希拉莉

出自維基百科,自由嘅百科全書
希拉莉·克林頓
Hillary Clinton
個人資料
性別
出世1947年10月26號
國籍美國 美國
政黨民主黨
居住地紐約州

希拉莉·羅得漢·克林頓英文Hillary Rodham Clinton1947年10月26號—)係前任美國國務卿,曾經喺2001年到2009年期間擔任代表美國紐約州嘅聯邦參議員。因為佢老公克林頓係第42任美國總統,所以佢亦都曾經喺1993年到2001年期間擔任第一夫人。佢而家係美國民主黨黨員。

2007年1月20號,希拉莉宣佈成立一個競選總統研究委員會,加入角逐2008年美國總統職位,但後來退選。2009年1月21號,希拉莉上任美國國務卿,係美國歷史上第三位女性做到國務卿。

希拉莉做咗2016年美國總統選舉嘅民主黨初選候選人,打低主要對手伯尼山德士後做咗民主黨正式參選人,同美國共和黨嘅當勞侵對決,但都係選唔到。

早年生平[編輯]

希拉莉喺1947年10月26號喺芝加哥出世,阿爸係共和黨人,有威爾斯英格蘭血統,阿媽有威爾斯、蘇格蘭同法裔加拿大血統。希拉莉曾經係共和黨嘅支持者,曾經喺1964年美國總統選舉幫過共和黨。但係喺1968年因為唔妥獲得當時共和黨黨代表大會提名嘅理察尼克遜,所以轉投民主黨。1973年喺耶魯大學法學院畢業開始做律師,之後搬咗去阿肯色州仲加入咗國會水門事件嘅彈劾調查小組。

1975年同比爾·克林頓結婚,1980年生咗個女叫雀兒喜·克林頓。克林頓喺1979年到1981年同埋1983年到1992年做咗阿肯色州州長,所以希拉莉成為咗阿肯色州第一夫人並且喺呢12年期間參與兒童福利嘅事務。

成為第一夫人[編輯]

克林頓喺1993年到2001年期間擔任第42任美國總統,所以希拉莉成為咗美國第一夫人。喺希拉莉在任期間推行咗唔少改善教育同醫療嘅政策。佢喺1994年想推健康保險計劃,但無獲得由民主黨控制嘅國會通過。民主黨喺健康保險計劃呢一疫嘅失敗令對手共和黨喺1994年嘅中期選舉中拎多咗議席,重新得到翻國會嘅控制權。自此之後,希拉莉減少咗喺國內政策方面嘅參與,轉而開始參加更多國際性嘅事務。

成為參議員[編輯]

喺2000年,希拉莉成為咗美國參議院議員,佢喺在任期間一邊維持自由派選民嘅支持,一邊努力拉攏中間派選民,包括投票支持伊拉克戰爭

2006年11月7日嘅美國中期選舉中,希拉莉成功連任紐約州參議員,得票中比較多係女性選民。

2008年美國總統選舉[編輯]

希拉莉(1992年)

希拉莉喺2007年1月20號喺個人網頁度宣佈組織緊競選總統研究委員會,有意角逐美國總統職位。喺2008年民主黨黨內初選,希拉莉一開始以大幅領拋離其他侯選人,但喺民主黨政壇新秀非裔美國人巴拉克·奧巴馬參議員宣佈參選後,兩人展開激烈嘅競爭。2008年6月3號完成嗮所有嘅初選投票,雖然希拉莉喺初選中總共得到約1800萬張普選票,比奧巴馬多出17萬票,但因為美國民主黨嘅黨代表票比例分配制度,奧巴馬最尾因為黨代表票總體上比希拉莉多而贏得提名。希拉莉喺6月7號正式承認競選失敗。

美國國務卿[編輯]

希拉莉喺2009年到2013年期間喺奧巴馬第一任政府擔任國務卿,在任期間出訪咗112個國家。2011年3月希拉莉曾表示自己唔會再擔任下一屆國務卿,奧巴馬之後搵咗參議員約翰·克里繼任。

希拉莉喺卸任後被指使用個人電子郵件帳戶處理公務因此引起「電郵門事件」嘅爭議。

2016年美國總統選舉[編輯]

希拉莉喺2015年4月12號宣佈參加2016年美國總統選舉,2016年6月9號佢拎到多數黨代表票,打敗伯尼山德士,正式得到民主黨嘅提名資格,代表民主黨參選總統,同共和黨提名人當勞侵決一勝負,最後因為選舉人票比當勞侵少而輸咗。

Hillary Clinton (2016)
希拉莉 (2016年)

出面網頁[編輯]

  • 希拉莉個人網頁(英文)
  • "Hillary Rodham Clinton | whitehouse.gov" (英文). 白宮.