朴槿惠

出自維基百科,自由嘅百科全書
跳去: 定向搵嘢
朴槿惠

朴槿惠(韓文:박근혜,1952年2月2號—)係大韓民國現任(第18任,第11位)總統,亦係大韓民國史上第一個女總統、已故前總統朴正熙大女。

早年生活同教育[編輯]

朴槿惠喺大邱市出世,阿爸係韓國第五至第九任總統、「漢江奇蹟」締造者朴正熙,阿媽陸英修,有一個妹朴槿令同一個細佬朴志晚。1953年,朴家搬去漢城(家下首爾)住。朴槿惠後來就讀獎忠小學校。1961年,5·16軍事政變成功,朴正熙成為大韓民國總統,嗰時朴槿惠9歲。1967年喺漢城聖心中學校畢業;1970年喺聖心高等學校畢業;1974年西江大學電子工程系畢業。朴槿惠亦曾於法國的格勒諾布爾大學進修,後來因為阿媽逝世而離開法國。1973年至1980年,朴槿惠係韓國女童軍名譽總裁。朴槿惠喺1987年獲台灣嘅中國文化大學頒發榮譽博士學位,並喺該校研修過「最高產業戰略課程」。2008年,朴槿惠亦獲釜慶大學同埋韓國科學技術院分別頒贈榮譽博士學位,2010年更喺母校西江大學取得榮譽博士頭銜。

朴槿惠精通漢語,鍾意中國哲學馮友蘭著作《中國哲學史》對佢有刻骨銘心嘅影響。

雙親先後遇刺[編輯]

1974年8月15號,北韓指使裔北韓藉殺手文世光,喺韓國國立劇場行刺時任總統夫人陸英修。陸英修中槍身亡,終年49歲。身為大女嘅朴槿惠由法國趕返韓國,臨時充當第一夫人角色。

1979年10月26號,時任總統朴正熙亦俾中央情報部長官金載圭刺殺身亡,終年62歲,令顯赫嘅第一家庭蒙上陰影,朴槿惠心靈受重創。當時,反對派話佢哋曾經俾朴正熙政府強行收押,批評政府經濟發展放喺人權之上。

2007年,朴槿惠對當年社會活動分子遭到不良對待,表示遺憾。

政治生涯[編輯]

  • 1982年,朴槿惠任韓國嶺南大學理事長。
  • 1998年,首次當選國會議員,立即出任大國家黨(2012年2月改名新國家黨)副總裁。
  • 2002年5月訪問朝鮮,喺平壤會見當時嘅最高領導人金正日,經板門店回國。
  • 2004年至2006年,佢出任大國家黨代表。
  • 2005年5月24號,訪問北京,會見時任中共中央總書記兼中國國家主席胡錦濤。
  • 2006年5月20號,朴槿惠喺首爾參加大國家黨市長候選人競選活動時,俾不明身份男子用文具刀割傷塊面,醫生同佢縫咗17針。
  • 2007年,參與大國家黨總統選舉黨內初選,但以些微差距輸畀前首爾市長李明博。
  • 2008年,被時為候任總統嘅李明博委任為特使出訪中華人民共和國。
  • 2008年,獲得韓國科學技術院名譽博士。
  • 2011年至2012年,佢再出任新國家黨黨魁,擔任非常對策委員長。
  • 2012年12月19號嘅2012年大韓民國總統選舉,朴槿惠以51.6%嘅得票率擊敗民主統合黨嘅文在寅律師,當選大韓民國總統。
  • 2013年2月25號,朴槿惠正式宣誓就職第十八任韓國總統,締造五項第一:
    • 第一位女總統
    • 第一位第二代嘅總統(父女總統)
    • 第一位未婚嘅總統(亦冇細路)
    • 第一位得票率過半數兼得票最高嘅總統(自韓國1987年民主化以嚟)
    • 第一位主修工程學出身嘅總統
  • 2014年4月16號,發生世越號海難,朴槿惠政府被指處理事件手法不當
  • 2016年,朴槿惠親信崔順實干預國政醜聞被踢爆,多個財團懷疑被迫向崔順實嘅基金會揼水,違反憲法同多項法律,而且擾亂市場運作。同年12月9號國會通過彈劾朴槿惠動議,朴槿惠被暫停總統職務。

個人生活[編輯]

朴槿惠阿媽陸英修篤信佛教,朴槿惠亦跟隨。2005年喺大邱桐華寺拜領拜領法號「善德華」,有追隨「善德女王嘅光華」嘅意思。朴槿惠亦受過天主教洗禮,對唔同宗教持包容態度,家陣佢冇宗教信仰。

朴槿惠冇結婚,亦都冇仔女。

出面網頁[編輯]