東九龍居民委員會

東九龍居民委員會（英文: East Kowloon District Residents' Committee），原名九龍十三鄉委員會，係香港民間組織（亦係九龍社團聯會嘅其中一個屬會），喺1957年3月11號成立，1986年換名做「東九龍居民委員會」，佢服務宗旨係團結居民、參與社會事務、服務社區、維護居民權益、發揚互助友愛精神、舉辦福利、文教、康樂、體育等事業，佢服務對象包括東九龍地區（包括九龍城區、黃大仙區同觀塘區）嘅居民。

史

東九龍居民委員會前身係「九龍十三鄉委員會」，喺1957年成立。

喺1956到57年，港英政府下令收返九龍十三鄉中嘅竹園鄉，用嚟起黃大仙徙置區（即黃大仙下邨同上邨）。當時港英政府對受影響農戶、商戶同廠戶嘅賠償唔作任何安排，私人屋地只象徵式土地面積一平方呎賠償一毫子。喺當地村民唔願遷出嘅情況下，港英政府派出軍警強行拆卸竹園鄉嘅房屋，同將部份村民遞解出境，令十三鄉村民同軍警發生衝突。

1957年3月11號，九龍十三鄉中嘅牛池灣鄉、竹園鄉、衙前圍、大磡鄉、元嶺鄉、沙地園鄉、坪頂鄉、牛頭角鄉、沙埔鄉同坪石鄉因唔滿意港英政府無理霸道嘅拆卸行動，組成「九龍十鄉聯合支援竹園村民會」同發起抗爭，由牛池灣鄉擔任主席團主席，之後茜草灣鄉、茶果嶺鄉同鯉魚門鄉亦相繼響應加入組織，事件最終引起中英兩國政府嘅關注。喺中國外交部連續兩次照會下，加上英國國會議員嘅斡旋下，英國政府終下令港英政府畀受影響嘅人士妥善安置同合理補償，包括畀業主用屋地換樓地權益，廠戶配畀徙置工廠大廈，而農戶、商戶就配徙置區地下舖位畀轉業維生。農戶重獲青苗費同每平方呎一到六毫嘅開耕費，而呢個個自發組織被英國國會議員改名做「九龍十三鄉委員會」。

1964年，九龍十三鄉委員會正式向警察牌照課註冊做合法團體。1986年，因應當時社會環境變遷，九龍十三鄉委員會換名做東九龍居民委員會。