無綫電視

電視廣播有限公司（通稱無綫電視，香港交易所：00511，OTCBB：TVBCY）係香港其中一間電視台，由利孝和、祈德尊、邵逸夫等人創辦。無綫係1967年啟播，嗰陣香港得佢一間免費收睇電視台。佢而家除咗有主要嘅中文頻道翡翠台（Jade）同埋英文頻道明珠台（Pearl）之外，重有J2同埋全港唯一24個鐘免費播放財經節目嘅無綫財經台，以及全港第二條24個鐘免費新聞頻道無綫新聞台。

電視廣播有限公司而家嘅總部係位於將軍澳工業邨嘅電視廣播城。

演藝圈嘅大果樹

無綫開台咁多年嚟，開創咗好多香港潮流，好似舉辦《香港小姐》、《勁歌金曲》同埋《新秀歌唱大賽》等等，亦捧紅咗好多藝人同埋歌手，包括周潤發、劉德華、梁朝偉、周星馳、梅艷芳、張曼玉等人，當中有好多重當選過影帝影后；有啲甚至得到海外藝壇嘅賞識，遠赴美國荷里活影圈發展。

與眾同樂

無綫電視，可以話係香港市民日常生活嘅朋友，佢哋除咗會隔住大氣電波喺電視做戲唱歌畀觀眾欣賞之外，重好多時會邀請觀眾去到電視台一齊參與節目，一齊感受現場嘅氣氛。而每逢一啲大時大節或者特別節目，都會帶隊去到公眾地方表演，近距離接觸市民，增加大家嘅親切感。講到參與感，最受觀眾歡迎同支持嘅就一定係有獎遊戲節目嘞，玩嘅固之然會開心，得獎就更加高興，但係睇嘅亦都會覺得過癮。

風雨同路

香港近呢幾十年嘅歷史，一直都有無綫電視嘅新聞同埋時事節目為大家見証。講到無綫嘅新聞資訊節目都可謂多元化，除咗每日嘅正點新聞之外，重炮製咗好多唔同類型題材嘅專題節目，有關心時事，探討社會嘅，亦會帶觀眾走出國際，追訪內地，甚至帶觀眾上太空，可以話差唔多走遍天涯。其中重有啲專輯係得過國際大獎嘅榮譽。

慈善籌款

一直以嚟香港都重有好多需要人幫嘅人未能得到援手，單靠賣旗籌款，當街募捐等係唔足以幫助到問題；無綫電視每年都為唔同嘅慈善機構舉辦大型電視綜合節目向廣大觀眾籌募善款；有時遇着國際性嘅災難，好似當年嘅華東水災咁，一眾演藝人就會發起大型演出，希望各界可以施以援手，為救助難民出一分力。

出面網頁

• 網頁