樂葵徑

街牌

樂葵徑入口處

樂葵徑（英文：Lok Kwai Path），香港一徑。叫徑又唔係行人徑，實情行車路。佢喺沙田火炭山入便，樂林路邊，得嗰十二米，香港啲街佢至短，得樂林路口，行到晉名峰私家路車閘咁啲多。原本無咁短㗎。晉名峰笪地，前身有個百德苑，做香港理工大學職員宿舍。中間有條街，長約二百米，私家街來嘅。後尾笪地交返畀政府，又後尾二〇〇八年，起咗個屋苑，叫晉名峰，街就起過，改咗定義，剩得閘口一段。對正路口，向沙田方向，有個專綫小巴站搭62K。

語源

樂葵徑英文Lok Kwai Path，按命名習慣，英文path繙做徑字，但可以行車。而英文Lok Kwai由樂葵繙過來。呢帶街同時起，同時用樂字頭，接住種草木名。葵喺華南而言，指蒲葵，亦即扇葉蒲葵，舊時日用品會用到，可以做葵扇、掃把、遮咁。

史

呢帶原本火炭北面山頭，禾竂坑、拔子窩、落路下中間。一九六七年圖，話開始做地盤。一九六九年圖，見到開山劈石，化成石塘，樂葵徑一帶喺入便。一九七五年，石塘以西變地盤。一九七七年，石塘同周圍都變地盤。

一九八二年航空相，見到百德苑起咗一部份，而樂葵徑起成，貼近樂林路。一九八五年百德苑再擴展，一九八六年樂葵徑變咗喺中間，離樂林路遠啲。一九八七年圖，百德苑擴建完成。一九八九年圖，樂葵徑尾有個游水池。

二〇〇八年，屋苑晉名峰落成。五月二號，香港憲報第二千八百九十五號公告，樂葵徑劃剩得短短十二米，一架雙層巴士咁長。而晉名峰地埗，樂葵徑二號。