𡳞

  提示：呢篇文講嘅唔係撚。

 𡳞（粵拼：lan2） 嘅古老意思應該係整個男性陰部；雖然有實質所指，但係家陣呢個字幾乎唔會用於醫學。反而，家下粵人講嘢時，往往會將佢虛用嚟加強語氣同抒發情緒；對比穗、港兩大廣州話代表城市，前者用個「㞓/屄」字多好多，後者通常以「𡳞」字表達相同語氣。

作家黃霑話「𡳞」所指嘅只有發育完成咗嗰啲，相對於「賓州」。家陣，有好多人當「𡳞」係專指「陰莖」噉樣用，此情況由大眾嘅用詞配搭習慣，可見一斑。「𡳞」為所謂廣東話粗口五字之一，往往被俗寫成新造字𨶙，亦有大把人假借近音嘅「 撚（粵拼：nan2） 」嚟代表該字。

昔義

• 《異體字字典》：「閩方言稱男性的生殖器為『𡳞』，為方言俗字，寫法不定，或作『膦』。」
• 《字彙．尸部》：「𡳞，力刃切，音吝，閩人謂陰也。」
• 《彙集雅俗通十五音．卷二．干字母》：「𡳞，男子陽物。」
• 《四聲篇海（明刊本）．尸部》：「𡳞，力刃切，閑人謂陰也。」
• 《正字通．尸部．寅上》：「𡳞，舊註良慎切，音吝，閩人謂陰也，按方俗語有音無字，陰不必別名𡳞……」
• 《重訂直音篇．尸部．卷三》：「𡳞，音吝，陰也。」
• 《普通話閩南方言詞典》:「……良刃切，震韻，閩南人指男性生殖器……」

有理論話個「𡳞」字源自閩南，跟着傳到東莞成為當地流行口語字，後來喺香港開埠時期，隨着東莞勞工遷入香港而開始普及於廣州話。

今義

• 作名詞用，「陰莖」嘅意思，量詞係「條」或者「碌」。例子：

1. 大家男兒一條𡳞（大家男性都係一條陽具。）
2. 你知唔知日本某個縣入面每年都有個陽具祭？過節嗰日呀，班男村民重會托住好大碌木造嘅𡳞出嚟遊行慶祝添喎，幾得意呀！

• 語氣助詞，本身冇意思，用作加強語氣。例子：

1. 玩𡳞完！（一切都完嘞、冇嘞，或者失敗咗；係取材自打機嘅「遊戲完咗」，Game Over）
2. 你頭先拍我膊頭做乜𡳞嘢呀我屌你老母！（呢句說話係摘自巴士阿叔事件片段裏面嘅其中一段。句中嘅「做乜𡳞嘢」照字面咁睇，可以解釋為問某人做乜搓弄、玩弄一啲物件，但呢度作為粗口嘅助詞就變咗冇實質意思，只係用嚟加強語氣。從呢句說話之中，其實係可以感受到當時個巴士阿叔嘅怒意係幾咁重。）

作為語氣助詞，「𡳞」嘅用法同「㞓/屄」、「㞗」及「杘」字相同，不過可能順口嘅關係，用佢嚟做加強語氣嘅頻率可以話係最多；佢同樣可以作為顛倒句子嘅意思。

文法

就「𡳞」字嘅應用方式嚟講，同「𨳍」一樣其實都係指陽具，但喺深層意義嚟講就有多少唔同：「𡳞」係指未扯旗軟軟哋嘅陽具，而「𨳍」就指扯咗旗硬硬嘅陽具（亦有指「杘」係春袋或者應舉時不舉嘅陰莖），不過因為日常講粗口嘅時候都唔會去太過深究，但求順手拈來即時產生效果，所以就索性劃一咁解釋。

至於「𡳞」字（或者「㞓/屄」、「㞗」、「杘」字），唔似得「屌」字咁可以喺日常單獨咁使用，即係話好少有人會喺冇上文下理嘅情況下單單講個「𡳞」字，因為咁樣係冇意思嘅，除非有人用佢嚟當人名咁稱呼人就唔同講法。

「𡳞」作名詞用嘅其它例子

1. 好大碌𡳞（好大條嘅陽具。）
2. 索女含𡳞好難忍（靚嘅女性含住條陽具，嗰種快感令人好難忍受。）
3. 關你𡳞事（等於：「關你咩事？／同你條陽具有關咩？」，等同普通話嘅「干你鳥事」（鳥喺中國人圈子入面可以暗喻為陽具）；而呢個詞語入面嘅「𡳞」字係可以同「㞓/屄」、「㞗」同埋「杘」互相交換嚟用）

「𡳞」字單單噉用係指陽具，因為噉，佢亦可以同其它字詞去組成關於陽具嘅嘢，好似：

1. 𡳞頭（即係龜頭）
2. 𡳞皮（即係包住龜頭嘅包皮）
3. 𡳞毛（即係陽具旁邊嘅陰毛）
4. 𡳞屎（即係喺陽具捽出嚟嘅老泥）
5. 用嚟指其它動物嘅陽具，好似「狗𡳞」、「馬𡳞」、「牛𡳞」…等。

「𡳞」作助語詞用嘅其它例子 1：一般用法

「𡳞」字之所以最多人用，係因為佢用作詞氣助詞嘅時候係好易上口、最能填補句子嘅空隙。作為語氣助詞，通常會放喺句子嘅形容詞、動詞同埋名詞前面（不過就極少會放喺一句話嘅最前頭），用嚟加強句子嘅語氣，例子：

• 擺喺形容詞前面：

1. 條友好過癮　→　條友好𡳞過癮（嗰個人好有趣。「過癮」係形容詞。）
2. 好好玩呀！？　→　好𡳞好玩呀！？（好好玩咩？「好玩」係形容詞。）
3. 好屌呀！　→　好𡳞屌呀！（好屌「屌」係形容詞。）
4. 好正呀！　→　好𡳞正呀！

• 擺喺名詞前面：

1. 食屎　→　食𡳞屎（呢度嘅「屎」係指排泄物，名詞。）
2. 呢啲係咩紙巾？　→　呢啲係咩𡳞紙巾？（「紙巾」係名詞。可能啲紙巾一拉出嚟就爛，所以發脾氣咁講。）
3. 行運　→　行𡳞運（「運」，運氣，係名詞。即係話人行埋啲狗屎運，好似好好彩咁嘅意思。）

• 擺喺動詞前面：

1. 唔食　→　唔𡳞食（「食」係動詞。）
2. 你咪行住　→　你咪𡳞行住（「行」係動詞。）

「𡳞」作助語詞用嘅其它例子 2：顛倒用法

另外「𡳞」字加入一個句子入面，係可以令到嗰句嘢變咗相反嘅意思，用法同「語氣助詞」差唔多。例子：

• 有用　→　有𡳞用（變咗「冇用」嘅意思。）　
• 係　→　係𡳞（變咗「唔係」嘅意思。呢個係特別嘅例子，因為作為語氣助詞，𡳞字好少會放喺句尾。）
• 有飯食　→　有𡳞飯食！（變咗「冇飯食！／邊有飯食！」嘅意思。）
• 見到你　→　見𡳞到你！（變咗「見唔到你！」嘅意思。）
• 關你事　→　關你𡳞事！（變咗「唔關你事」嘅意思。）

「𡳞」作助語詞用嘅其它例子 3：重點擺位

重有，將「𡳞」字夾雜入一個句子嘅唔同位置，係可以表達出唔同嘅重點，例子：

• 「好想搞大佢嚟玩！」（好想將件事搞大；有要睇吓其他人點樣收拾嘅意味。）

→　好𡳞想搞大佢嚟玩！（呢個係比較正常嘅講法，重點係在於「好想」。）

→　好想搞𡳞大佢嚟玩！（重點在於「搞大佢」。）

→　好𡳞想搞𡳞大佢嚟玩！（略嫌累贅，但係就加強咗「好想搞大佢」嘅決心。）

• 「唔係咁化學下話？」（用緊一樣嘢，點知估唔到咁快就壞咗、爛咗〔化學〕，感到好嬲同失望嘅感嘆。）

→　唔𡳞係咁化學下話？（重點係反問，帶有責怪件嘢嘅生產商方面嘅意味。可能件嘢係假貨，用兩吓就壞咗。）

→　唔係咁𡳞化學下話？（重點係引致損壞呢件事，有「點解會壞」嘅責問。可能喺用法方面已經依足說明書，或者喺正常嘅情況之下都竟然出問題而壞咗。）

→　唔係咁化𡳞學下話？（重點係在於件嘢損壞嘅情況，有「可以咁壞法？」嘅意味。可能喺旺角女人街係買咗隻行針錶返嚟，點知戴咗冇幾耐入面啲指針就甩晒出嚟。）

→　唔𡳞係咁𡳞化𡳞學下話？（呢句嬲嘅語氣可以話非常之明顯。可能講嘅呢個人佢用咗幾百蚊喺女人街買咗隻假嘅勞力士錶，諗住好好哋都可以用嚟扮吓三幾年闊佬，點知戴咗幾日啲指針同個皇冠都甩晒出嚟，情況超乎想像咁離譜，於是百感交集咁講。）

常見嘅單獨字句應用

• 含𡳞　用口含住陽具，係一個動作；但係用嚟侮辱人哋嘅多，包括埋同性。例如：叫你搬少少嘢都嗌重，唉你含𡳞啦！（要注意，因為語帶侮辱，千祈唔好同老婆或者女朋友講：「老婆／打令，我想妳幫我含𡳞～」，咁樣講係帶有好重嘅覺得人低賤嘅語氣，係好唔尊重對方嘅表達。）
• 𡳞樣　好似陽具咁嘅樣。用嚟鬧人，尤其係指男性。
• 懵𡳞　傻更更成日撞板嘅人。意思比較粗俗，又係鬧人用。
• 把𡳞　用手扶住陽具。多數形容一件事冇意思，或者係冇成功率。例句：佢整壞你部腦，你鬧我把𡳞呀？（係佢整壞你部電腦，你鬧我做咩呀？）
• 唔𡳞化　思想守舊古板，唔開化。
• 𡳞就　呢個用「𡳞」字擺前頭嘅助詞，其實係來自「罷𡳞就」，同義詞係「算𡳞數」，即係由得你、隨便你嘅意思，只不過啲人將佢簡化咁講，並唔屬於將個「𡳞」字擺頭嚟助語嘅例子。

相關連結

• 廣東話粗口研究網
• 「華記」護照被扣　正 X 樣明白年輕人爭取咩未？