華娛衛視

出自維基百科,自由嘅百科全書
Jump to navigation Jump to search
華娛衛視
邊位屬下 TOM集團
開播 1995年3月11號
停播 2016年12月31號24:00:00
廣播語言 普通話
總部位置 Flag of the People's Republic of China.svg 中國廣東深圳
南山區科技園科技南十二路2號
金蝶軟件園B棟5層南座

華娛衛視粵拼waa4 jyu4 wai6 si6簡化字华娱卫视英文China Entertainment Television),簡稱華娛CETV,係TOM集團屬下嘅一間已經停止播出嘅衛星頻道,頻道主要播出娛樂節目,播出語言為純普通話。呢個頻道喺播出期間,凈限香港澳門廣東廣州深圳珠海、三星級以上嘅酒店同涉外小區,吉林長春地區先至收到。

佢嘅發射站喺深圳。

[編輯]

1995年3月11號,原星加坡籍電視製作人——蔡和平喺香港九龍塘成立咗呢間電視台[1],重將1980年代同1990年代播得好火爆嘅《歡樂今宵》節目經驗帶到呢間電視台而開播。初期時因為播咗好多部進口熱門劇集同熱門嘅娛樂節目而一度受到歡迎,但2000年因為財政出現困難,2001年俾美國AOL時代華納入主而變成旗下首間中文頻道。2003年9月15號,TOM集團正式收購華娛衛視。但收購後,節目質量一直冇改善,連續11年夾埋蝕咗超過6億港紙[2]

2016年10月25號,華娛屬下嘅主管公司——TOM集團為咗保護集團股東利益而宣佈,喺2016年底停播[3][4]。同年12月初,華娛嘅微信公眾號都停埋。

2016年12月26號,華娛衛視喺屏幕左邊好多時打出咗一系列捆白邊黑字,話頻道喺跟住落嚟嘅大除夕倒數完後停播。

從2016年12月23號開始,電視台播嘅部分綜藝或劇集節目半佬,喺屏幕左邊發佈咗喺2016年大除夕倒數完之後停播嘅公告,同時通訊事務管理局亦收到華娛停播嘅消息[5]

2016年12月27號,華娛衛視嘅官網亦唔可以正常訪問;2日後,官網直播源都落埋架。

2017年1月1號00:00,電視台喺播完翻炒嘅《2012華娛衛視亞洲十大紅人頒獎典禮》行完上升字幕後,畫面打出有動畫預告帶「華娛衛視衛星信號及節目喺2017年1月1號00:00停播,感謝觀眾多年支持。」嘅字樣。畫面亦喺8分鐘後定格。

落地中國大陸[編輯]

2002年1月1號,頻道俾國家廣電總局(今日嘅國家新聞出版廣播電影電視總局)批准而落戶廣東省有線電視網絡,成為第一間落戶廣東有線電視嘅境外頻道。但其它省份凈限喺三星級以上嘅酒店同外國人、港澳臺居住小區播出。

雖然中國大陸有明文規定唔畀喺廣東珠三角以外地區轉播港澳臺或國外頻道,但有唔少縣級或唔知名地區都可以靜鷄鷄睇到包括華娛衛視等其它港澳臺或國外頻道。喺廣東地區,曾經喺廣州、深圳、東莞、珠海、中山、惠州地區播過呢個頻道,但惠州、東莞同埋中山地區先後因接到投訴而停咗呢個台。

2009年,吉林長春有線為咗完成數字電視轉換工作,重引入咗呢個台兼整成加錢先至睇到嘅頻道。

由於TOM集團喺2016年10月25號宣佈頻道會喺年底停播,屆時廣州、深圳、珠海、三星級以上酒店同涉外小區都會調整電視信號表。

停播之後[編輯]

華娛衛視停播之後,原版信號喺2017年1月1號00:13變成黑屏。右下角帶圓點嘅信號[註 1]喺當日00:00消失,00:08變成卡屏狀態,11:17變成冇台標嘅彩條信號。而廣州、深圳同珠海播出嘅信號一直持續卡屏狀態,但長春當地播出嘅信號變成彩條。兩日後,深圳當地嘅有線同天威視訊、各大三星級以上嘅酒店同涉外小區都做咗刪台處理。2017年1月5號,珠海廣電網絡亦做咗刪台處理。

2017年4月1號,廣州地區屬下嘅番禺有線用咗廣州電視台購物頻道頂住原有華娛衛視嘅頻道位。12日後,廣東有線亦將華娛衛視做咗刪台處理。

2017年5月23號,廣州地區屬下嘅花都有線用咗廣州電視台購物頻道嚟頂住原有華娛衛視嘅頻道位。

2017年6月17號,廣州地區屬下嘅白雲有線從模擬信號轉成數碼信號時,順手將華娛衛視嘅頻道位都刪埋。

2017年6月26號,廣州地區屬下嘅市線將華娛衛視嘅頻道位改成機頂盒自帶嘅停播信號(黑屏)畫面。

用過嘅台徽[編輯]

註同攷[編輯]

  1. 喺中國大陸,經過國家新聞出版廣播電影電視總局批准播出嗰啲境外頻道,屏幕右下角都有白色嘅透明圓點仔響度。