廣州市兒童醫院
呢篇文講原先嘅兒童醫院。想搵2008年後嘅變化嘅話，請睇廣州市婦女兒童醫療中心。廣州市兒童醫院係舊時廣東廣州越秀區一間兒童醫院，地址係人民中路318號。屬於三級甲等醫院[1][2]。2008年同廣州市婦嬰醫院合併變成廣州市婦女兒童醫療中心，不過冇搬到，淨係改咗名啫。
歷史
[編輯]美國人達保羅（Dr. Paul Jerome Todd）來自俄亥俄州多佛（Dover）。佢信美國長老會，1902年來到省城傳教同行醫。喺省城期間，佢成日資助啲青年醫生去留學。1909年，渠夾埋江孔殷、鍾宰荃、梁恪宸、潘佩如等人籌辦廣東公醫學堂，係中山醫學院嘅前身之一。學堂附設公醫院，達保羅做院長。
1928年，達保羅唔再做院長，帶埋眷屬去咗惠福西路24號婦孺醫院，設咗個達保羅醫務所。1933年醫院遷到官祿路（今觀綠路）30號，改名達保羅醫院[3]。
由於達保羅醫院啲員工好高人工，達保羅本人嘅醫術又名聲遠播，因而業務蒸蒸日上。嗰陣慕名求診嘅，有唔少係達官貴人。醫院重成日有討教醫術嘅人來拜訪，其門若市。冇耐抗戰爆發，廣州淪陷。達保羅夫婦因係鬼佬來，堅持留低，醫院亦免遭轟炸同騷擾而得以保全。到咗1940年達保羅過身後，太平洋戰爭爆發，醫院大樓被當成「敵產」，被迫閂門，改成（偽）廣東省政府衛生處。達保羅夫人亦做咗俘虜，困咗入日營。二戰完咗後，醫院被接收成廣東省政府衛生處先，後尾交返畀達保羅嘅養女達瑤輝復業，但因經營不善，醫院冇舊時咁多人去。
到1952年達瑤輝將院產捐畀共和國政府，廣州市人民政府接辦，改成廣州市立醫院兒科部，1953年8月1號，併入咗方便醫院小兒科，改名市兒童醫院。門面就由觀綠路改咗去豐甯路（今人民中路）度，一路到依家。
1994年，廣州市兒童醫院建立廣州市兒科研究所。1997年被評為廣東省高等院校第一批入選教學基地。1998年定為廣州醫學院附屬兒童醫院。1998年，廣州市重症兒童救治中心成立，被評為廣州市「21世紀優先工程項目」。2003年被評為廣州市重點學科、廣東省特色專業。
2008年，廣州市兒童醫院同原廣州市婦嬰醫院合併組成廣州市婦女兒童醫療中心。中心珠江新城院區喺2009年9月19號正式投入使用。
重點科室
[編輯]參考
[編輯]- ↑ 广东省出版进出口公司，本社编辑部 (1981)。《广州指南》。广东科技出版社。頁 228。
- ↑ 黄炯烈主编 (2009)。《迎亚运医学英语100句》。广州出版社。頁 30。ISBN 978-7-80731-935-1。
- ↑ 〈儿童医院神秘红楼 隐匿美国大夫往事〉。《南方日報》。2012-09-12。原著喺2020-09-23歸檔。喺2018-11-17搵到。