廣東省人民醫院

出自維基百科,自由嘅百科全書
Jump to navigation Jump to search
廣東省人民醫院(東川路總院)

廣東省人民醫院粵拼gwong2 dung1 saang2 jan4 man4 ji1 jyun2)係中國廣東省嘅其中一間省級三甲醫院機構。之前嗌過廣州中央醫院gwong2 zau1 zung1 joeng1 ji1 jyun2)嘅名。呢間醫院既係廣東省入面,最大嘅綜合性醫院,又係中國內地規模最大、綜合實力最強嘅其中一間醫院。呢間醫院喺1946年成立。而上面嘅7個標題大字係1950年嗰陣,由葉劍英用毛筆寫喺張兩呎方嘅宣紙出嚟嘅。

[編輯]

成立初期[編輯]

喺1946年嘅抗日戰爭勝利之後,有好多官員都想搵返個官嚟做,嗰時有位嗌李廷安嘅人就唔想做上海市衛生局局長。就係因為佢老豆一世出嗮貢獻喺北平(而家係北京)、上海四川嘅醫藥衛生事業發展嗰邊,佢就為咗報返桑梓嘅人情,就喺廣州嗰邊起咗間協和式醫學院同埋協和醫院式嘅醫院。就喺1946年,廣州中央醫院正式成立。

廣州中央醫院時期[編輯]

呢間醫院成立咗之後,嗰時嘅醫院病歷差唔多都係清一色嘅雞腸書寫,甚至連專家查房都要用英文嚟問。而住院醫師同埋實習醫師方面,都係24個鐘嘅住院負責制,佢每年都成日向醫生搞考核,合格咗先至有得入嚟,唔合格或做得唔好嘅,唔好意思,炒魷。

因為李廷安負責起嘅其中兩間醫院度,其中有一間喺廣州淪陷嗰陣整冧咗。喺光復咗之後,李廷安重請咗合眾工程師事務所攞咗「廣州中央醫院建築惠福西路醫院第二期工程設計圖」[1]嚟負責設計廣州中央醫院嘅二期工程。但係,由於惠福西路嘅醫院已經唔夠需求,佢就重新揀個地方嚟新起間醫院。佢之前諗住揀二沙島嗰度,但係由於嚿地皮要好多錢先至可以買,結果就冇揀到呢度喇。佢最後就揀咗喺而家東川路同埋中山三路、中山二路嘅交界嗰嚿地嚟起間新嘅醫院。不過嗰時,嗰笪地隔籬就係間好荒涼嘅殯儀館。後嚟李廷安就通過搞市政府同埋國際紅十字會銀行同埋廣州善後救濟署嚟幫手捐錢嚟負責起間醫院。而呢間醫院喺1947年起好。

後嚟到咗1949年嘅中國解放之前,由於國民黨中央衛生部長嚟咗廣州,重命令嗰時做緊廣州中央醫院嘅院長——鐘世藩,話要帶嗮成間醫院嘅巨額資金,冚唪唥搬嗮去臺灣嗰邊。由於鐘院長憎嗮啲國民黨嘅腐敗制度,即刻唔喺廣州度搞喇,喺1950年,佢將啲醫院財產(包括埋文書、信件[2]、圖書,房屋、藥品、醫療同生活器材、建築材料等)畀嗮下任嘅院長——陳汝棠。

到咗1949年10月15號嘅淩晨,喺惠福西路嘅廣州中央醫院門診部嘅二樓騎樓上空掛咗嚿五星紅旗喺度。嗰時係廣州城入面,其中一度出現得最早嘅旗,而呢嚿旗就搞到好多人嚟睇佢。嗰時成間醫院都冇人知係邊位醫生掛咗個五星紅旗響度,過咗10幾日都係噉,而掛國旗嘅人都唔夠膽話自己係邊位[3]

而醫院喺1951年正式改名嗌「廣東省人民醫院」[4]。喺1952年1月1號,總院正式搬咗去而家嘅東川路同埋中山二路交界嘅東南邊冇幾遠嗰度。

文革嗰陣[編輯]

喺20世紀60年代,由於中蘇關係惡化,嗰陣時嘅毛主席就搞話備戰、備荒、為人民嘅三樣服務,就喺1969年9月,衛生部軍管會喺天津度開咗全國醫藥衛生戰備會議,就搞咗個針灸麻醉嘅任務出嚟。因為國家一打仗,可以喺冇麻醉藥嗰陣降低部分手術嘅痛苦程度。嗰時嘅國家領導人都睇實嗮針灸麻醉嗰行。喺1971年11月26號,嗰陣時嘅總理——周恩來同越南總理範文同嚟咗廣東省人民醫院度睇針灸麻醉手術嗰行。

喺1973年,阿根廷嗰邊就派咗由心血管病專家、麻醉師、護士呢行7人隊喺嗰時衛生部部長——利歐達嘅帶領入面嚟咗中國內地。佢同周總理傾緊中國嘅心血管病事業發展嗰陣,利歐達就話,如估發展中國嘅心血管病事業,一定要有個工作隊喺境外學習先至得。結果周總理就嗌咗阿根廷嘅專家去咗呢三個地方嚟揀交流醫院同埋人員出嚟。而阿根廷代表就決定揀廣東省人民醫院去阿根廷嗰邊學心血管病技術,結果俾周總理批准咗。

改革開放之後[編輯]

喺1982年開始,間醫院重連續5屆做咗世界衛生組織嘅心血管疾病研究合作中心,佢喺心內科、心外科、心兒科基礎研究同埋臨床研究方面嘅全面發展,喺醫療技術重去到國際嘅先進水準,有好多嘅研究技術領域都去到發達國家咁滯。而肺癌研究所喺中國內地入面,最早搞單病種首席專家制,重喺醫肺癌乳腺癌呢啲單病種嘅效果都領先過好多國內嘅醫院。尤其係呼吸疾病嘅介入治療、白血病防治、神經內科、神經外科、骨科、骨質疏鬆防治、精神醫學、心身醫學、康復醫學、燒傷科、眼科、消化內科、普通外科、影像醫學科同埋臨床藥理學研究呢啲專業,重維持同發展咗佢嘅優勢。

間醫院喺1997年嘅成立50週年嗰陣,重攞埋「高等醫學院校教學醫院」嘅稱號。

21世紀[編輯]

  • 2003年初,呢間醫院喺打擊沙士嗰方面,攞咗唔少嘅成效。
  • 2004年初,呢間醫院重參加咗南亞大海嘯嘅救災任務。
  • 2007年9月,呢間醫院第一次攞咗18間醫保信用AAA级入面嘅其中一間定点醫療機構。
  • 2008年5月,呢間醫院重參加咗汶川大地震嘅救災任務。
  • 2010年5月,呢間醫院全力保障咗第16屆亞洲運動會嘅醫療保障工作。

院區[編輯]

廣東省人民醫院(惠福門診部)

呢間醫院一共有1間大醫院同3個門診部,分別喺:

  • 大醫院:廣州市越秀區東川路同中山二路嘅交界東南邊冇幾遠嗰度,入面重有呢啲研究所:
    廣東省心血管病研究所
    廣東省老年醫學研究所
    廣東省精神衛生中心
    廣東省肺癌研究所
    廣東省腫瘤治療中心
  • 門診部:
    惠福:廣州市越秀區惠福西路(進步里嘅東邊隔籬,仙鄰巷嘅西邊)。
    廣東省人民醫院健康管理中心都喺呢個院區
    合群:廣州市越秀區合群一馬路,隔籬冇幾遠就係河邊同埋隧道。
    平洲:佛山市南海區平洲永安中路入面,平洲中心文化廣場隔籬

出面網頁[編輯]

[編輯]