春風亭
春風亭，香港一亭，喺牛坳山腰處，上八仙嶺仙姑峰山徑會經過。係為咗紀念1996年2月10號八仙嶺山火中捨己救人嘅兩位老師（周志齊老師同王秀媚老師）而起。「春風亭」一名，喻意教育深恩，作育萬物。
春風亭嘅橫匾上面嘅「春風亭」三個字係國畫大師方召麐（時任布政司陳方安生阿媽）嘅書法作品，春風亭裏面鑲咗三塊碑刻，當中有港督揭幕紀念碑，兩邊分別係由當時嘅教育署署長余黎青萍寫嘅中英對照碑記，陳述事件嘅始末，亭前面種咗兩樖羅漢松，紀念兩位老師捨己救人嘅崇高精神。
春風亭喺八仙嶺郊野公園裏面嘅八仙嶺自然教育徑第二站，由入口引水道石級向上行就去得到。春風亭背靠八仙嶺連峰，面向船灣淡水湖。