人稱代詞

人稱代詞（粵拼：jan4 cing1 doi6 ci4）係代名詞嘅一種，用嚟指人稱。人稱可以分做第一人稱（指講者自己）、第二人稱（指聽緊講者講嘢嘅人）同埋第三人稱（指緊兩者以外嘅第三方）三大類。喺粵語，我係第一人稱，你或者閣下係第二人稱，而佢就係第三人稱。喺英文，基本嘅人稱代詞就有 I（第一人稱）、you（第二人稱）同埋 he/she（第三人稱）等等。

粵語

粵語嘅人稱代詞有我、你、閣下同埋佢等等。

佢（粵音：keoi5）係粵語一隻特色詞，等同於官話當中嘅他、她或它。據考究，呢隻詞查實係古詞，古人會寫作渠（現今粵語讀作 keoi4），例如三國志卷六十三（估計出自西晉；266 年－316 年）就有噉嘅句子^[1]^[2]：

「女壻 (同婿) 昨來，必是渠所竊。」

而噉樣嘅寫法，喺唐朝嘅文獻中亦可以見得到。到咗廿一世紀初，喺各現代漢語嘅書寫當中，用渠嚟寫第三人稱代詞嘅做法已經好少見，不過某啲華南嘅漢語依然保留咗由渠演變而成嘅用法，例如粵語就係噉，有啲甚至會直接用返渠嚟寫第三人稱代詞。

變化

性別

有好多語言嘅人稱代詞都會分男女，例如歐洲語言就係噉，廿一世紀初嘅粵語喺書寫上亦有分佢同姖嚟分男女。但係喺一般情况下，第三人稱代詞都係佢。呢樣嘢可以引致翻譯上嘅問題。

舉個實際例子，噉想像而家做機翻，

Input：She goes to the hospital.；呢句想譯做粵文 →
Output：佢去醫院。

由於粵語本身嘅特性，句粵文 output 唔包含「句子最頭嗰個佢，係女嘅」呢一件資訊，即係話由英文 input 變做粵文 output 嘅過程入面，有啲資訊唔見咗；如果研究者跟住叫部電腦將句粵文 output 掉轉頭譯返做英文，就可能會變成 He goes to the hospital.－句嘢嘅意思走咗樣。

禮貌

日文啲人稱代詞（尤其係我同你）有相當複雜嘅變化，要基於「體貌程度」嚟變樣，例如講自己（第一人稱）嗰陣，boku（ぼく / 僕）同 ore（おれ / 俺）都係男性用嚟指自己嘅代名詞，但 ore 係比較粗魯嘅，如果有個人喺正式場合度用 ore，啲人會覺得佢好冇禮貌^[3]。

睇埋

引咗

↑ （香港繁體）文言知識﹕「渠」與「佢」，明報
↑ （香港繁體），夾雜少量粵文，「佢」哋定「渠」哋：廣東話正字你識幾多　粵音本字或消亡？，香港 01
↑ Miyazaki, A. (2004). Japanese junior high school girls’ and boys’ first-person pronoun use and their social world. Japanese language, gender, and ideology: Cultural models and real people, 256-274.

[1] （香港繁體）文言知識﹕「渠」與「佢」，明報

[2] （香港繁體），夾雜少量粵文，「佢」哋定「渠」哋：廣東話正字你識幾多　粵音本字或消亡？，香港 01

[3] Miyazaki, A. (2004). Japanese junior high school girls’ and boys’ first-person pronoun use and their social world. Japanese language, gender, and ideology: Cultural models and real people, 256-274.

[1]

[2]

[3]