直指詞
提示：呢篇文講嘅唔係指示詞。
好似係粵語語句：
- 「我喺呢度呀。」
就噉睇詞義，我係指講者、呢度係指講者身處嘅地點。噉即係話，如果要知呢啲字詞係指邊一個人或者邊一笪空間，聽者必定要考慮埋話段嘅語境先得。所以呢啲字詞就係直指詞嘅例子。
語言學研究表明，唔同語言喺直指特性上差異可以幾大。例如廿一世紀初嘅粵語，啲空間直指詞傾向只係分遠同近（呢度同嗰度）但係同期嘅日文同韓文就仲會再細分，睇某笪空間係咪接近聽說話嗰一方。
基礎概念
[編輯]| 粵語嘅 deixis |
|---|
| 幾隻粵語字詞嘅詞義：
呢幾隻字詞嘅參照物體係乜，可以視乎講者身處嘅時空位置而變化。 |
美國語言學家查理斯·菲摩亞[7]噉樣描述直指呢個概念[8]：
Deixis 係指緊啲人使用某啲詞庫同文法物件，而個用法受制於段說話身處嘅互動情境嘅某啲細節。呢啲細節包括對話參與者嘅身份、佢哋身處嘅地點同埋方向、佢哋做緊嘅行動、以及話段係喺咩時間產生嘅。
直指呢個概念係講緊字詞嘅意思。喺語義學，字詞意思呢個概念頗為複雜，但係一般都會包含個字詞「指緊乜嘢」；對直指嘅研究出自英文圈，想像任何代名詞，或者以下呢啲英文字詞，
意思 粵譯 詞義 指緊乜嘢事物 Here 呢度 離講者近嘅地點或者位置 要睇語境至知 There 嗰度 離講者遠嘅地點或者位置 要睇語境至知 Later 遲啲... 話段後嘅時間點 要睇語境至知
語境[9]係一個語言學概念，一段話段（或者語言單位）嘅語境係指喺佢周圍、能夠影響佢「應該點理解」嘅因素，例如係隻字詞以外嘅字句、講者身處嘅時間同空間、以至對話雙方嘅文化背景... 等都可以係語境嘅一部份。英文 here 同 there 可以指咩位置，視乎講者企喺咩位，而 later 可以指咩時間點，就視乎講者喺咩時間講出段說話，即係話呢啲字詞指嘅嘢，都受制於佢哋身處嘅語境[1]。呢種現象就係所謂嘅直指，而直指詞就係指一啲本質上就有直指現象嘅字詞。
直指個英文名 deixis（形容詞版係 deictic）取自古希臘文：δεῖξις / deῖxis，呢隻字詞大致係指示、指住噉解，意思上同中文字詞直指好接近。喺中文，呢隻字詞又有譯做指示功能同指別[3]，當中直指同指示功能係香港語言學學會用嘅[註 1]。
主要類型
[編輯]空間
[編輯]
直指詞好多時都會配合手勢嚟用，當中手指指嘅動作就成日同空間直指詞一齊出現：嗰度一詞指緊嘅係邊一片空間，要睇講者隻手指指向邊[10]。
空間直指係話個字詞指緊某一笪空間，而笪空間嘅位置受制於對話參與者嘅位置。空間直指詞可以係相對於講者嘅，尤其係笪空間離講者幾遠，例如呢度或者呢個通常都係指笪空間或者件物件離講者近，而嗰度或者嗰個通常都係指笪空間或者件物件離講者有返咁上下遠。英文都有好似粵語噉嘅空間直指詞，例如 this 正常係指離講者近嘅嘢，而 that（單數）同 those（眾數）正常係指離講者遠嘅嘢[註 2]。想像有個人，佢手上攞住粒荔枝，佢可以用呢粒荔枝（離佢近）嚟指粒荔枝，但係如果佢用嗰粒荔枝嚟指佢手上嘅嘢，就會覺得唔合理[11]。
好多語言有更仔細嘅空間分法，唔淨只係分做遠同近咁簡單[12]。例如廿一世紀初日文嘅空間直指就可以分做近講者、近聽者以及離講者同聽者都遠三大種，假設講者同聽者面對面對話，兩人之間有一定距離[註 3]：
假設而家講者企喺走廊，佢眼前遠遠哋見到課室道門，而聽者就企咗喺課室門隔離，講者正常應該會講 soko 係課室噉嘅說話。如果佢講 asoko 係課室，聽者就會聽到一頭霧水。韓文亦都被指有噉嘅分法[15]——
有部份語言嘅空間直指分法更加複雜，遠遠唔只分做三個區，例如因紐特人嘅語言（分佈喺美洲極北部，近北極圈嗰頭）就被指有超過七種空間類型咁多[16]。
時間
[編輯]時間直指係話個字詞指緊時間入便嘅某一點或者一段，而嗰點或者嗰段時間係乜，視乎段說話係喺咩時間點講出嚟嘅。例如
- 等陣同正話（字詞指緊邊一刻，視乎段說話係喺邊刻講出嘅）、
- 聽日同尋日（字詞指緊邊一日，視乎段說話係喺邊日講出嘅）、
- 出年同上年（字詞指緊邊一年，視乎段說話係喺邊年講出嘅）
等嘅字詞都有時間直指嘅特性。喺好多語言當中，時間直指都要配合時態嚟用，例如喺英文，動詞嘅構詞就有過去式同現在式之分，如果一個動詞指嘅事件發生喺過去（相對於說話出現嘅時間點）佢就要轉做過去式嘅樣，黐好似 -ed 等標示過去式嘅形態素[17]。
時態本身亦可以當係時間直指嘅一部份——假想有句嘢成過去式，噉句說話出現嘅時間點一定係喺句嘢描述嘅事件之後，因此過去式就起咗一個作用，引導聽者「投射」個現在點，而現在點擺喺邊，就會決定啲時間直指詞要點理解[18]。
話語
[編輯]話語直指[19]係指一個字詞指緊其他附近嘅話段。如果有一個字詞或者短語係會要求讀者或者聽者諗返起某段話嘅，噉個字詞或者短語就算係展現咗話語直指嘅特性[20]。例如：
- 「話說有一日，三隻豬仔一齊去行街...（下略三百字）。呢個故事真係好有趣。」
粗體嗰段嘢，係指緊之前講咗嗰個故事。
- 「嗱，想整皮蛋瘦肉粥呢，要噉噉噉...（下略三百字）。噉樣就啱嘅。」
粗體嗰段嘢，指緊之前講咗嗰個解釋。
- 「以上係我嘅結論。」
呢句嘢應該係講者之前講咗一拃推論，然後再講出呢句嘢作結。粗體嗰段係指講者之前講咗嘅推論。
人稱
[編輯]早喺 1997 年，查理斯·菲摩亞已經話代名詞係直指詞最直接最明顯嘅例子[21]：好似我、你同佢等嘅代名詞，必然有直指嘅特性，例句：
- 「阿明尋日做晒功課。佢今日去玩。」
第二句個佢明顯係指阿明，但係如果前面嗰句提到嘅人係第個，第二句個佢指嘅物體就會唔同咗。一個指人嘅代名詞會表達一個人相對於講者同聽者嘅位置：呢啲代名詞分第一人稱、第二人稱同第三人稱三大種。正常嚟講，第一人稱（我）係指講嘢嘅人，第二人稱（你）係指聽說話嘅人，而第三人稱（佢）最常係指兩者之外嘅人[22]。
第三人稱代名詞可以係直指，但又可以係回指[23]。回指係指一隻字詞（或者其他表達式）要點理解，取決於喺同一段話語之前嘅部份出現過嘅字詞，當中隻字詞指嗰樣嘢，之前已經講明咗。想像以下嘅例句：
- 「阿明覺得佢好聰明。」
呢句嘢可以係回指：個佢字可以係指阿明自己——噉嘅話，個代名詞就有回指嘅特性。但又有一個可能性：可能講者同聽者一路喺度望住某個第三者，想講嘅係話阿明覺得嗰位第三者好聰明，噉嘅話個佢字就有直指特性——呢個字詞指緊邊個，受制於講者同聽者望緊邊一個人[17]。
睇埋
[編輯]- 直指中心[24]：直指中心指嘅係直指詞「用嚟做對照」嘅假想點。英文同粵語等嘅主流語言好多時都係「自我中心」嘅，空間直指以講者嘅位置做中心——呢度同嗰度通常係睇指緊嘅位置離講者嘅位置幾遠；時間直指以講者身處嘅時間點做中心——聽日係指講者身處嗰日後一日，而琴日係指講者身處嗰日前一日... 等等。
- 相關語言學領域：語用學、語義學、心理語言學
- 薩丕爾沃夫假說
- 補語化成份標誌
文獻
[編輯]英文文獻：
- （英文） Kwong, O. O. (2018). The Non-deictic Use of Demonstratives in Conversations and Interpreted Speeches in Contemporary Hong Kong Cantonese. In Proceedings of the 32nd Pacific Asia Conference on Language, Information and Computation.
- （英文） Senft, G. (2014). Understanding pragmatics. Routledge. Ch. 2 Pragmatics and psychology: Dietic reference and gesture
註釋
[編輯]引述
[編輯]- ↑ 1.0 1.1 Senft, G. (2014). Understanding pragmatics. Routledge. Ch. 2 Pragmatics and psychology: Dietic reference and gesture
- ↑ （香港繁體） 粵語動詞後綴的完句問題 (PDF) p. 123，佢講咗：「以上例子中從句的正話屬過去時標記... 以前亦然；而主句的依家屬現在時標記，三者都是時間的直指成分（deictic）。」
- ↑ 3.0 3.1 （香港繁體） 粵語「嗱」的一些語言特點 (PDF)
- ↑ 呢度 / 依度，粵典
- ↑ 嗰度 / 嗰道，粵典
- ↑ 聽日，粵典
- ↑ 查理斯·菲摩亞：Charles Fillmore
- ↑ Fillmore 1982. Towards a descriptive framework for spatial deixis. In: Robert Jarvella and Wolfgang Klein (Eds.), Speech, Place, and Action, 31-59. Chichester, UK: John Wiley. p. 35，引文："Deixis is the name given to uses of items and categories of lexicon and grammar that are controlled by certain details of the interactional situation in which the utterances are produced. These details include especially the identity of the participants in the communicating situation, their locations and orientation in space, whatever on-going indexing acts the participants may be performingg, and the time at which the utterance containing the items is produced."
- ↑ 語境：context
- ↑ Danziger, E. (2010). Deixis, gesture, and cognition in spatial frame of reference typology. Studies in Language. International Journal sponsored by the Foundation "Foundations of Language", 34(1), 167-185.
- ↑ Kennedy, David (February 2012). "Here Is/Where There/Is: Some Observations of Spatial Deixis in Robert Creeley's Poetry". Journal of American Studies. 46 (1): 73-87.
- ↑ Lander, Eric; Haegeman, Liliane (2016-09-30). "The Nanosyntax of Spatial Deixis". Studia Linguistica. 72 (2): 362-427.
- ↑ ここ, そこ, あそこ, and どこ are a set of こそあど言葉
- ↑ Hasegawa, Y. (2012). Deictic and anaphoric uses of the Japanese demonstratives ko-so-a. Journal of Japanese Linguistics, 28(1), 44-61. 1.1. Deictic use of demonstratives
- ↑ 15.0 15.1 Anderson, S., & Keenan, E. (1985). Deixis. In T. Shopen (Ed.), Language typology and syntactic description (pp. 265-315). Cambridge: Cambridge University Press.
- ↑ Denny, J. Peter (October 1982). "J. Peter Denny, "Semantics of the Inuktitut (Eskimo) Spatial Deictics"". International Journal of American Linguistics. 48 (4): 359–384.
- ↑ 17.0 17.1 Deixis in Modern Linguistics. University of Essex. Temporal deixis
- ↑ Sanders, J., & van Krieken, K. (2019). Traveling through narrative time: How tense and temporal deixis guide the representation of time and viewpoint in news narratives. Cognitive Linguistics, 30(2), 281-304.
- ↑ 話語直指：discourse deixis
- ↑ Webber, Bonnie Lynn (June 1988). "Discourse Deixis: Reference to Discourse Segments". 26th Annual Meeting of the Association for Computational Linguistics. Buffalo, New York, USA: Association for Computational Linguistics: 113-122.
- ↑ Fillmore, C. J. (1997) Lectures on Deixis. Stanford, CA: CSLI Publications.
- ↑ Green, G. M. (2008) Pragmatics and natural language understanding. New York, NY: Routledge.
- ↑ 回指：anaphora
- ↑ 直指中心：origo / deictic center