指示詞

  提示：呢篇文講嘅唔係直指詞。

指示詞，係一啲用來指明某個或者某啲特定嘢、埞嘅詞或者結構。佢既可以用喺空間指稱，又可以用喺講話內容嘅指稱。

分類

日語三套指示詞嘅經典示意圖，可以睇到指示詞啲指代空間跟講者、聽者嘅關係。大體參考《日本語ハンドブック》標註兼翻譯

喺唔同嘅話入邊，按照空間距離嚟分嘅指示詞都有唔同套數。有啲話剩係得一套通用指示詞，就唔分近遠；一般嚟講好多就有兩至三套。兩套即近戥遠，譬如英語、俄語、普通話等；三套可以係近、中、遠，譬如日語、韓語、西班牙語，又可以係近、遠、更遠，譬如越南語，又可以係近、遠、中性指（冇距離），譬如吳語。有啲南壯話除開近、遠、更遠、中性指之外仲有範圍更加窄嘅當前指，但佢哋嘅中性指都係用喺方式、性狀、程度之類（似「噉」「咁」），所以可以話係分四套。粵語唔同埞嘅指示詞套數都有多有少。

喺啲分三套近、中、遠嘅話入邊，唔單止個嘢嘅距離遠近，個嘢近講者定近聽者、都經常會影響埋啲指示詞嘅使用。近講者嘅一般用近指（又叫近稱），近聽者而唔多近講者嘅一般用中指（又叫中稱），離兩者都遠嘅就一般用遠指（又叫遠稱）。

功用

指示詞可以作為形容詞或者限定詞，又可以作為代詞（指示代詞），嚟分別實現指示功能同埋稱代功能。對於唔同嘅指示對象、指示內容，指示詞又可以實現「實在指示」（又叫「現場指示」）同埋「文脈指示」兩種功用。除開句法，指示詞都可以用來表達一啲鍾意、稱讚、不滿之類嘅感情。

粵語

一般嚟講，粵語空間指示詞有兩個，即近指「呢ni1」同埋遠指「嗰go2」，分別指代離講話人近嘅或者遠嘅嘢。「呢ni1」本身又有好多種發音上嘅變體，譬如「呢nei1」、「依ji1」、「哩li1」等。喺唔同方言中，指示詞都會有唔同，甚至唔單止兩個指示詞，仲有中指等。從聲母嚟睇有k-系（個）、n-系（呢、那）、l-系（哩、嚕）、零聲母系（ai1、啊）、d-系之類。

有人認為粵語近遠指基本形最終歸得為兩類，即k-系、n-系；n-系又再分成近指嘅「呢」系同埋遠指嘅「那」系。「呢」聲母鼻音減少咗之後就成為對應嘅l-系「哩」、零聲母系「ai1」、d-系「啲」之類；「那」聲母甩咗之後就成為對應嘅零聲母系「啊」之類。k-系、n-系本身並冇區分遠近，衹有構成咗近遠指對立之後先至出現咗分別。

粵語各埞指示詞表

粵語圈指示詞對照

埞	近指	中指1.	遠指/另指1.	特指2.
廣州	呢ni1、依ji1	-	嗰go2	-
從化	ai1	-	goi3	-
增城	ai1	-	goi3	-
東莞	ngai1	-	嗰go2	-
中山	呢lei1(三角)、 呢ni1/nei1、 gu1(石岐、環城、南朗墟)、 該kaai4(古鎮)	-	嗰go2(三角)、 嚕lou5、 呶nu1(石岐、環城、南朗墟)、 嚀ning*(古鎮)	-
	個ge2(黃圃、浪網、民眾)
澳門	呢ni1	嗰go5/go1(嗰啲)	嚕lou1/lu1(老派)、那nu1(1941)、尼ni1(1941)	-
禪城	呢lei1、dei1(張槎白泯)	-	嗰go2	-
南海	呢nei1/lei1、啲di1(丹灶)	-	啊aa3 、嚕lu5(丹灶)/lou5/lou3/lau1(九江大谷)	-
順德	呢ni1/nei1	-	啊aa3、嚕lou5(杏壇)	-
三水	dit1	啊aa3、嗰go2(西南舊街)	嚕lou2(西南舊街)/lu5(西南)/lou1(樂平)	-
高明	嗰go2	-	那no2(合水布練)、nai5(更樓板村)	-
肇慶	嗰go2	啊aa3	那no6	依ji1
德慶	嗰go3	-	啊aa3	-
封開	嗰go6(羅董)	-	啊aa6(羅董)	-
新興	嗰go2(天堂)	-	nat1(天堂)	-
羅定	/kəʔ33/、gu3	-	嗰go3、啊aa6(素龍)、那naa6(船步)	-
梧州	嗰go3、呢ni1	-	啊ah3/aa3	-
南寧	嗰go3	-	嚕lu1	-
湛江	呢nei1	-	那no1	-
茂名	呢nei1/ni1、該gei2	嗰go3/go2 、那naa2/no1	gui2	-
陽春	嗰go3(潭水)	-	那naa3(潭水)	-
陽東	gu2	-	那naa2	-
化州	幾gei1	-	呢nei1	-
北海	嗰go3	-	那no3	-
欽州	嗰go3	啊aa3	呶/那nu1、嗚wu1、嚕lu1	-
防城	嗰go3	ngo3	ngu1	-
廉州	gat3	-	nat3	-
貴港	嗰go3	-	啊at6/a6	-
鬱林	嗰go3	-	啊at6	-
開平	該kuoi4	-	嚀ning4	-
台山	該kuoi4	-	嚀ning4、keong4	-
恩平	嗰kua4	-	嚀ning4	-
新會	該kui4	-	嚀ning4	-
鶴山	吖aa1(龍口)、該kaai4(雅瑤)	-	呀aa4(龍口)、gaan2(雅瑤)	-

1. 中指係相對於遠指嚟講（譬如日語）；有啲人將中指稱為遠指，遠指稱為另指（第三方）。
2. 除開量詞表特指嘅其他情況。

贛語

贛語裏頭一般嚟講有三隻指示詞，即「該」（/kiɛ/）、「箇」（/kɔ/）、「許」（/hɛ/），分別代表離講話人距離由近到遠嘅程度。

吳語

吳語，特別係近代吳語，指示詞一般為三套，代表近指、遠指、同埋兼指。

兼指又叫「中性指示詞」、「定指指示詞」、「泛指」，雖然有人認為同日語中指一樣，但又有人覺得並冇特定嘅距離（即唔係中指）、而係根據具體語境嚟實現唔同含義：

1. 相對於剩係有近指抑或遠指嗰陣，作為另指，指代另者：戥近指配搭陣時指代遠者，戥遠指配搭陣時指代近者。
2. 認同指，指講者、聽者心照嘅內容。
3. 回指，講話中指代上文提到嘅嘢。
4. 定指，或者定冠詞，指代特定某件嘢，似「隻嘢」。
5. 類指，指代特定某類嘢，似「啲嘢」。
6. 名詞化標記，譬如「個黑」意指黑暗本身。

睇在方言唔同，兼指嘅語法功能都會唔同。有啲方言兼指語法功能發達過其他，所以有定冠詞、類指、名詞化標記等功用，譬如蘇州話、台州話。

近現代吳語指示詞

	近指	兼指	遠指	當代發展
上海	迭/第（dih）	搿（geh）	欸（e1）	「搿」同時有近指、兼指； 「迭」作為老派而共存住
蘇州	該（ke1）	搿（geh）	歸（kue1）	近、遠指發音弱化成「該（e1）、歸（ue1）」
寧波	堂/蕩（don1）	葛/個（keh）	隑（ge3）	「個」嘅配搭「個（keh）一（ih）」定落變成「該（kih）」， 作為： 單指示嘅中性指（城區、清水、鎭海城關） 兩分嘅近指（慈城妙山，遠指「隑（ge）」） 兩分嘅遠指（鎭海北、慈谿北，近指「宕（don）」） 轉成近、遠、更遠指三分嘅遠指（岱山）
台州	里/裏（i2）	個（keh）	吤（ka2）、旁（bong1）、還（wa1）
金華	個（keh）		末（meh）、訥（neh）、拱（gon2）	「個」作為近指
温州	該（keh）	個（kaih）	許（he2）	發音弱化成「居（ke/ki213）、個（kai3）」

• 聲調採取平1上2去3標法、陰陽跟清濁；或者五度標調法（213）。

壯話

壯話可以分為南壯跟北壯兩個，睇在佢哋啲方言嘅唔同，指示詞會有幾重分法。壯話中心詞喺前面，所以指示詞一般擺後尾。

南壯

南壯話喺近、遠、更遠指之外，仲有當前指（指家下）、中性指（用於方式、發語、性狀，似「噉」；或者用於程度，似「咁」），雖然空間近指遠指都可以充任呢種角色。

南壯指示詞

		當前指	近指	遠指	更遠指	中性指
靖西	縣城	kei45/51.	tən4、ni5(殘留)	paŋ6、te1(殘留)	-	pei3/pei3 ni5(噉) ki33/ka213 laːi53/kai31/kan4/kan4 laːi1(咁)
	鄉下		tən213、ni5(殘留)	təm213、te1(殘留)	paŋ213
田陽		kuːi42.	tɯn4、ni5/ne5(殘留)	tɯm4、te1(殘留)	paŋ6	pei3/pei3 ni5(噉) ka4 laːi1/kan4 laːi1(咁)
龍州		-	nai3	niŋ3、min2(殘留)	-	tuŋ3(咁)

1. 用於時間、地點、個體，用於時間仲有配搭似「i³ kei⁵」「i⁵ kei⁵」，即「依家」。
2. 用於時間，唔用於地點，罕見用於個體。

指示時間嘅話，前邊配搭「pei¹」（靖西）、「pou⁶」（田陽）、「mɯ¹¹」（龍州）即可，似「呢排」「呢鋪」。

指示處所嘅話，前邊配搭「aːm⁵」（靖西）、「ʔdaŋ³」（田陽）、「i³」（龍州）即可，似「呢度」「呢笪埞」。

北壯

北壯指示詞大體比較統一：

北壯指示詞

	近指	中指	遠指
東蘭	ni4	ʔdeːu1	te1
柳江	ni4	-	ʔan3
武鳴	ni51	-	te33
都安	ni13	-	te42

• 東蘭中指充任文脈指示、後置定語標記陣時，常弱化成「ʔdi⁶」。

越南語

越南語有三套指示詞，分別為近指、遠指、更遠指，用於唔同結構、場合同語境：

	近指	遠指			更遠指
		講者遠、聽者近		兩者遠	目力所及1.	唔具體確定2.
常定語	này(呢)3.	ấy(𧘇)3.	đó(𪦆)3.	kia(箕)3.	kìa(𣈒)(僅指時間地點)	nọ(奴)
常單用	đây(低)(唔指時間)	đấy(帝)			-
文脈指示4.	này唔得	得		唔得
確定性	確定			唔多確定

1. 用於提示聽者注意。
2. 用於更遠或者過去嘅嘢。
3. 綠色表示可以「量詞+指示詞」指代講緊嘅人/嘢/事，似喺「我鍾意呢個唔鍾意嗰個」噉。
4. 講話內容中可以單用作主語，指代上下文提到嘅人/嘢/事，似喺「……嗰單嘢真係大劑」噉。

跟粵語唔同，越南語除開更遠指嗰兩隻「kìa」「nọ」之外（因為已經作為第三人稱人稱代詞），其他啲指示詞都似普通話一樣單用得作為指示代詞，唔使加量詞。不過其中「đây」「đấy」單用情況就多過「này」「ấy」。

越南話中心詞喺前面，所以指示詞一般擺後尾。啲指示詞跟唔同嘅前詞搭配，就指處所、方位、程度等：

指示詞搭配

功用	前詞	近	遠	更遠	譯
處所	ở(於)	đây	đấy, đó, kia	-	「喺…度」
	nơi(坭)	này, đây			「……度」 「……處」
	chỗ(𡊲)	này	ấy, đấy, đó	nọ
	kia(箕)	-		kìa
	具體場所	này	kia	-	譬如「……(座)山」
方位	đằng(滕)	-	ấy, đó, kia	-	「……便」
	bên(邊)	này, đây		nọ
	phía(𪰂)	này	ấy, đấy, đó, kia	-
時間*	lúc(𣅶)	này	ấy, đấy, đó	-	「……陣」
	giờ(𣇞)
	khi(欺)		ấy, đó
	hồi(回)
	ngày(𣈜)		ấy, đấy, đó, kia	kìa, nọ	「……日」
程度同 方式*	thế(勢)	này	ấy, đấy, đó, kia	nọ	「咁」加形容詞副詞
	như thế(如勢)				「噉樣」加動詞

• 「*」時間、程度衹睇作兩分，意義上唔區分遠、更遠。

同時唔同埞方嘅越南語都有唔同表達：

	空間指				方式、程度指
	近	講者遠	兩者遠	更遠	近	遠
北	này	đấy	kia	kìa	thế này	thế, thế ấy
中	ni, nì	nớ, tê	tê	tề	như ri	rứa, rứa tê
南	nè	đó			như vầy	vậy, vậy đó

日語

考慮到時間（棟軸）、空間（橫軸）、同埋心理距離（笡軸）嗰陣，日語三套指示詞嘅分佈圖。據此可以睇出ソ系列嘅心理距離感、拒斥感。

日語裏頭一般有三隻指示詞根，一般對應嘅疑問詞根都會同佢哋列埋一齊，即「こそあど」，分別代表近、中、遠指（又對應離講者近、離聽者近、離兩者都遠等情況），同埋對應嘅疑問情況；由佢哋就派生出唔同詞性、唔同應用場合嘅指示詞同疑問詞：

詞性	功用	近稱 コ（ko）(此)系列	中稱 ソ（so）(其)系列	遠稱 ア（a）(彼)系列	疑問 ド（do）(何)系列	譯
代名詞	事物	これ	それ	あれ	どれ	「……個/隻」
	場所	ここ	そこ	あそこ	どこ	「……度」
	方向	こっち こちら	そっち そちら	あっち あちら	どっち どちら	「……便」
	人稱	こいつ こなた	そいつ そなた	あいつ あなた	どいつ どなた	「……位」
連體詞	限定	この～	その～	あの～	どの～	「……個」人/嘢/事
副詞	方式	こう このように こうやって	そう そのように そうやって	ああ あのように あうやって	どう どのように どうやって	「噉」做、「點」做 「噉樣」做、「點樣」做
	程度	こんなに	そんなに	あんなに	どんなに	「咁」「幾咁」
形容動詞	類別	こんな～ このような～	そんな～ そのような～	あんな～ あのような～	どんな～ どのような～	「……種」人/嘢/事 「噉樣嘅」、「點樣嘅」人/嘢/事

• 「こんなに」「そんなに」「あんなに」表示程度高，類似「咁」；「どんなに」表示感歎，類似「幾」「幾咁」。

韓語

韓語指示詞分「이그저」三套，近稱「이-」，中稱「그-」，遠稱「저-」，計埋疑問詞「어느-」即有：

韓語指示詞表

	近稱（근칭）	中稱（중칭）/聽者（청자）近稱（근칭）	遠稱（원칭）	疑問（의문）
事物（사물）	이, 이것	그, 그것	저, 저것	무엇
處所（처소）	이곳, 여기	그곳, 거기	저곳, 저기	어디

西班牙語

西班牙語指示詞傳統上一般分為指示限定詞同埋指示代詞，並透過變音符號嚟區分；之不過2012年開始西班牙皇家語言學院接受咗新嘅解釋，即兩類詞查實係一類，之不過係用於唔同結構。

西班牙語指示詞按空間分三類，即近、中、遠，又對應離講者近、離聽者近、離兩者都遠等情況；同時按接詞嘅性、數分四類情況：

指示限定詞
陽性	單數	este, ese, aquel
	複數	estos, esos, aquellos
陰性	單數	esta, esa, aquella
	複數	estas, esas, aquellas