無綫電視演員待遇爭議

無綫對旗下演員嘅薪酬同工作安排，不時引起批評，其中「一年一show」係其中一個引起最大爭議嘅手法，無綫又對一啲非一線藝人不斷咁減人工，甚至出現過勞死嘅事件。

「一年一show」爭議

「一年一show」嘅制度下嘅演員，每年只會落到相當於一個演出嘅工資，2021年計大約係15000港元，冇底薪，冇MPF又冇醫療福利。

呢個制度曾經引起唔少人嘅抨擊，去到2021年12月，無綫一個月內有7名藝人離巢，藝人黃一山就喺社交媒體批評，係因為「一年一Show」嘅政策導致，而帶來嘅後果，仲有就係節目質素不斷下降。

但有啲人就認為，無綫都要考慮自己嘅業績同開支，呢個制度其實容許藝人喺出面接工作，仍然續約已經係盡咗最大努力。

過勞工作事件

• 資深演員陳鴻烈喺2009年11月開工期間因為心臟病發逝世，當時傳媒就報道，陳鴻烈喺猝死前一星期已經開工超過69小時，但佢嘅底薪只有每月港幣3,000元（比起1964年佢喺邵氏嘅3,500元仲要低），而假設拍劇廿集，每月總收入亦得大約六萬港元，喺演藝界唔算高。陳鴻烈嘅逝世，亦引起一啲人對年長演員嘅工時同保障問題嘅關注。
• 另外，已經七十幾歲嘅資深藝人余子明，曾經收到「2330至2800」，即係晚上11：30去到第二日凌晨4：00嘅通告，有人就批評咁樣會令人頂唔住。甚至有時改咗通告又唔通知，例如遲咗Call嘅，佢就由得班演員提早到冇嘢畀佢哋做。

待遇孤寒無法支持基本生活

除咗「一年一show」，有啲藝員甚至要簽無底薪合約。喺2021年離巢嘅梁茵接受訪問嗰陣，直接話無綫電視以佢之前嘅包薪約嘅騷量唔達標做理由，傾續約嗰陣要佢簽份新嘅無底薪新約做補償；正因為咁佢同藝員部理論過，話唔想次次臨續約先俾人咁侮辱，所以先決定走人外闖。

另外，唔同年紀嘅藝人，就算未至於「一年一show」，但都會批評無綫孤寒，例如。吳耀漢喺2021年3月接受車淑梅電台節目《舊日的足跡》嘅時候都批評無綫對藝員孤寒。有啲藝員嘅待遇亦無辦法連維持基本生活，就連無綫元老汪明荃都曾經公開喺2020年台慶節目批評，要求加人工，當時得到全台藝人拍手和應。另外，有唔少藝人，例如係張智軒、林師傑、陳智燊同劉江，都曾經講過無綫不斷咁減人工，選擇離開。

非一線演員被幕後不禮貌對待

喺無綫，非一線演員遭受幕後工作人員不禮貌對待嘅事情並不罕見。

• 前娛樂新聞台主播曾西喺2022年5月接受訪問嘅時候曾經透露，如果你唔係一線演員嘅話，就連化妝間嘅工作人員都會踩你一腳，形容環境令人窒息。
• 另外，喺2012年，劇集《心路GPS》喺拍攝過程中亦曾經發生虐待演員事件，導演張永豪因為不滿劉蔚萱嘅的表現，而對佢施虐，明知佢怕田雞都要用有田雞味嘅膠袋笠佢頭，而且仲要撼佢個頭埋牆。