曹達華

出自維基百科,自由嘅百科全書
Jump to navigation Jump to search

曹達華(Cho Tat Wah或者Tso Tat-wah,1916年9月15號2007年1月10號)係香港粵語演員,有「影壇鐵漢」嘅稱號。佢因為經常喺粵語長片扮探長,所以畀人叫做「華探長」或者係「曹探長」。佢嘅成名作係《如來神掌》,而佢喺片入面就係飾演龍劍飛。

曹達華1916年喺台山出世,2007年1月10號因為胃出血喺英國死咗,終年91[1]

影視生涯[編輯]

曹達華15歲就一個人喺上海拍攝默片《關東大俠》。1935年,返香港後拍咗套《山東響馬》。1939年,又喺《烈女行》入面做主角。

抗日戰爭打完之後,佢創辦咗友聯電影公司,拍過《七劍十三俠》一系列武俠片

曹達華拍過嘅700幾部戲當中,以武俠片最多,佔咗有200套,其他重有一啲偵探片間諜片。嗰陣時出名嘅武打明星重有關德興石堅林蛟于素秋鄔麗珠任燕1949年1965年,喺70幾套《黃飛鴻》系列電影入面扮演黃飛鴻嘅大弟子梁寬。而佢嘅成名作《如來神掌》入面扮演龍劍飛。喺1980年代1990年代,佢亦有幫香港兩間免費電視台─無綫電視亞洲電視拍過劇集。

榮譽[編輯]

曹達華喺2001年香港影評人協會頒贈金紫荊獎終身成就獎。2003年石堅一齊拎香港電影金像獎頒贈嘅專業精神獎;同年獲邀出席星光大道打手印儀式,都反映佢喺電影界嘅地位。

個人生活[編輯]

1960年,佢曾擁有過百萬財產,有半條街物業,亦曾經係友僑片場老闆,又係香港第一個擁有Dodge自動波汽車嘅人,不過因為爛賭,喺澳門輸晒副身家。

1990年,曹達華收咗唯一嘅徒弟安德尊。同年,同個仔移民英國。到1993年,曹達華返香港幫無綫電視做嘢。1997年因為佢老婆腎病而返返英國生活。2000年,老婆過身,佢又一個人返返香港。2006年8月曾經喺旺角西洋菜南街14號天台寓樓梯跌親重傷,留院兩個月。

2006年11月11號由契仔安德尊陪佢返英國檢查身體,表示兩個月後就會返香港。期間去過上海探佢個女。

病逝英國[編輯]

曹達華喺2007年1月初個唔舒服喺醫院留醫,入院發現胃潰瘍加速惡化並引發肛門出血,最後喺2007年1月10號因併發心臟病逝世,娛樂圈盛傳曹達華病逝消息;2007年1月15號無綫電視晚間新聞喺天氣預報後最新消息引述佢契女陳寶珠訪問報道曹達華死訊。

家庭[編輯]

曹達華老婆朱綺華2000年病逝。佢哋有一對仔女,全部都已經喺外地定居,大女曹敏兒美國,細仔曹立滔(Harword)就喺英國

佢有兩個契女同兩個契仔,分別係陳寶珠米雪安德尊萬梓良

影響[編輯]

受電影影響,曹達華同石堅喺香港文化中一直分別代表住好人(正)同壞人(邪)。而曾經同曹達華傳出誹聞嘅于素秋都主演過好多曹達華嘅電影,當時好多人都話佢哋係最佳螢幕情侶。

參考[編輯]

  1. 曹達華去世終年91歲,明報,2007年1月16號