愛基金

愛基金（英文：Love Foundation）係香港一間慈善機構，2013年由前香港歌手蔣麗萍創辦，主要服務對象係中國大陸留守兒童，關愛工程遍及全國十八個省市，三十幾個地方，培訓農村留守婦女，成為義工媽媽、愛心媽媽。

歷史

2013年，蔣麗萍到中國農村參與扶貧工作，親訪多處中國貧困偏遠地方，發現國內有6千萬「留守兒童」，佢哋嘅父母因為生計，離鄉別井到城市打工，將年幼子女交畀年老父母甚或鄰居代為照顧。呢啲父母可能一年、或數年先會回鄉探望孩子一次。班細路喺缺乏父母嘅關愛和睇管下，導致意外頻生。每年遭到交通意外或荷塘戲耍浸死，甚至不慎中毒身亡嘅留守兒童已達數以萬計。此外，有關農村嘅問題重有三大留守群體隱憂：一班係令人憐惜嘅留守兒童，另一班重有留守農村嘅孤獨老人，佢哋病痛無人照顧，還要幫助兒媳養育幼兒；同埋留守婦女，佢地要承擔繁重農務及照顧老小嘅重任，重要面對長期同老公分隔嘅孤獨，造成精神上嘅痛苦。

因為咁，蔣麗萍同一班熱心基督徒喺2013年底佢創立咗愛基金，與數百位愛心義工一齊用身體力行、愛心播種形式支援內地弱勢群體。希望透過愛基金建構一個愛嘅平台，藉着慈善，把世界各地有心、有能力嘅華人凝聚團結起嚟，成為一股暖流，實踐「愛人如己」，積極回饋社會，讓有需要嘅人得到適切嘅幫助。

服務

支援國內教會開辦兒童夏令營，幫助佢哋建立健康、正確、積極嘅人生觀，學習與人相處嘅道理。
開發兒童教育網站平台，包括聖經同品格故事、英語、中西藝術文化。
協助教會開展兒童主日學，提供教材，並協助培訓導師。
籌款提供電腦、投影機等配套設備，全面提升農村教會嘅學習資源。
從國內外招募暑期義工隊喺夏令營服事，畀細路感受到關愛並開闊視野；義工經歷服事，叫生命變得更豐盛。
籌集資金，幫助貧窮嘅細路都可以免費報讀夏令營，享受美好童年生活。

關顧同支援

愛基金重視人嘅價值同尊嚴，致力扶助留守人群，提供身、心、社、靈上嘅關顧同支援：

「留守兒童」：得到關愛同培育，建立良好嘅品格同價值觀，成為未來嘅社會棟樑。
「留守婦女」：學習新知識同技能，發揮潛能同勞動力，幫助農村兒童同老人。
「留守老人」：得到適切關顧，減輕育兒負擔同辛勞，晚年得安慰。

主要服務

關愛留守服務點

透過同內地合作夥伴愛德基金會成立嘅「愛德基金會愛基金專項」，幫助內地農村單位設立「關愛留守服務點」，提供多元化嘅社會服務畀留守家庭。各省市嘅農村單位，推動每周開放日，提供社區支援同服務，包括量血壓、舉辦家庭同健康講座、提供免費醫療服務等。

義工能力建設培訓

喺各省市舉辦系統性嘅「社會服務義工能力建設培訓」，目標係培訓義工（大部份係留守婦女）去關愛同幫助農村有需要嘅細路同老人家。愛基金為學員提供膳食同一切培訓課程費用，畀學員可以喺冇負擔嘅情況之下專心學習。培訓主要係提升義工嘅知識同技能，並教佢哋學習使用電腦同教材等以協助關愛留守服務點進行各項嘅社會服務。此外，培訓亦幫助留守婦女建立更正面嘅自我形象、價值觀同自信，帶住使命去服務更多有需要嘅人。

捐贈器材同教材

針對農村缺乏物資，愛基金向農村單位捐贈電腦、投影機、健康、婚姻同親子講座光碟等以幫助佢哋展開各項服務，希望能夠令到各項社會服務能夠順利進行。

義診服務

組織牙科同眼科醫療服務隊，走訪農村為留守家庭提供基本嘅醫療服務。專業嘅牙科隊到訪農村，為留守家庭提供牙齒護理講解，以及免費為細路檢查牙齒。此外，亦買咗專業視光儀器並聘請專業視光師，為留守家庭嘅細路同老人提供視力檢查、護眼講座同配眼鏡服務。

助學金

未來工程師助學項目，幫助經濟有困難嘅留守兒童，特別係父母失去工作能力、雙亡、離異、病重等困境嘅細路，支援佢哋完成學業，減輕佢哋家庭嘅負擔同可以專心學習。響應國家支持職業專修教育，除咗為每位學生提供助學金之外，亦會進行工作坊，並舉辦行業講座同就業轉介等活動，幫助學生建立自信心同正確價值觀，鼓勵學生積極學習，以一技之長謀生同愛心回饋社會。互動工作坊包括行業成功人士講座、就業推介、外地學術文化交流等活動，幫助學生認識自我，建立正確價值觀，學習生涯規劃，承傳愛心，回饋社會，活出豐盛人生。

愛學坊‧多功能活動室

資助農村小學興建「愛學坊」多功能活動室。農村寄宿小學資源貧乏，課餘活動單調，專項見到呢個需要，為山區小學建設多功能活動室同互動工作坊，結合視聽、閱讀、興趣教學等多種功能；營造輕鬆愉快嘅學習同活動環境，培養學生德智、閱讀習慣、課餘興趣同課外知識；輔助教師進行音樂、美術、科普等課程嘅擴展教學。

愛心探訪

組織愛心探訪隊探訪留守兒童學校，同學生互動、遊戲、鼓勵佢哋、傳遞愛心。

物資捐贈

每年都有香港同中國內地嘅各界善心人士、機構、廠家，響應呼籲，願意捐贈數以萬計嘅禦寒衣物、圍巾、童裝、童鞋、圖書、文具、書包、益智玩具等物資到唔同嘅服務點。

出面網頁