關於無綫電視喺網上聲量做假嘅爭議

無綫電視近年開拓網上業務，亦重視旗下藝人同節目喺網上嘅聲量同埋網民反應，但有啲人就指相關評論滲入水份，對藝人嘅讚好其實都係買返嚟，並唔係真實網民嘅反應。

部分例子

高海寧參與《無限訓練班》造型照被指買打手呃like

2022年，高海寧、張振朗同王浩信等人北上參與拍攝綜藝節目《無限訓練班》，去到7月有新一集入面，高海寧扮演小龍女並且將造型照放到微博上面，開頭好多評論都對佢批評，但去到咁上下又忽然一面倒多咗好多正評，數目超過負評，like數亦忽然倍增，有網民質疑造假，但高海寧就否認指控。

炎明熹《真話的清高》播放率被指做假

炎明熹參與《聲夢傳奇》之後，出道第一首主唱歌曲《真話的清高》，歌曲去到2022年2月喺YouTube嘅點擊率去到500萬，但有網民發現歌曲嘅「聽眾國家/地區」有些問題，除第1位及第3位分別係香港和澳門外，其他地方都係中東地區，例如第2位「巴格達」、第6位「雅加達」等等，而且喺國家方面，印度位居第2 、印尼位居第3。有網民揶揄佢係「印度、中東、土耳其三國天后」，亦有網民比較Mirror各成員同埋團體嘅歌曲，表面點擊率雖然差唔多但分佈就正常得多，唔會出現發現咁多中東印尼地區聽眾。

游莨維《東張西望》外景拍攝雲咸街槍擊案捱批後疑似獲網軍聲援

内文：關於東張西望嘅爭議 § 2022年游莨維拍攝雲咸街槍擊案記者會和正規記者衝突

2022年6月，中環蘇豪區雲咸街爆出槍擊案，游莨維代表《東張西望》喺現場拍攝，期間疑似同在場正規港聞記者發生衝突，佢事後喺社交媒體出post，結果引起一啲網民批評。之後多個傳媒發現，有大批名字並唔係華人，疑似網軍嘅帳戶留言，統一寫住『支持Monster Joe不用理會別人 做一個良心好記者』，將游莨維嘅別名『Master Joe』寫成『Monster Joe』。