屬領島
 屬領島上豎立咗紀念碑，記載占士曲船長喺1770年8月22號舉行屬領升旗儀式嘅事跡 | |
| 地理資料 | |
|---|---|
| 位置 | 澳洲北岸 |
| 坐標 | 10°43′36″S 142°23′49″E / 10.72667°S 142.39694°E |
| 面積 | 5.5 平方公里 |
| 政治管轄資料 | |
| 州政府 | 昆士蘭 |
屬領島（英文：Possession Island）係澳洲昆士蘭州北岸嘅托雷斯海峽群島（Torres Strait Islands）入面嘅其中一個小島。 屬領島最為人熟悉嘅事係發生喺1770年。英國占士曲船長宣稱自己首次抵達澳洲雪梨後沿海線北上，嚟到依到島之後，舉行屬領升旗儀式，宣佈成個澳洲東岸成為英國屬地，稱為「新南威爾士」，而依個島亦因為咁而名命為「屬領島」[1]。
依家，個島同時亦係屬領島國家公園嘅一部份[2]。
歷史
[編輯]英國占士曲船長首次登陸
[編輯]
上溯於古代嘅希臘同羅馬，已經有人估計有一片神秘嘅未知南方大陸（Terra Australis）等待被人發現[3]。當時嘅推測認為，既然地球係球體，咁赤道以南亦應該有差唔多嘅陸地面積，先可以平衡到南北半球[4]。所以一直以嚟，都有歐洲人想嘗試搵到依一片土地。
1606年，荷蘭航海家威廉．揚松（Willem Janszoon）抵達依家嘅澳洲昆士蘭約角半島，係歷史上首次有歐洲人登陸依家嘅澳洲[5]。之後，相繼有唔同嘅荷蘭人前往澳洲探險，並命名為「新荷蘭」[6]。但當時嘅歐洲人仲未知澳洲到底有幾大。
1768年，英國占士曲船長獲選帶領探險隊前往太平洋觀察研究一個稱為「金星凌日」嘅天文現象，希望獲取相關科學數據，從而計算出地球同太陽之間嘅距離[7]。但喺佢出發離開英國之前，佢收到海軍部嘅密令，指示佢完成觀察金星凌日之後，繼續往南航行探險，嘗試去搵傳說中嘅南方大陸，而如果一旦發現合適作為開闢商埠嘅地點，要以英國國王之名宣告為屬地[8][9]。但密令亦同時指明，如果當地有土著嘅話，就要得到土著嘅同意下先好屬領當地[9]。
1770年4月，占士曲船長到達澳洲雪梨植物灣，成為第一個歐洲人抵達澳洲東面海岸。之後，占士曲船長沿住海岸線北上。同年8月22號晏晝4點，探險隊嚟到依個島登陸，占士曲船長就喺日落前舉行屬領升旗儀式，宣佈成個澳洲東岸成為英國屬地[1][7]。占士曲船長嘅手稿係咁樣描述當時嘅情況[1]：
| 「 | ⋯⋯
我對於通過海峽嘅可能性已經感覺滿意，我亦打算坐住依架船出發，所以好可能唔會再喺新荷蘭嘅東面海岸登陸。而喺西岸，我亦搵唔到有啲乜嘢新發現。所以發現佢哋功勞係屬於荷蘭嘅航海家。但係，我有信心，由南緯 38˚ 到依個地方嘅東面海岸，係冇任何歐洲人喺我哋之前見過或者到訪過。所以，即使我之前已經以國王陛下嘅名義屬領咗依一邊海岸上唔同嘅地方，我依家都再一次升起英國旗幟，以國王陛下佐治三世嘅名義，由上面所提到嘅緯度一直到依個地方，連同所有位於依一邊海岸嘅海灣、港口、河流同島嶼，屬領成個東面海岸，並命名為「新南威爾士」。之後，我哋發射咗三輪鳴槍，而船上亦以同樣數量鳴槍回應⋯⋯
|
」 |
多重疑點惹爭議
[編輯]占士曲船長對於自己喺1770年屬領澳洲東岸嘅描述一直都有唔少爭議。主要原因係因為船員對當日嘅描述同佢嘅講法有所出入[10][11]。亦都係咁，有聲音質疑占士曲船長當日根本就冇舉行屬領儀式，成件事都係後尾編作出嚟[1]。
以下係令人對占士曲船長嘅講法提出質疑嘅地方：
- 同船科學家 Joseph Banks 就1770年8月21號同22號所寫嘅日記內容入面，並冇記載任何關於曾經舉行過一場按道理非常重要嘅屬領儀式，但就有提及依家嘅屬領島，以及佢對島上原住民嘅觀察。另外，日記內容亦都顯示個島最初可能係稱為「通航小島 (Passage Isle)」，但後尾就變為屬領島[1]。
- 雖然海軍部密令指示要得到土著同意先可以屬領當地，而且當地亦明顯有土著，但占士曲船長並冇提起土著嘅存在[1]。
- 占士曲船長喺到達屬領島之前已經登陸過澳洲大陸五次，但佢同其他船員嘅日記都從來都冇提到舉行屬領儀式[1]。
- 同船插畫家 Sydney Parkinson曾提及船長登上一座山，發現一個可以通航嘅海峽後升旗鳴槍，山下同船上嘅海軍陸戰隊亦鳴槍回應[1]。
參考
[編輯]- ↑ 1.0 1.1 1.2 1.3 1.4 1.5 1.6 1.7 "Possession Island". Naval Historical Society of Australia. 原先內容歸檔喺2022年11月21號.
- ↑ "Possession Island National Park" (英文). 昆士蘭州政府. 原先內容歸檔喺2022年11月6號.
- ↑ 新南威爾士州立圖書館。"Captain Cook's voyages of exploration" (英文)。原先內容歸檔喺2023年1月9號。｢Terra Australis Incognita - the unknown southern land. The existence (or not) of this mysterious, mythical place has intrigued philosophers, explorers and map-makers since it was first hypothesised by the ancient Greeks and Romans. The empire-builders of 18th century Britain were just as obsessed with investigating territories below the Equator.｣
- ↑ "Terra Australis Incognita". Oxford Reference (英文). 牛津大學. 原先內容歸檔喺2023年2月12號.
The name given to the great and unknown southern continent required by the classical Greek geographers, who knew that the earth was spherical, to balance the land mass which was known to exist north of the equator.
- ↑ "Who was the first European to land on Australia?" (英文). 澳洲國立圖書館. 原先內容歸檔喺2022年12月4號.
While Indigenous Australians have inhabited the continent for tens of thousands of years, and traded with nearby islanders, the first documented landing on Australia by a European was in 1606. The Dutch explorer Willem Janszoon landed on the western side of Cape York Peninsula and charted about 300 km of coastline...After Janszoon many Dutch explorers sailed along the northern, western and southern coastline. James Cook was the first recorded explorer to land on the east coast in 1770. He had with him maps showing the north, west and south coasts based on the earlier Dutch exploration.
- ↑ "How was Australia named?". 《澳洲國立圖書館》 (英文). 原先內容歸檔喺2022年9月28號.
- ↑ 7.0 7.1 "Timeline of James Cook's voyages" (英文). 大英圖書館. 原先內容歸檔喺2022年10月7號.
- ↑ "Secret Instructions to Lieutenant Cook 30 July 1768 (UK)". The Museum of Australian Democracy at Old Parliament House (英文). 原先內容歸檔喺2022年11月29號.
- ↑ 9.0 9.1 "CAPTAIN COOK'S SECRET INSTRUCTIONS". Victoria University of Wellington Library (英文). 原先內容歸檔喺2021年1月26號.
- ↑ "Contested Possession" (英文). Australian Museum (澳洲博物館). 原先內容歸檔喺2022年12月9號.
- ↑ "Bedanug, Thunadha, Bedhan Lag, Tuidin – Possession Island" (英文). National Museum of Australia (澳洲國家博物館). 原先內容歸檔喺2023年1月20號.