香港免費電視牌照爭議

事件主角香港電視網絡主席王維基喺佢母校香港中文大學嘅新亞書院圓形廣場主持講座（2013年）

2013年10月20號，12萬市民遊行後，佔據政府總部門外「公民廣場」、添美道、中信大廈旁嘅行人路同天橋上，反對香港政府喺唔交代理據嘅情況下唔發牌畀香港電視網絡。

香港免費電視牌照爭議源於2009年香港政府計劃增加免費電視牌照，但去到2013年10月香港政府公佈結果後觸發嘅一場爭議。

2009年年底，香港3間電訊商向廣播事務管理局申請免費電視牌照，其中一位申請者城市電訊主席王維基表現相對積極，喺2012年成立香港電視網絡，大肆招兵買馬，並拍攝咗十幾套電視劇，引起少觀眾嘅關注同期待。但去到2013年10月15號，行政會議完成審批程序，原則上同意批發免費電視牌照畀奇妙電視同香港電視娛樂，而大致完成準備嘅香港電視網絡，佢嘅申請就被拒絕。由於香港政府事前未聲明會有三揀二嘅情況，又拒絕交代唔發牌畀香港電視網絡嘅原因，喺香港嘅公眾同輿論壓力下，商務及經濟發展局局長蘇錦樑同香港行政長官梁振英先後表示，基於行政會議嘅保密原則，唔能夠公開交代原因，淨係話申請結果涉及「一籃子因素」。事件激發香港社會強烈迴響，公眾唔接納呢啲解釋，引發12萬人遊行同埋包圍香港政府總部。

最後特區政府冇改變到決定，而香港電視網絡喺2018年放棄申請免費電視牌照。