江迅

出自維基百科,自由嘅百科全書
跳去導覽 跳去搵嘢

江迅1947年2021年10月13號)係香港傳媒人,做過《文匯報》、《文學報[1],離世之前係香港媒體《亞洲週刊》嘅副總編[2]

生平[編輯]

江迅喺上海出世,籍貫廣東番禺,1968年喺安徽省上海黃山茶林場務農,1974年起先後喺上海第二醫學院、《文匯報》、《文學報》任職。1994 年移居香港,任香港《亞洲週刊》資深特派員,共和(香港)出版有限公司董事總編輯[1][3]

佢亦係香港作家聯會會員,著作有《大下海》、《1998 中國病》、《行筆香港》、《香港的七情六欲》、《港人創業上海》等[1]

[編輯]

2021年10月10號,江迅突然發燒同全身痛緊急送院,喺仁濟醫院急症室觀察一晚後,醫生覺得情況無大礙而出院,但之後江迅病情再發作,最後喺13號下晝兩點左右離世[2]

佢嘅死引起香港親中派好大反應,香港前特首梁振英之後喺社交媒體表示沉痛哀悼[3][4]。《文匯報》報道江迅家屬質疑院方「延誤治療」,而親中派「評論員」劉瀾昌馮煒光屈穎妍陳祖光等人,之後聯署要求特首林鄭月娥全面調查江迅死因,而《大公報》評論就指控有醫護將個人政治理念放喺病人權益之上[5]

之後,仁濟醫院澄清,話已經詳細解答咗家屬對病人死因同治療經過嘅疑問,又話當時已經做過好多唔同嘅化驗同檢查,事件已經轉交死因裁判官跟進以確定死因,亦認為醫療團隊已經盡力救治病人[5]。另外,《南華早報》亦報道醫院照顧江迅嘅詳細情況,話醫生早喺12號午夜(即第二次入院後1個鐘左右)已睇過江迅,到凌晨兩點半值班醫生再次睇佢,並安排血液同尿液檢驗,仲有透過X光、心電圖診斷病因。病人後來被轉到ICU,前後醫生至少睇過佢六、七次,一入深切治療部,周圍都有醫護人員,根本冇證據顯示係醫療失誤[6]

參考[編輯]

  1. 1.0 1.1 1.2 "《亞洲週刊》副總編江迅離世 享年 74 歲 | 立場報道 | 立場新聞". 立場新聞 Stand News. 原先內容歸檔喺2021-10-18. 喺2021-10-18搵到.
  2. 2.0 2.1 聯合新聞網 (2021-10-16). "香江風情/江迅送醫突逝 引爆香港醫改 | 聯合新聞網:最懂你的新聞網站". 聯合新聞網 (中文). 原先內容歸檔喺2021-10-18. 喺2021-10-18搵到.
  3. 3.0 3.1 中時新聞網. "《亞洲週刊》副總編輯江迅逝世 享壽74歲 - 兩岸". 中時新聞網 (中文). 原先內容歸檔喺2021-10-18. 喺2021-10-18搵到.
  4. 謝媛彰 (2021-10-14). "資深傳媒人江迅逝世 終年74歲 梁振英FB悼念:沉痛哀悼". 香港01 (中文). 原先內容歸檔喺2021-10-18. 喺2021-10-18搵到.
  5. 5.0 5.1 "傳媒人江迅離世 家屬質疑延醫 親建制評論員聯署促特首撤查 仁濟:醫護已盡力 | 立場報道 | 立場新聞". 立場新聞 Stand News. 原先內容歸檔喺2021-10-18. 喺2021-10-18搵到.
  6. "Hong Kong columnists call for probe into hospital's treatment of writer". South China Morning Post (英文). 2021-10-16. 原先內容歸檔喺2021-10-18. 喺2021-10-18搵到.