搞笑諾貝爾獎

荷蘭 Radboud Universiteit Nijmegen 嘅 Andre Geim 同埋英國碧仙桃大學嘅米高巴里（Michael Berry），用磁浮技術（magnetic levitation），將一隻青蛙浮起，獲得2000年搞笑諾貝爾物理學獎。喺十年後嘅2010年，Andre Geim 因為關於石墨烯嘅研究，而獲得真正嘅諾貝爾物理學獎。

搞笑諾貝爾獎（英文：Ig Nobel Prize；當中 Ig Novel 讀音：/ˌɪɡnoʊˈbɛl/），係一個幽默諷刺嘅獎，由1991年開始，每年都會頒發，係對諾貝爾獎嘅搞笑模仿，用嚟慶祝科學研究嘅十個幽默、搞笑、瑣碎嘅成就。佢嘅目標係「表揚先搞笑，再令人思考嘅成就」（honor achievements that first make people laugh, and then make them think）。呢個獎嘅名係模仿諾貝爾獎同埋「謙卑」（ignoble）呢個詞嘅雙關話。

搞笑諾貝爾獎由科學幽默雜誌《不可能研究年鑑》（Annals of Improbable Research，AIR）主辦，每年喺麻省理工學院舉行嘅儀式上面由諾貝爾獎得主頒發。得獎者亦會發表公開講座。搞笑諾貝爾獎嘅獎金係一張100萬億津巴布韋元嘅紙幣（實際價值大約係0.40 美元，但係有珍藏價值）。

歷史

搞笑諾貝爾獎由馬克亞伯拉罕斯（Marc Abrahams）喺1991年創立，佢係《不可思議研究年鑑》嘅聯合創始人兼編輯，曾經做過《不可重現結果雜誌》（Journal of Irreproducible Results）嘅主編，佢一直都做所有頒獎典禮嘅司儀。當時係頒獎俾嗰啲「唔可以或者唔應該俾人複製」（cannot, or should not, be reproduced）嘅發現，每年都會頒十個獎，分別有幾個類別，包括諾貝爾獎嘅物理、化學、生理/醫學、文學、經濟學同埋和平獎，仲有其他類別，例如公共衛生、工程、生物學同埋跨學科研究。除咗第一年頒俾虛構嘅科學家Josiah S. Carberry、Paul DeFanti同埋 Thomas Kyle嘅三個獎之外，搞笑諾貝爾獎都係頒俾啲真正有成就嘅人。

呢啲獎有時會透過諷刺嘅方式嚟批評，例如兩次頒獎俾順勢療法研究；頒俾干沙州教育部同哥羅拉度州教育局嘅「科學教育」獎嚟，原因係佢哋對進化論教學嘅立場；喺索卡惡作劇之後，頒獎俾《社會文本》期刊。不過，佢哋通常都會將注意力集中喺嗰啲搞笑同埋出乎意料嘅科學文獻上面。例如：發現有人類在場會引發鴕鳥嘅性慾；黑洞符合地獄嘅一切技術條件；對「五秒規則」（five-second rule）嘅研究，呢個係搞笑嘅講法，即係話如果喺五秒內拎起掉咗落地嘅食物，啲食物就唔會受到污染。

Andre Geim 爵士喺2000年，因為用磁力令青蛙浮動，而得到搞笑諾貝爾獎，而佢十年之後，喺2010年，因為研究石墨烯嘅電磁性質而獲得真正嘅諾貝爾物理學獎。截至2023年，佢係唯一一個同時得到諾貝爾獎同埋搞笑諾貝爾獎嘅人。

頒獎典禮

搞笑諾貝爾獎嘅獎項多數由諾貝爾獎嘅得主頒發，頒獎儀式原本係喺麻省理工學院嘅演講廳舉行，但係喺1994年之後就搬咗去哈佛大學嘅桑德斯劇院（Sanders Theater）嗰度。 由於受到武漢肺炎疫情嘅影響，呢個活動喺2020年到2023年期間改成喺網上舉行。 喺2024年9月，頒獎儀式又搬返去麻省理工學院舉行。

每次搞笑諾貝爾獎頒獎典禮都係「第一屆」。喺頒獎典禮嗰度，得獎者可以用一分鐘嘅時間（one-minute rule）向公衆解釋佢嘅成就同貢獻。如果解釋嘅時間超過一分鐘，台下面抱住布公仔嘅八歲細路女（叫做 Miss Sweetie Poo）就會不斷大嗌：「唔該停低：我好悶呀！」（Please stop, I'm bored）。傳統上，個頒獎禮會用呢句說話結束：「如果你冇贏到獎 —— 尤其係贏咗嘅話 —— 下年好運啦！」（If you didn't win a prize—and especially if you did—better luck next year!）。

呢個儀式由哈佛電腦學會、哈佛-域基夫科幻小說協會同埋哈佛-域基夫物理系學生會一齊贊助。諾貝爾獎頒獎禮喺歡迎致辭之後，瑞典國王會帶領王室成員進場，但係搞笑諾貝爾獎歡迎致辭之後，進場嘅係瑞典肉丸（Entrance of the Swedish Meatball Royalty）。

將紙飛機拋上舞台係搞笑諾貝爾獎嘅傳統。 直到2018年，哈佛大學物理學教授格勞伯（Roy Jay Glauber）死之前，佢都係官方嘅「掃把守護者」（Keeper of the Broom）身份，負責掃咗飛咗上舞台嘅飛機。喺2005年，佢參加唔到頒獎典禮，因為佢要去斯德哥爾摩攞真正嘅諾貝爾物理學獎。

有個叫「Parade of Ignitaries」，類似「尊貴人士巡遊」（Parade of dignitaries）嘅進場儀式，包括支持團體嘅人會進場。喺1997年嘅儀式上面，一班「低溫性行為研究人員」（cryogenic sex researchers）喺會場嗰度派發一本叫做「開氏4度之下嘅安全性行為」嘅小冊子。 壞藝術博物館（Museum of Bad Art）嘅代表經常喺頒獎典禮現場展示佢哋收藏嘅一啲作品。

港、台

台灣

1995年嘅搞笑諾貝爾獎嘅和平獎係由台灣立法院（Taiwan National Parliament）攞到，因為佢哋證明咗政客互相拳打腳踢同挖苦，比起向其他國家發動戰爭，對世界和平更加有貢獻。

香港

2023 搞笑諾貝爾獎嘅教育獎得主係香港大學嘅團隊。香港大學心理學系博士生譚琬恩（依家係多倫多大學博士後研究員）嘅研究團隊喺2020年發表嘅論文，研究課堂嘅沉悶程度同埋老師自己覺得沉唔沉悶嘅關係。個研究搵咗香港兩間中學嘅437個學生同埋17個老師做實驗，了解如果老師認為自己教得悶，會點樣影響學生嘅學習動機；結果發現如果老師自認教得悶，會令學生都覺得上堂上得悶，同時如果學生誤認老師佢自覺教得悶，亦都會有相同嘅效果。