東角
東角係香港一笪地方，喺香港島北岸，鵝頸同銅鑼灣之間，南向北由利園山伸到去燈籠洲，依家多數人都以為佢係銅鑼灣一部份。東角原本係英人地名，叫East Point，初時係域多利城最東便而名，不過唐人好少用，本地土名係鵝頭嘴。未填海嗰時，呢個係半島海角，半島西便原本有個細灣，叫灣仔；而東便係銅鑼灣呢個大海灣。東角個半島係由大坑同黃泥涌嘅水沖積而來。
海角兩邊同對出，百年來都填晒海。第一期係19世紀中開始。角東填到去家下維多利亞公園邊，角西做去到軒尼詩道。二期就喺第一次世界大戰同第二次世界大戰，填出去告士打道，個角連形都無。之後起紅磡海底隧道，又再填海起路，填到去燈籠洲，成個角完全消失。港鐵銅鑼灣站、世界貿易中心都喺東角原地上面。皇室堡、百德新街就係喺第一期填地之上。佢哋嘅西面係鵝頸。
而家東角呢個地名得返東角道用。