。