機務段 (社區)

機務段（粵拼：gei1 mou6 dyun6）係一個廣州市嘅社區，位置喺越秀區礦泉街道。呢度冚嘭冷都係廣州鐵路局嘅鐵路工人宿舍，個名就係來自隔籬負責檢修火車頭（中文：機車）嘅廣州機務段。

地理

機務段氹氹緙俾鐵路圍住，西邊隔籬係廣州機務段，南邊係王聖堂，東邊係瑤台。廣州機務段西邊條西灣路兩邊，而今成片起咗嘅樓盤，從東南角開始逆時針噉數，包括「越秀·財富天下」、「富力·唐寧花園」、「富力·唐寧公館」、「嶺南灣畔」、「越秀·財富公館」等等，查實呢啲地方以前係廣州水泥廠、廣州鑄管廠、廣州市市政排水公司水泥製品廠（簡稱「廣排」）。

因為機務段氹氹緙都係鐵路，加上舊陣時鐵路出邊就係水泥廠同城中村，所以交通非常之唔方便。無論去邊一邊，都要過鐵路道口，仲要行好遠，先至出到去大路。一係向西南邊兜過水泥廠先出到去西灣路，一係向東南邊經過王聖堂，或者向東邊經過瑤台先去到廣園西路。又冇巴士入去。最近嘅巴士站係「黑山」，喺西灣路口（即係而今西灣路同站西路嘅交界）。「黑山」同機務段之間要行成15分鐘以上，要過天橋同埋過鐵路道口。

所以舊時，啲人好興搭「殘疾車」或者「饅頭仔」，主要來往機務段同西灣路口或者西村之間，亦有去王聖堂或者瑤台。「殘疾車」實質係三輪摩托車，後排好闊，俾人改裝來車客，通常都會加個雨蓬仔，但係唔會有安全帶，坐嘅人亦唔會有頭盔戴。「饅頭仔」攞成個後座來車客，拆晒所有嘢，淨系擺啲木凳仔或者膠凳仔，亦係咩安全措施都冇。啲車仲要開得好快。雖然呢啲駁腳服務好牙煙，之但係，成車人一齊先畀幾蚊到十來蚊就有得搭一程，夠晒平peng4夠晒方便，又冇其它交通接駁，所以呢啲車一路都好多人搭。

2000年代中期，站西路同機務段大街條路整好咗，起咗兩條天橋飛過啲火車路，又用石屎同瀝青鋪晒成條馬路。

後來，開咗225路巴士（機務段至濱江東路）同486路小巴（機務段至西村），啲私人駁腳生意先至完全消失。而今住喺機務段啲人都仲係靠呢兩條巴士線出入。

除此之外，鐵路職工可以選擇搭火車交通車，向南可以去到廣州站，向北可以去到江村。不過交通車班次好少，每日早晚先有。

環境

機務段啲樓好多都好舊，又冇電梯。2010年代，成日出現水壓不足嘅問題。

廣州機務段負責檢修火車頭，所以啲火車頭出出入入，好多時會響安，噪音造成滋擾。

以前西灣路啲工廠未拆，仲有開工，西灣路、站西路、機務段大街沿路四圍都好大塵，黃黚黚，灰蒙蒙。

交通

• 225路巴士（機務段至濱江東路）
• 486路巴士（機務段至西村）
• 火車交通車（僅限鐵路職工，早晚各一班，列車來往廣州站與江村站之間）

睇埋

• 廣州市鐵四小學
• 廣州市鐵二中學
• 共和村

出面網頁

• YouTube上面嘅225路巴士錄影 (機務段至濱江東路). 2015-10-01.