屌
想搵「𨳒」字嘅其他意思嘅話，請睇𨳒。屌（粵拼：diu2，
聽）[註 1]，俗寫𨳒，或者屌你老母，原本意思係男人陰莖[1]；之後引申出（企喺男方角度）形容性交時，陰莖抽插陰道動作嘅意思[2]，此義相當於官話嘅肏（俗寫成「操」）字所指[3]；古時官話就已經會用個「屌」字嚟鬧人[4]。
多數忌諱字詞嘅意思都會越用越濫；「屌」唔係例外，喺性交動詞意義上，可以泛指各種插入式性行為。
粵語
[編輯]「屌」指男陰時，同「勢」對應；前者係個方言俗字，後者見於文言經典[5]。今時今日喺粵語，「屌」係五個所謂粗口字之一，大致有四個意思：一、啲嘢唔順嗰陣，有人會嗑「屌！」噉樣感嘆，所以亦算係一個助語詞；二、亦都會用來表示「扑嘢」；三、用「屌」字嚟鬧人，幾乎只會強調對被鬧者嘅不滿，同色情無關——譬如，甲鬧乙：「屌你老母……」並唔代表甲想同乙個阿媽搞嘢或者批評乙嘅阿媽；甲亦都可能係女性；四、指鬧人呢個行為；「屌人」好多時係指「大鬧人哋」，期間亦都未必用到個「屌」字。
官話
[編輯] |
大陸
[編輯]會用正字「肏」、「入」（將「肏」拆走下半截得出），以及「肏」或「入」嘅多個近音字。[6]。
臺灣
[編輯]响當今臺灣國語，要粗鄙談性或者傳遞悲憤情緒時，總係靠「幹」同「肏」等字表達。「屌」喺台灣解做「好勁」，通常用於口講，唔係忌諱字，流行意思同廣東口語嘅大相徑庭。喺大陸普通話，該字定位介乎上述兩種狀況之間。
頭號禁字
[編輯]喺粵語地區嚟講，「屌」可以話係頭號禁字，由於呢個字喺粵語嚟講性質相當有侮辱性同攻擊性；語帶憤恨噉用，就幾乎等於撩交嗌／打。
香港
[編輯]喺香港，雖然無公開嘅官方文件指明話呢個字係粗口[7]，但係暗地裏有共識，都將呢個字列做粗口兼避用，而政府部門實際上會要喺嚴肅場合道用呢個字嘅人付出代價。喺要靠牌照運作嘅電視、電台等即時傳播媒界，「屌」直頭係頭號禁字，有講「屌」就要用「嘟」一聲去冚住佢，而喺電影出現「屌」，亦都會帶來被評為三級片嘅風險。傳播媒體唔畀講，係根據《廣播事務管理局條例》，但同樣無列明粗口定義，只要有人投訴，就當係粗口（經考察後）。其實傳媒機構有內部守則，講明「屌」字屬粗口。喺立法會會議道講，就隨時會俾主持人下令收聲，甚至趕離場。話雖如此，香港嘅有牌電台同電視台，都有大把直播新聞節目隔唔澌呢個字；喺激烈示威嘅現場，憤怒民眾同失控差人冇停嘅「互屌」（粗鄙對鬧，尤其是狂嗌有個「屌」字嘅詞句嗰種）嘅聲[8]，往往會經大氣電波傳播到出去；每當幕後人員發現唔對路，就可能會消音一陣間，不過反應多數都唔夠快；觀眾同聽眾依然會斷斷續續噉聽到好多橫飛嘅粗口。
「屌」字因為用途廣泛，堪稱「百搭」，所以成為香港人最常用粗口。
2017年3月26號第五屆行政長官選舉裁定問題選票嗰時發現一個選委喺選票上寫上「屌」字嚟宣泄對小圈子選舉嘅不滿[9]。
字源
[編輯]其實屌字因為意思粗鄙，所以用字去正經記錄嘅人唔多，坊間往往誤解佢有音無字，亦出現咗好多求其寫法，好似「肏」、「丟」、「吊」、「𨳒」、「掉」、「丢」、「小」、「挑」同「刁」等。[10]《康熙字典》就以「屌」字為正寫，《李氏中文字典》同《香港粵語詞典》就以「𨳒」做正寫。至於選字究竟係從古（「屌」）定係從眾（「𨳒」）好啲，未有定論。由於「屌」見於古文言經典，各個電子中文編碼系統，喺好早嘅版本都就已經開始支援。相反，「𨳒」喺中文之中，只係個近代嘅新造字，到咗1999年，先至隨着官方嘅香港增補字符集收錄，而納入規範當中。
臺灣講「屌」
[編輯]屌字嘅官話發音係（ㄉㄧㄠˇ［注音］；diǎo［漢語拼音］）[11]。傳媒上嘅新潮用法，源自臺灣MTV channel一段宣傳：「MTV音樂台，好屌！」。呢句嘢由有「廣告教父」之稱嘅孫大偉創作出嚟，原本意思係：「音樂是有重量的」，形容音樂打動到人嘅能力。廣告出咗街之後，臺灣人亦更加流行噉樣用呢個字，好多人鍾意用「好屌！」去形容一啲好正，令人動容嘅嘢[12]。
越南文講法
[編輯]屌字嘅北越用個「địt」字，讀[ɗit˩]，接近粵音嘅「秩」。
屌字嘅南越用個「đụ」字，讀[ɗʊu̯˨˧]，接近粵音嘅「dou⁵」。通常係同個「má」字一齊用，「đụ má」，讀 ̣[ɗʊu̯˨˧ ma˦˥]，接近粵音嘅「（dou⁵）媽」，就係「屌你老母」嘅意思。
經典凡例
[編輯]江浙方言同客家話入面，「鳥」、「屌」同音，所以亦有人用「鳥」當「屌」字寫，例如《水滸傳》入面，施耐庵就用「鳥」做「屌」：「武松指着蔣門神，說道：『休言你這廝鳥蠢漢！景陽岡上那隻大蟲，也只三拳兩腳，我兀自打死了！量你這個直得甚麼！快交割還他！但遲了些個，再是一頓，便一發結果了你廝！』」
金朝董解元《西廂記諸宮調》卷三亦出現屌字：「怎背誦《華嚴經》呵？禿屌！」
袁崇煥：「掉哪媽！頂硬上！」[13]
註腳
[編輯]- ↑ 時興發音只此一種，經典詳盡記載字形。
參考
[編輯]- ↑ 〈存档副本〉。原先內容歸檔喺2021年6月28號。喺2021年6月4號搵到。
- ↑ 〈存档副本〉。apps.itsc.cuhk.edu.hk。原先內容歸檔喺2021-06-28。喺2021-06-05搵到。
- ↑ 〈存档副本〉。dict.revised.moe.edu.tw。原著喺2021-06-03歸檔。喺2021-06-06搵到。
- ↑ 〈存档副本〉。dict.revised.moe.edu.tw。原先內容歸檔喺2021-06-03。喺2021-06-06搵到。
- ↑ 〈存档副本〉。原先內容歸檔喺2021年6月28號。喺2021年6月5號搵到。
- ↑ 〈汉语方言避禁忌词改音举例（上）〉。www.sohu.com。原先內容歸檔喺2021-07-04。喺2021-07-04搵到。
- ↑ 粗口難有清晰界定 互聯網檔案館嘅歸檔，歸檔日期2007年8月30號，.，香港蘋果日報，2007年5月29號
- ↑ Kayue (2019-09-23)。〈【影片】幪面警察粗口罵市民、記者，拒提供警員編號〉。《The News Lens 關鍵評論網》 (中文)。原先內容歸檔喺2021-06-05。喺2021-06-05搵到。
- ↑ 852郵報 (2017年3月26號)。〈【特首跑馬仔】有廢票乍現一個大「屌」字〉。原著喺2017年4月18號歸檔。喺2017年3月27號搵到。
- ↑ 〈掉那媽！頂硬上！ - 鄧達智 ｜ 蘋果日報〉。《Apple Daily 蘋果日報》 (香港中文)。原先內容歸檔喺2021-06-28。喺2021-06-05搵到。
- ↑ 〈存档副本〉。原著喺2009年2月16號歸檔。喺2009年3月16號搵到。
- ↑ 〈創意和文案一加一等於三的「好屌」廣告〉。原著喺2008年10月21號歸檔。喺2007年8月25號搵到。
- ↑ 〈"掉哪妈!顶硬上!" 袁崇焕金句东莞惹争议(图) 经济滚动 南方网〉。economy.southcn.com。原先內容歸檔喺2021-06-05。喺2021-06-05搵到。
