新四十二章
《新四十二章》（英文：Treasure of Destiny，原名《四十二章經》，中國大陸用名《傲嬌與章經》）係香港無綫電視製作嘅時裝電視劇，喺2023年1月首播，由陳豪、龔嘉欣、周嘉洛同江嘉敏領銜主演，並由譚凱琪、鄭子誠、黃山怡、鄺潔楹、林景程、易宇航、吳子冲同李君妍聯合演出，監製陳維冠。套劇用咗金庸小說《鹿鼎記》入面「四十二章經藏寶圖」嘅傳說做藍本去創作嘅現代尋寶故仔。
套劇借用咗無綫電視1984年劇集《鹿鼎記》嘅一啲片段，亦用咗佢首主題曲《始終會行運》做套劇嘅片尾曲。
故事大綱[編輯]
豬肉檔老闆娘朱螢嬌（龔嘉欣飾）喺大學修讀中文系碩士課程，期間遇上為人風趣幽默但精神萎靡嘅教授章經（陳豪飾）。二人經常發生磨擦，猶如前世冤家，但大家都唔知，命運早注定二人要經歷百般波折，先能夠修成正果、得到傳說中嘅寶藏。擁有數學天賦嘅邵桂芝（江嘉敏飾）對擁有雙重人格嘅柯建寧（周嘉洛飾）一見鍾情，亦想搵到寶藏。同一時間，幫章經解決失眠問題臨床心理學家關玉菁（譚凱琪飾）亦對寶藏打主意。眾人為咗寶藏，展開一輪明爭暗鬥……
爭議[編輯]
抄襲爭議[編輯]
有部分觀點批評呢套劇，有唔少位置都出現抄襲問題：
- 初版海報抄襲內地劇《一路繁花相送》嘅海報，兩張海報都係主角排排坐、部分角色同樣翹腳chok樣、海報背景都係淺色主調、同埋劇名字眼都係由紫色漸變至藍色[1]。
- 劇集開宗名義向《鹿鼎記》「致敬」，但呢啲古代角色輪迴轉世來到現代嘅橋段，無綫已經用完一次又一次，自我抄襲《水滸無間道》同其他作品[2]。
被指拍攝過程對先人不敬[編輯]
《新四十二章》入面取景嘅大學場地原來係位於屯門曾咀靈灰安置所，有啲網民就批評，呢啲舉動對先人不敬，亦有人話無綫咁樣係對在生嘅觀眾不敬，當觀眾係傻[3][4]。
臨時由台慶檔期抽起同刪減集數[編輯]
《新四十二章》本嚟被安排做其中一套無綫電視55周年台慶劇，喺2022年11月中首播，但最後臨時抽起咗，改由《法證先鋒V》頂替，並順延到2023年1月底首播。
另外，套劇原來係25集，但首播期間縮減到24集完，最後一個禮拜播到禮拜四就大結局，禮拜五同一時段安排播《獎門人Ladies First感謝祭》，刪減集數原因未明，亦係翡翠台極罕見安排一套自製劇喺禮拜四播大結局。根據之前由電視台公開嘅劇照，黃山怡飾演嘅大反派Nasa被射盲右眼後原來未死得，再戴住眼罩同眾主角喺木廠進行終極對決，而主角都戴有防毒面罩，呢啲情節最後並未有播出，監製陳維冠辯稱唔關戴防毒面罩敏感事，而係因為想配合劇名《新「四十二」章》，所以剪成24集[5]。
參考資料[編輯]
- ↑ 〈《新四十二章》被指抄大陸劇 海報設計十足十 Google都分辨唔到不同 | 最新娛聞〉. 《東方新地》 (美國英文). 2023-01-31. 喺2023-02-05搵到.
- ↑ 〈大台監察2.0 - 橋段不斷重複的創意VI〉. www.facebook.com (繁體中文). 喺2023-02-05搵到.
{{cite web}}: CS1 maint: url-status (link) - ↑ HK, Channel C. (2023-02-02). 〈TVB劇借靈灰場扮大學取景 網民踢爆非首次 曾用火葬場當醫院 | Channel C〉. channelchk.com (繁體中文). 喺2023-02-02搵到.
- ↑ 黃欣華 (2023-02-01). 〈新四十二章｜陳豪任教大學用靈灰龕取景 網民質疑對先人不敬〉. 《香港01》 (香港中文). 喺2023-02-02搵到.
- ↑ 《新四十二章》刪糖妹獨眼打鬥戲分 網民指結局草草收場 監製稱無計劃開續集
出面網頁[編輯]
 |
維基同享有多媒體嘅嘢： 新四十二章 |
