香港電視娛樂

香港電視娛樂有限公司

類型	有限公司 電訊盈科子公司
開檔	2010年1月18號 (2010-01-18)
總部地址	香港香港島鰂魚涌英皇道979號太古坊電訊盈科中心41樓  香港九龍九龍灣展貿徑1號九龍灣國際展貿中心8樓899室（綜藝同娛樂）  香港九龍九龍灣啟祥道17號高銀國際金融中心6至8樓
緊要人物	李澤楷（創辦人） 魯庭暉（董事會成員） 鍾廣德（總經理） 金廣誠（製作部副總裁）
產業	傳媒、電視、大眾傳播
產品	ViuTV及ViuTVsix
網址	viu.tv

香港電視娛樂（英文：HK Television Entertainment）係香港免費電視台，由電訊盈科擁有。香港電視娛樂已經晌2013年10月獲行政長官會同行政會議原則上應承有得發牌，並計劃晌發牌後12個月同18個月內分別開設粵語同英語頻道。2015年4月1號，香港電視娛樂正式獲發免費電視牌，為期十二年。首條免費粵語電視頻道ViuTV喺2016年4月6號啟播，另一條免費英語電視頻道ViuTVsix喺2017年3月31號啟播。

2022年4月下旬，香港電視娛樂進行業務重組，電訊盈科開咗間叫MakerVille‎嘅公司，接手香港電視娛樂嘅節目製作同藝人管理工作，實現「製播分家」。同年5月頭開始，所有首播嘅香港電視娛樂自製節目（包括之前已經播緊嘅節目）片尾公司標誌，亦由香港電視娛樂改做MakerVille。

免費電視頻道一覽

頻道 編號	頻道名	頻道內容	傳送制式	視訊制式	啟播日期	相關連結
99	ViuTV	24小時粵語綜合頻道，提供劇集、綜藝節目、清談節目、紀錄片同「真人騷」。	數碼廣播	高清電視	2016年4月6號	官方網頁
96	ViuTV Six	16小時英語綜合頻道。	數碼廣播	高清電視	2017年3月31號

合約藝員

ViuTV出鏡嘅大部份藝人都係簽部頭合約，即係一份合約拍一個節目，開台初期只係得少數出身now TV嘅藝人屬簽長約嘅合約藝員，而MIRROR同ERROR嘅音樂作品及演唱會係由「大國文化藝人管理有限公司」做經理人，之後ViuTV亦透過選秀比賽（譬如《美選D.n.A》同《全民造星》）同其他途徑去吸納合約藝員。

2022年4月開始，香港電視娛樂嘅藝員改為同新公司MakerVille‎簽約，MakerVille旗下藝人就即係ViuTV嘅合約藝員。