廣州站

出自維基百科,自由嘅百科全書
Jump to navigation Jump to search
搞清楚 「廣州火車站」跳轉到呢度。
中華人民共和國鐵路路徽 廣州站
Guangzhou Railway Station 2013.11.16 07-27-58.jpg
車站代碼 23693
- 電報碼 GZQ
- 拼音碼 GZH
位置 Flag of the People's Republic of China.svg 中國廣東省廣州市越秀區
環市西路人民北路嘅交界
管轄權歸屬 廣州鐵路集團
途經線路 京廣鐵路
廣深鐵路
廣茂鐵路
車站等級 一等站


廣州站粵拼gwong2 zau1 zaam6),又叫廣州火車站gwong2 zau1 fo2 ce1 zaam6),係中國廣東廣州嘅一個火車站,1974年4月12號開始營運,位置喺越秀區人民北路環市西路嘅交界。

呢個站係華南最大嘅火車站同廣州市入面嘅其中一個主要嘅鐵路客運站。佢重係火車地鐵嘅轉車車站。

[編輯]

背景[編輯]

早期嘅大沙頭火車站(1924年)
內文: 大沙頭站

呢個站嘅原址唔喺環市西近人民北路口,而喺大沙頭嗰邊,喺1911年起好。期間一直係九廣鐵路中華民國段嘅終點站,民國36年(1937年)演變成九廣同粵漢鐵路(而家係京廣鐵路嘅一部分)旅客列車嘅終點站重改名做廣州東站搞拉客生意。期間喺黃沙搞咗廣州南站負責貨運同列車嘅編組[1]。雖然嗰時有搞石圍塘火車站,但由於未起西南大橋[註 1],令大沙頭站一度成為客流量比較大嘅火車站。

中華人民共和國成立之後,原先喺中華民國段嘅九廣鐵路改名做廣深鐵路,廣州東站亦改名做廣州站。隨住廣州南站石圍塘火車站搞咗鐵路輪渡之後同粵漢、九廣連埋一齊。後嚟為咗方便旅客跳過廣州北[註 2]再直接去廣州西站,而喺流花橋範圍起咗條聯絡綫,重喺聯絡綫嘅終點位整咗間線路所出嚟。

工程[編輯]

1957年,由於湖北武漢長江大橋起好咗,將粵漢鐵路同京漢鐵路連埋一齊而將路線合併成京廣鐵路。加上西南大橋[註 1]亦順利開通而將廣三、京廣同廣深三條鐵路連埋一齊。由於嗰時其它鐵路站凈拉貨唔拉客,所以喺大沙頭嘅廣州站亦成為客流最火爆嘅車站,出入站幾乎打嗮蛇餅。但1962年受到國民經濟調整同閂咗、轉移咗部分企業,令鐵路嘅客運量出現勁跌。1960年代中葉,由於喺大沙頭嘅廣州站受到站場太細,加上太少存車綫、冇等車室嘅關係,令鐵路部門決定喺舊時嘅流花橋線路所整大個規模兼改名做流花橋站重開始辦搭客業務。

本嚟流花橋線路所重有機會繼續整大規模,但由於嗰時上級減少出錢規模,加上受到文革破四舊浪潮影響,令車站工程一度陷入財困而冇繼續起,直到1972年先至重新恢復返工期。後嚟火車站喺1974年4月10號正式起好,重喺兩日後投入營運。期間車站亦正式定名做廣州站。車站啱起好無耐,由於嗰時廣州地區好多地方都屬山旮旯地帶,令呢間嘢成為地標建築。原先大沙頭嗰間降級成客技站重喺1985年正式停用兼拆冧[2]

營運[編輯]

車站起好之後,由於附近多咗友誼劇院東方賓館中國大酒店、交易會流花展館呢啲建築形成一景,攞埋1985年嘅羊城八景稱呼(流花玉宇)[3]。1979年恢復返廣九直通車之後,站房東邊亦做咗出入境大廳用途直到1996年搬到廣州東站為止。1981年加開咗第四月台。1990年代初期因廣東嘅高速經濟發展,令好多人猛咁到廣東謀生而成為民工聚集地。喺每年農曆除夕出現大量民工搭火車返屋企嘅情況。期間令車站同滘口天河兩間汽車客運站一樣,出現治安混亂嘅情況。

車站從2008年開始,每年春運期間凈臨時改做辦跨省長途客車業務,而去深圳嗰邊嘅和諧號列車冚唪唥改嗮到廣州東站停。

註同攷[編輯]

  1. 1.0 1.1 呢度講嘅「西南大橋」係而家嘅珠江大橋
  2. 呢度講嘅「廣州北站」唔係花都新華嗰間,係白雲區棠溪三元里大道近住高田街口嗰間。
  1. "第二节 广深铁路". 广东省省情信息库. (原先內容喺2012-07-07歸檔). 喺2010-12-30搵到. 
  2. 廣州交通郵電志編纂委員會 (1993). 《廣州交通郵電志》. 广州: 廣東人民出版社. ISBN 7-218-01141-1. 
  3. "豪华火车站一天数拨学生参观". 广州日报. 2009-09-29. (原先內容喺2011-12-02歸檔). 喺2011-07-22搵到. 

鐵路路線[編輯]

上一站 中國鐵道 下一站
終點 廣州站
京廣鐵路
棠溪站
豐臺站
終點 廣州站
廣深鐵路
廣州東站
深圳站
廣州西站
茂名站
廣州站
廣茂鐵路
終點