跳去內容

粵語兒歌

改拎
出自維基百科，自由嘅百科全書
(由廣東童謠跳轉過嚟)

粵語兒歌，係指啲喺粵語地區流傳嘅兒歌。

發展

[編輯]

隨住1949年大批嘅粵人移民搬去香港，香港繼承咗好多粵語兒歌，好似係「月光光」、「賣懶」呀噉。

1970年代尾，隨住日本嘅卡通喺香港熱播，同埋社會嘅需求增加，好多新嘅廣東話兒歌湧現，例如係小時候[註 1]、飄零燕[註 2]等等。

但由於受推廣普通話嘅影響，唔少廣東話童謠有消失嘅危險[1]。

常見粵語兒歌

[編輯]
  • 月光光，照地堂；年卅[註 3]晚，摘檳榔；檳榔香，嚼子薑；子薑辣，買蒲達[註 4]；蒲達苦，買豬肚[註 5]；豬肚肥，買牛皮；牛皮薄，買菱角；菱角尖，買馬鞭；馬鞭長，起屋樑；屋樑高，買張刀；刀切菜，買籮蓋；籮蓋圓，買條船；船浸底，浸親兩個番鬼仔[註 6]；一個蒲頭[註 7]，一個浸底[註 8]；一個摸茨菇，一個摸馬蹄。
  • 月光光，照地堂，蝦仔[註 9]你乖乖瞓[註 10]落床，聽朝[註 11]阿爹要捕魚蝦囉，阿嫲織網要織到天光。
  • 點蟲蟲，蟲蟲飛，飛到荔枝基；荔枝熟，摘邊 buk9[註 12]，邊 buk9 啖啖肉[註 13]。
  • 點貓貓，貓婆竇，問你捉豬又捉牛？捉到黃牛三百兩，球揣球，開花點豉油。
  • 荔枝熟，摘滿屋；屋滿紅，伴住個細蚊公[註 14]。
  • 排排坐，食粉果；豬拉柴，狗透火[註 15]；貓兒擔凳[註 16]姑婆坐；坐埋一齊唱支歌。
  • 凼凼轉[註 17]，菊花園；炒米餅，糯米團；五月初五係龍舟節啊，亞媽佢叫我去睇龍船；我唔唔去睇，要去睇雞仔；雞仔大，搦[註 18]去賣；賣咗幾多錢？賣咗幾多隻啊？我買隻風車仔，佢轉得好好睇，睇佢凼凼轉啊菊花園，睇佢凼凼轉啊凼凼轉啊轉[註 19]。
  • ABCD，大頭綠衣[註 20]；捉人唔到，吹 BB[註 21][註 22]
  • 落雨大，水浸街，阿哥擔柴上街賣，阿嫂出街着花鞋，花鞋花襪花腰帶，珍珠蝴蝶兩邊排。
  • 賣懶去，買精歸，賣左懶仔過新年，食過年飯好種田。
  • 賣懶，賣懶，賣到年三十晚，人懶我唔懶。
  • 細蚊仔，瀡[註 23]滑梯，因住[註 24]跌落嚟；咪學陳德貴，成日[註 25]流鼻涕，跌親[註 26]籮柚唔好睇。
  • 河邊有隻羊，羊邊有隻象，象邊有隻馬騮仔[註 27]，好似你噉樣[註 28]。
  • 咬蔗須，要睇毛，短毛輸，長毛贏，冇毛唔算數。
  • 搣[註 29]開柑，數柑核，邊個[註 30]核多就邊個贏，唔准手賴就縮骨[註 31]。
  • 拍大骳[註 32]，唱山歌，人人話我冇老婆，扚[註 33]起心肝娶翻個，有錢娶個嬌嬌女，冇錢娶個豆皮[註 34]婆，豆皮婆，食飯食得多，屙屎屙兩籮，屙尿沖大海，屙屁打銅鑼。
  • 呈沉剪[註 35]，呈沉包，呈沉糯米叉燒包。老鼠唔食香口膠，要食豆沙包。
  • 伏匿匿[註 36]：一就預備，二就匿埋，三就開盤，四就嚟到，baang4[註 37]到算數。
  • 點指兵兵，點指賊賊，點著誰人做大兵，點著誰人做大賊。
  • 估手指，要估中，邊個唔中，就唔中用，褲浪底[註 38]見個窿。
  • 騎牛牛，牛牛走，牛牛響[註 39]前咪回頭，若然[註 40]回頭就打籮柚[註 41]。
  • 大眼雞[註 42]，鹹魚頭，你屙尿，唔洗手。
  • 咕碌咕碌一，咕碌咕碌二，咕碌咕碌三，準備開炮打敵人！
  • 董存瑞，十八歲，為國犧牲炸堡壘，炸到堡壘 ngok7 ngok7 脆[註 43]，全國人民流眼淚。
  • 轆[註 44]銅仙，打銅錢，全憑眼界手出變，叮響銅錢畀個仙[註 45]。
  • 打泥炮，泥炮響，唔使摣[註 46]槍上戰場。
  • 折紙機，麻鷹飛，飛嚟飛去唔落地，麻鷹有條尾。
  • 咚啄，酸薑，你亞嫲，纏腳娘。
  • 趌跛跛[註 47]，跳跳腳，咚咚咚，上跳下跳似麻雀。
  • 趌跛跛，跛咗蹄，冇米煮，煮泥沙，冇屋住，住樓梯，樓梯有只鬼，嚇到你瓹[註 48]落床下底。
  • 伸長手，頂手掌，死人都要頂硬上[註 49]，依牙崩哨[註 50]貓噉樣。
  • 劈友[註 51]，劈友，快啲走，走得快，好世界，走得嚤[註 52]，冇鼻哥[註 53]。
  • 鬥遠掟石頭，因住咪甩手，石頭最冇眼，掟親唔好眼淚流。
  • 掟磚頭，鬥大嚿[註 54]，一掟掟到西門口，濺起浪花拋浪頭。
  • 花手巾[註 55]，真引人，基邊撈魚好過癮，一兜一條好手運，千祈唔好踎到你頭暈。
  • 黐[註 56]塘 mei1[註 57]，塘 mei1 飛，飛到菜田基，田基有條蛇，嚇親你兩仔爺[註 58]。
  • 煮飯仔仔先落米，風爐透火柴對齊，千祈唔好咁俹簁[註 59]，我哋係細蚊仔。
  • 一人騎膊馬，兩人騎豬乸，三步要埋頭，撞到面[註 60]就打。
  • 紅辣椒，綠辣椒，平時你牙擦嘴藐藐[註 61][註 62]，今日你冇膽同我撩[註 63]。
  • 鬼叫[註 64]你咁貪心，聞咗我個屁，嗍[註 65]咗入個鼻，我要你賠翻二兩四。
  • 氼水底，摸泥沙，摸到泥沙當金龜，摸唔到係契弟。
  • 陳德貴，住得矮，床下底有只鬼，嚇到瓹[註 66]臺底。
  • 一二三，三二一，一二三四五六七，二三四，四三二，四五六七八九十，肥婆跳舞頂第一[註 67]！
  • 過天梯，蝦[註 68]矮仔，人在雲東過到西，唔怕米貴就最怕矮。
  • 黑面李逵，紅面關公，三國水滸亂晒龍[註 69]，打敗清兵係英雄。
  • 打棋子，靠眼屎，全憑眼界靠本事，唔好睇錯認鳩屎[註 70]。
  • 乞兒仔，畫烏龜，一人一筆咪亂嚟，最後嗰個正衰仔！
  • 大笨象，摣支槍，去打仗，打完仗，翻嚟食碗鹹酸薑[註 71]！
  • 鋼盔個大頭佛，着鞋就唔着襪。
  • 有隻雀仔跌落水，跌落水，跌落水，有隻雀仔跌落水，被水沖去。
  • 肥仔個頭，大過五層樓[註 72]，肥仔隻手，細過荷蘭豆[註 73]。
  • 雞公仔，尾彎彎，做人新婦[註 74]甚艱難！早早起身都話晏，眼淚唔乾入下間，下間有個冬瓜仔，問安人老爺煮定蒸：安人又話煮，老爺又話蒸，蒸蒸煮煮唔中安人老爺意，大揸拉鹽又話淡，手甲挑鹽又話鹹，三朝打爛三條夾木棍，四朝跪爛四條裙！咁好花裙俾你跪爛，咁好石頭俾你跪崩！橫又難，直又難，不如捨命落陰間！人話陰間條路好，我話陰間條路好艱難[4]！
  • 秋蟬喊，荔枝熟，阿婆喊，買豬肉。
  • 曖姑乖，嫁後街，後街有鮮魚鮮肉賣，又有鮮花戴，戴唔曬，擺落床頭卑老鼠拉，拉拉拉，拉去大新街，大新街又有個扯皮鞋，扯下開，又扯下埋。

註

[編輯]
  1. ↑ 一九七七年電視劇，劇終日期為一九七八年九月十六日，主題曲由顧嘉煇作曲，鄭國江填詞
  2. ↑ 一九七四年日本卡通片，主題曲由渡邊岳夫作曲，盧國沾填詞
  3. ↑ 年卅：除夕
  4. ↑ 蒲達：苦瓜。
  5. ↑ 「檳榔香，嚼子薑；子姜辣，買蒲達；蒲達苦，買豬肚」又作「檳榔香，食子薑；子姜辣，食蒲達；蒲達苦，食豬肚”。」
  6. ↑ 番鬼仔：洋人細路。
  7. ↑ 蒲頭：露出水面。
  8. ↑ 浸底：氼水下面。
  9. ↑ 蝦仔：孲𤘅子。
  10. ↑ 瞓讀 fan3，西關口音讀 han3
  11. ↑ 聽朝：第二日朝早。
  12. ↑ buk9：量詞，束，串。
  13. ↑ 啖啖肉：形容果肉飽滿。
  14. ↑ 細蚊公：細路仔（戲稱）。
  15. ↑ 透火：生火。
  16. ↑ 擔凳：搬凳仔。
  17. ↑ 凼凼（tam4 tam4→2）轉：氹氹轉。
  18. ↑ 搦1：nik7，拎。
  19. ↑ 有版本作：「凼凼（tam4 tam4）轉，菊花園；炒米餅，糯米團；亞媽叫我睇龍船；我唔睇，睇雞仔；雞仔大，捉去賣；賣得幾多錢，賣得二百錢。”
  20. ↑ 大頭綠衣：警察（當時警服為綠色）。
  21. ↑ BB：bi1 bi1，哨子。
  22. ↑ 呢首童謠係昔日針對沙面租界警察而唱[2][3]。
  23. ↑ 音 soe4。
  24. ↑ 因住：小心。
  25. ↑ 成日：經常。
  26. ↑ 跌親：跌到，仆到。
  27. ↑ 馬騮仔：猴子 BB。
  28. ↑ 同你個樣。
  29. ↑ 搣：用手指去捏，然後用力扭。
  30. ↑ 邊個：誰人。
  31. ↑ 縮骨：吝嗇。
  32. ↑ 骳：又作“肶”，大腿。
  33. ↑ 扚：提，拎。
  34. ↑ 豆皮：痘疤。
  35. ↑ 猜呈沉：包剪𢱕。
  36. ↑ 伏匿匿：音 buk9 nik1 nei1
  37. ↑ baang4：扮槍聲。
  38. ↑ 褲浪底：褲「浪」。
  39. ↑ 響：喺；「在」。
  40. ↑ 若然：如果。
  41. ↑ 籮柚：原指碌柚，引申為臀部之意。
  42. ↑ 大眼雞：魚名，又叫赤鰓松毬、厚殼仔、金鱗甲、鐵甲、鐵甲兵、瀾公妾、鐵線婆。
  43. ↑ ngok7 ngok7脆：形容脆。
  44. ↑ 轆：原指車轆，引申為動詞，滾動。
  45. ↑ 仙：cent 嘅音譯，單位，一仙即一分錢。
  46. ↑ 摣：揸。
  47. ↑ 趌跛跛：跛下跛下。
  48. ↑ 瓹音 gyun1：四圍走。
  49. ↑ 頂硬上：硬著頭皮上。
  50. ↑ ji1 ngaa4 baang6 saau3 ：露出啲牙又崩又哨。
  51. ↑ 劈友：斬人。
  52. ↑ 嚤：慢。
  53. ↑ 鼻哥：鼻。
  54. ↑ 大嚿：大隻，高大身材。
  55. ↑ 花手巾：魚名，鬥魚，俗稱、龍魚、中國鬥魚、菩薩魚、天堂魚。
  56. ↑ 黐：黏。
  57. ↑ 塘 mei1：蜻蜓。
  58. ↑ 兩仔爺：兩父子。
  59. ↑ 俹簁：音 laa2 sai1，求其是但
  60. ↑ 見面
  61. ↑ 另一版本：「平時你鑔嘴藐藐」，鑔音 caak8 或 caat8。
  62. ↑ 藐音 miu2：唔服氣、藐視咁扁嘴叫嘴藐藐。
  63. ↑ 撩：鬥。
  64. ↑ 鬼叫：邊個叫。
  65. ↑ 嗍：吸。
  66. ↑ 音 gyun1。從孔竅出曰瓹。『玉篇』，瓹。甕底孔下取酒也。『廣韻』，盆底孔也。水從孔出曰瓹。人從孔出亦曰瓹。作動字用。孔仲南，《廣東俗語考》
  67. ↑ 本童謠之中「肥婆」兩字可換做任意人名。
  68. ↑ 蝦：haa1：欺負。
  69. ↑ 音 lyun6 saai3 lung4：大混亂。
  70. ↑ 鳩屎：懶叻。鳩：粗口，本字為「㞗」。
  71. ↑ 另一版本：返嚟食碗辣椒醬！
  72. ↑ 五層樓：即係鎮海樓，喺觀音山（即越秀山）上。
  73. ↑ 本童謠之中「肥仔」兩字可換做任意人名。
  74. ↑ 婦：音「抱」，本字為「婦」。

參考

[編輯]
  1. ↑ 〈久违嘅粤语童谣〉。信息时报。2012-08-22。原著喺2014-09-04歸檔。喺2013-09-14搵到。
  2. ↑ www.360doc.com。〈广州方言汇集〉。www.360doc.com。原著喺2019-12-06歸檔。喺2018-03-05搵到。
  3. ↑ 〈广州方言汇集〉。www.xlmz.net。2005-11-13。原著喺2019-06-05歸檔。喺2018-03-05搵到。
  4. ↑ 來自《廣州兒歌甲集》第二十一篇

出面網頁

[編輯]
由「https://zh-yue.wikipedia.org/w/index.php?title=粵語兒歌&oldid=1904877」收