康百世卡

  呢篇文講大溫哥華運輸聯線準備推出嘅預付費卡。想搵聖地牙哥用緊嘅同英文名預付費卡嘅話，請睇指南通。

康百世卡嘅商標同樣卡。

康百世卡（英文：Compass Card）係加拿大大溫哥華運輸聯線推行緊嘅，類似於廣東嘅嶺南通同香港嘅八達通嘅一種公共交通預付費卡。

運輸聯線將康百世卡系統嘅安裝、運作同維護保養外判徂畀聖地牙哥嘅Cubic Porporation。運輸聯線原本期望喺2014年年尾全面推行康百世卡，但係爾個計劃由於種種原因而一再推遲，直到2015年10月先至全面公開發售康百世卡。

簡介

同嶺南通、八達通唔同嘅係，康百世卡衹能夠用來搭公共交通工具，唔可以用來找其他數，連打的都唔用得。喺康百世卡正式推行之後，乘客可以喺架空列車站、西海岸快車站同海上公車碼頭，同埋指定嘅倫敦藥房買到康百世卡，或者通過打電話或上網訂購都得。

康百世卡分為六種：

• 藍卡：成人卡
• 橙卡：中小學生同長者專用卡
• 黃卡：運輸聯線合約員工卡
• 白卡：盲人專用卡
• 紅卡：政府買畀低收入人士同殘障人士用嘅搭車卡
• 單程卡：畀無指南通卡嘅乘客搭車嘅車票卡

乘客上落公共汽車同埋出入架空列車站、西海岸快車站或者海上公車碼頭都要打卡。上車/入站打卡之後，系統會自動預留夠三個收費區嘅車費；落車/出站打卡之後，系統會根據乘客經過嘅收費區嘅數量來計費，然後自動從張卡道扣費。

優惠

為徂鼓勵乘客用康百世卡，運輸聯線對用康百世卡嘅乘客有優惠。以下係單程車費嘅票價比較：

收費區	用康百世卡	畀現金
1個	$2.35	$2.75
兩個	$3.50	$4.00
3個	$4.70	$5.50

康百世卡全面推行之後，乘客喺自動售票機買嘅日票同月票會自動同康百世卡掛鉤。另外，乘客重可以上網登記，每個月通過銀行轉賬來自動更新月票。上網登記自動更新，免費附送防賊功能：張卡被賊偷徂可以報失，報失嘅卡會馬上凍結，唔畀賊偷用。

缺陷同爭議

預算超標

康百世卡系統最初嘅安裝預算係1億7100萬加元，但係目前嘅花費已經達到1億9400萬加元。2013年10月，運輸聯線承認：由於不可抗力嘅原因，加上通脹嘅影響，康百世卡系統將會超支達2300萬加元。

新舊系統唔兼容

2013年，素里當地媒體《Surrey Leader》爆料話：乘客如果喺公交車上面買車票嘅話，公交車發出嘅轉車票過唔到架空列車站嘅閘門，祇有用康百世卡先至過到閘門。而喺架空列車站嘅舊式驗票機，就讀得到公交車發出嘅轉車票。運輸聯線表示：如果要升級埋公交車嘅車票系統，令到佢等同康百世卡系統兼容，就要再追加2500萬撥款。

收費系統漏洞

2013年9月系統測試期間，測試員發現一個嚴重漏洞：由於公交車上面無閘門，康百世卡用戶可以靠提前打卡但係唔提前落車嘅方式，以一個收費區嘅票價搭三個收費區嘅車。為徂填補漏洞，同埋阻止客源繼續流失，運輸聯線宣佈：由2015年10月5號開始，所有乘客可以以一個區嘅價錢坐勻澌三個區嘅公交車；但係坐架空列車或者海上公車跨區就要繼續畀跨區嘅車費。