陰部

陰部可以指某人嘅整副生殖器官，或者佢部分生殖器官同部分泌尿系統嘅總稱。個詞有時亦都會用於其他動物身上。

現代科學用詞

陰部分為外陰部（又名「外生殖器」）同內陰部（又名「內生殖器」）兩個部分，各個性器官一刀切噉劃分入其中之一。 粗略噉講，外陰部包括睇得到嗰啲，男人嘅只有陰莖（雖然部分位於骨盆腔）同埋陰囊（但係唔計佢包住嘅「餡」［睾丸、附睾同部分輸精管］），女人嘅係陰阜、大陰唇、小陰唇、前庭大腺同陰蒂——統稱陰户（又名「陰門」）；其餘嘅一律歸入內陰部；詳情載於條目「男性生殖系統」同「女性生殖系統」；同以上黐埋一齊，不過同性唔相干嘅器官，並冇包括在內。

一般文質用詞

「陰部」／外陰指男女用嚟屙尿同性交嘅身體部位，睇得見又摸得着（包括陰囊之內嘅嘢［可以隔住層皮感受得到］，重有陰道口同尿道口）嘅先計，意思同上節所述嘅「外陰部」雖然接近，但係唔一樣。內陰主要指女人陰道。

詞義同「陰部」相同嘅有私處、下體、前陰、下陰、「陰」／男陰／女陰同「私」／男私／女私。

下身同下部可以指陰部或者人軀體嘅下半部。

陽具、陽物同陽道可以指成個男性陰部或者單指陰莖。

文言用字「勢」（同埋與之對應嘅方言俗寫「屌」，以及「屌」嘅假借字「鳥」）、「鞭」、那話兒、根器、「行貨」、下截、臊根同屪，都可以指男人陰部。

男細蚊仔嘅陰部可以戲稱作「小雞」。

牝、牝户、陰溝、產門、產户同玉户可以指女人陰部；用於科學嘅「陰户」同「陰門」亦都喺文學上通用。

廣府話口頭語

今時今日，被粵人視為粗口嘅「㞗」、「𡳞」同「𨳍」都經常用嚟泛指已經成熟嘅男人陰部或者單指陰莖；以前，「賓周」同「脧脧」並唔粗俗，重要帶啲稚氣，解屬於細孥仔，未發育嗰種；一樣要加字，先至指明到係只計陰莖定係成個陰部都算。有理論話「𨳍」本來齋指膥袋，「㞗」淨係等於陰莖。不過現代人用「㞗」、「𡳞」、「𨳍」、「脧脧」同「賓周」五者時，都唔多講究，一般會當以上嘅通通可以互換嚟指陰莖，或者整個男陰，而且唔分老嫩。男人整個陰部可以用兜嘢表示，亦有「大兜」同「細兜」嘅形容方法。然而，啲人一想準確傳意，就實揀書面語。

至於意思為整個女人陰部嘅「閪」，意思清晰，以前老少咸宜。不過，而家啲人甚至忌諱將個字用作童語同中性詞，有時會講塊嘢來代表。要意思準確時，都係會用書面語。

唔粗俗而要靠輔助消息嚟表明所指嘅兩性通用詞語，係「嗰度」同「下面」；要指明屬於男定係女嘅話，就分別用「弟弟」（di⁴ di²）同「妹妹」（mui⁴ mui²）。

南北同詞異義

舊陣時，巴子喺中國北方可以解女陰，係粗口；而南方有啲細蠻子會用佢嚟指男陰，頗幼稚。