排版軟件

排版軟件係專門用嚟排版嘅軟件，可以係用圖像用家介面或者用文字用家介面嘅都有；如果咁分，圖像用家介面嘅通常會偏向側重版面設計（英文會叫 page layout software），而文字用家介面嘅通常會偏向側重排字（英文會叫 typesetting system），但係無論係邊種，都一定要同時排到字同排到個版面出嚟。

平面設計用嘅專業排版軟件除咗排個版面出嚟，通常有幾項額外要求，包括要整到裁切記號（crop mark）、可以分色、可以用CMYK色彩模式但係又可以落專色、排字要排得好同可以控制等等。

如果係排印刷嘅版，以前輸出通常係 PostScript，而今gaa1就通常係 PDF。不過喺2010年代左右開始，排版軟件已經唔再係淨係要可以排印刷嘅版出嚟，例如有啲可能（某程度上）可以排到電子書，又或者輸出到（某程度上嘅）無障礙 PDF 等等。

DTP

最初有圖像用家介面嘅排版軟件嗰陣，呢類排版軟件嗰陣叫桌面出版系統（DTP），意思係指可以喺個人電腦就排到版；但係早喺2010年代，呢個名喺平面設計同印刷業其實已經冇人用，甚至有人覺得係貶義。翻譯界仲有人講 DTP，但係佢哋講嘅 DTP 好多時並唔係指排版軟件，而係指用 Word 或者 PowerPoint 排版，又或者排版嘅輸出係低解像度嘅點陣圖（即係可以槷入 Word 或者 PowerPoint 入面）。